Read Jinghpaw Hanson Version Bible DANIELA 12 Bible Online

DANIELA 12 - Jinghpaw Hanson Version Bible bible

DANIELA 12

¹“Ndai aten hta e, na a amyu masha ni hpe makawp maga nga ai, du kaba ngu ai, Mihkaela rawt pru na ra ai rai nna, masha amyu tai hpang ai kaw nna, ndai aten du hkra, galoi n byin yu ai, ru tsang ai aten du na ra ai: ndai aten hta e, jahpan laika hta mying lawm ai, na a amyu masha ni yawng lawt lu na mara ai.

²Ga nhpu hta yup pyaw nga ai ni law law wa, yup hprang na mara ai: nkau mi gaw htani htana asak lu la nna, nkau mi gaw htani htana kaya kahpa hte arawng hpoi ai hkrum na mara ai.

³Nyan rawng ai ni gaw, sumsing lamu a nhtoi zawn, masha law law hpe dinghpring ai maga de jashawn ai ni gaw, shagan ni zawn, htani htana prat dingsa e htoi tu kabrim na mara ai.

⁴Nang chyawm gaw, Daniela e, ndai amu htum ai aten du hkra, ndai mungga hpe ip da nna, laika hpe dazik shakap kau u: masha law law wa tam kahkrang hkawm nna, nyan hpaji jat wa na ra ai,” nga nna tsun ai.

⁵Shaloi ngai Daniela mada yu yang, yu u, kaga masha lahkawng, hka ndai hkran langai mi, wora hkran langai mi, tsap nga ma ai.

⁶Marai langai mi gaw, ‘Ndai mauhpa lam dik wa ai du hkra, gade na na rai ta?’ ngu nna lachyit nba bu hpun let, hka ntsa e tsap nga ai wa hpe san wu ai.

⁷Shaloi, ‘Dai gaw aten mi, aten lahkawng hte aten chyen mi na na ra ai; dai chyoi pra ai amyu a n-gun atsam hpe agrawp daw kau ngut jang, ndai amu yawng ngut wa na ra ai,’ nga nna lachyit nba bu hpun let hka ntsa e tsap nga ai wa gaw, sumsing lamu de hkra lata pai lata sharawt nna, htani htana ahkrung nga ai wa a amying gang let, dagam nga ai hpe, ngai na nngai.

⁸Dai ga hpe ngai na timung, n chye na nngai: dai rai nna ngai gaw, “Madu e, ndai amu ni kaning rai htum lu na rai ta?” ngu nna san we ai.

⁹Shaloi dai wa gaw, “Daniela e, sa wa su; dai ga gaw amu htum ai aten du hkra, ip da nna, dazik kap nga ai.

¹⁰Masha law law wa tinang hkum hpe shachyoi shapra nna, hpraw wa ai hte san seng na mara ai; tara n lang ai ni chyawm gaw, tara n lang ai hku hkan nang na mara ai; tara n lang ai wa kadai mung, chye na lu na n rai: nyan rawng ai ni chyawm gaw, chye na lu na mara ai.

¹¹Tutnawng nawng ya ai wan nat hkungga hpe dawm kau nna, jahten shabyak chye ai matsat shabat kumla shadun ai aten kaw nna, nhtoi hkying mi ni tsa jahku shi na na ra ai.

¹²Dai hta n-ga, nhtoi hkying mi masum tsa sumshi manga ya du hkra, ala nga nna, shakut sharang ai wa gaw, a nga ai.

¹³Nang chyawm gaw dai aten gu hkra sa wa su: nang aban asa nga lu nna, aten ladaw jahtum e na a kamhtaw hta tsap nga lu na rin dai,” nga nna tsun ai.