Read Jinghpaw Hanson Version Bible DANIELA 3 Bible Online

DANIELA 3 - Jinghpaw Hanson Version Bible bible

DANIELA 3

¹Hkawhkam Nebuhkadneza gaw, dawng kru shi tsaw nna, dawng kru kaba ai, aja sumla galaw nhtawm, Babelon mungdaw na Dura pa e shadun da wu ai.

²Shaloi hkawhkam Nebuhkadneza gaw, shi shadun da ai sumla hpe hkap hkalum la na matu, munggyi ni, du ni, hpyen du ni, tara agyi ni, sutdek up ai ni, mung bawng ni, pya da du ni hte mungdaw up ai ni mahkra hpe shaga jahpawng mu ai.

³Dai rai nna, hkawhkam Nebuhkadneza shadun da ai sumla hpe hkap hkalum la na matu, munggyi ni, du ni, hpyen du ni, tara agyi ni, sutdek up ai ni, mung bawng ni, pya da du ni hte mungdaw up ai ni mahkra gaw sa zuphpawng nna, hkawhkam wa shadun da ai sumla man e tsap nga ma ai.

⁴Shaloi ga htawn ai wa gaw, “Masha amyu myu hte ga baw kaga ga tsun ai ni e, madat mara mu:

⁵nanhte gaw pahtau, pahke, tingse, sumpyi, chying bau, baja hte dum ai baw amyu myu ngoi ai nsen na jang, hkawhkam Nebuhkadneza shadun da ai ja sumla hpe gum dagup nawku mu:

⁶n naw n ku ai wa kadai mung, dai ahkying hta pyi, grung nga ai wan htung hta kabai bang kau ai hkrum na ra ai,” nga nna jahtau tsun ai.

⁷Dai re ai majaw, masha amyu baw mahkra gaw, pahtau, pahke, tingse, sumpyi, chying bau hte dum ai baw amyu myu ngoi ai nsen na jang, masha amyu baw ni hte ga baw kaga ga tsun ai ni mahkra gaw, gum dagup nna, hkawhkam Nebuhkadneza shadun ai aja sumla hpe nawku ma ai.

⁸Shaloi jang Hkalde masha nkau mi gaw sit sa nna, hkawhkam Nebuhkadneza hpe,

⁹“Hkawhkam wa e, nang tutnawng ahkrung nga n ga law.

¹⁰Nang hkawhkam wa nan, Pahtau, pahke, tingse, sumpyi, chying bau, baja hte dum ai baw amyu myu ngoi ai nsen na ai amyu masha ni yawng, aja sumla man e gum dagup nna nawku mu ga:

¹¹n naw n ku ai wa kadai mung, grung nga ai wan htung hta kabai bang kau ai hkrum na ra ai, nga nna hkang da nit dai.

¹²Rai timung, Bebelon mungdaw a amu ntsa e nang san da ai Yuda masha, Shadrak, Meshak, Abed-nego hte gaw, nang hkawhkam wa hpe n kaw n law di ma ai: shanhte gaw na a hpara ni hpe, daw jau ma ai, n rai; nang shadun da ai ja sumla hpe mung, nawku ma ai, n rai, nga nna Yuda masha ni hpe mara shagun let jehte tam ma ai.”

¹³Shaloi Nebuhkadneza gaw masin pawt nna n-yun bu let, Shadrak, Meshak, Abed-nego hte hpe, Shaga mu, ngu nna hkang dat wu ai. Shaloi shanhte gaw, dai ni hpe hkawhkam wa man de jashawn mu ai.

¹⁴Shing rai Nebuhkadneza gaw, “Shadrak Meshak, Abed-nego hte e, nanhte gaw gaja wa nye a hpara hpe dingsa n daw n jau ai hte, ngai shadun da ai ja sumla hpe, n nawku hkraw nga myit ni?

¹⁵Ya nanhte gaw, pahtau, pahke, tingse, sumpyi, chying bau, baja hte dum ai baw amyu myu ngoi ai nsen na jang, ngai galaw da ai sumla hpe gum dagup nawku na matu jin jin rai nga mu; shing n rai yang, dai aten e pyi, grung nga ai wan htung hta nanhte kabai bang kau ai hkrum na myit dai: nye a lata na nanhte hpe mawai la lu ai hpara gaw, kadai rai ta?” ngu nna shanhte hpe sharim mu ai.

¹⁶Shaloi Shadrak, Meshak, Abed-nego hte gaw, “Nebuhkadneza e, anhte nang hpe dai lam htan shara n nga ai.

¹⁷Anhte daw jau nga ai Karai Kasang gaw, grung nga ai wan htung hta na, anhte hpe shaw la lu na ra ai: hkawhkam wa e, shi gaw na a lata na mung, anhte hpe mawai la na ra ai.

¹⁸Shi n mawai la dam timung, hkawhkam wa e, na a hpara ni hpe anhte daw jau na n rai; nang shadun da ai ja sumla hpe mung, nawku na ga ai n rai, chye nga u,” ngu nna hkawhkam wa hpe htan mu ai.

¹⁹Dai rai nna Nebuhkadneza n-yun bu ai hte, Shadrak, Meshak, Abed-nego majaw myi man hten nna, dai wan htung hpe shawng na hta, htam sanit kahtet shangun na matu, ga hkang dat mu ai.

²⁰Dai hta kaga, Shadrak, Meshak, Abed-nego hpe gyit nna, grung nga ai wan htung hta kabai bang kau na matu, n-gun ja ai hpyen masha nkau mi hpe, hkang da wu ai.

²¹Shing rai dai marai masum hpe, tinang a labu, palawng, lawai ai nba hte hpawn gyit nna, grung nga ai wan htung kata de, kabai bang dat mu ai.

²²Hkawhkam wa hkang da ai ga ja la nga ai hte, wan htung gaw nachying kahtet la nga ai majaw, de a wan shinglet gaw, Shadrak, Meshak Abed-nego hte hpe dun bang ai ni hpe, hkru sat kau mu ai.

²³Shadrak, Meshak, Abed-nego ngu ai marai masum chyawm gaw, dai grung nga ai wan htung kata de, gyit hkang let, hkrat bang ma ai.

²⁴Shaloi hkawhkam Nebuhkadneza gaw mau mat nna, gan rawt nhtawm, “Ataw, marai masum hpe sha anhte gyit nna, wan kata de jahkrat bang ai, n rai ni?” ngu nna shi a salang bawng ni hpe san mu ai. Shanhte gaw, “Re ai, hkawhkam wa e,” ngu nna htan mu ai.

²⁵Hkawhkam wa mahtang, “Yu mu, marai mali n gyit n hkang ai hte, hkala nba n hkrum ai, wan kata e hkawm nga ma ai hpe, ngai mu nngai; mali ngu na wa gaw, hpara kasha nsan nga ai,” nga nna tsun let,

²⁶Nebuhkadneza gaw grung nga ai wan htung mahka de sit sa nhtawm, “Tsaw Htum ai Karai Kasang a shangun ma Shadrak, Meshak, Abed-nego hte e, pru wa marit,” ngu mu ai. Dai rai nna shanhte gaw wan kata de na pru wa ma ai.

²⁷Shing rai, munggyi ni, du ni, hpyen du ni hte hkawhkam a mung bawng salang ni gaw zuphpawng nna, dai marai masum hpe jawm yu ma ai: wan gaw shanhte a hkum hpe n hkru ai hte, shanhte a kara singgawng langai mi pyi hkru magyi ai n rai; shanhte a hpun palawng mung n shai ai hte, wan sama pyi n manam ai hpe, mu mu ai.

²⁸Ya Nebuhkadneza gaw, “Shadrak, Meshak, Abed-nego a Karai Kasang gaw a nga u ga law: shanhte gaw tinang a Karai Kasang hta kaga, hpara shaje hpe n daw n jau, n naw n ku mu ga, shi hpe kamsham nna, hkawhkam wa a ga hpe lale kau let, tinang a hkum hpe pyi ap kau ma ai majaw, shi gaw shi a shangun ma ni hpe hkye hkrang la na matu, shi a lamu kasa hpe shangun dat nu ai.

²⁹Dai re ai majaw, masha amyu baw shagu hte, ga amyu kaga ga tsun ai amyu ni hta na langai ngai, Shadrak, Meshak, Abed-nego a Karai Kasang hpe shatan yang, dai ni gaw kahtum gadaw di ai hkrum mu ga; shanhte a nta ni nga hkyi sumpum tai u ga, nga nna ngai hkang da ni ai: kaning rai nme law, dai zawn hkye hkrang la lu ai Karai Kasang shaje n nga ai,” nga nna tsun nhtawm,

³⁰Bebelon mungdaw hta Shadrak, Meshak, Abed-nego hte hpe shagrau shatsaw mu ai.