Read Jinghpaw Hanson Version Bible DANIELA 5 Bible Online

DANIELA 5 - Jinghpaw Hanson Version Bible bible

DANIELA 5

¹Hkawhkam Belashaza gaw, du salang hkying mi hpe shaga nhtawm, poi kaba galaw nna, shanhte hte rau tsabyi jahku lu nga ai.

²Belashaza gaw tsabyi jahku chyim yu yang, shi a kawa Nebuhkadneza gaw, Yerusalem mare nawku Htingnu na la wa ai aja gawm, gumhpraw gawm ni hta, shi hkum hte shi a du salang ni, numdung num ni hte lashi num ni, lu lu na matu, dai gawm ni hpe jashawn na hkang dat wu ai.

³Shaloi shanhte gaw Yerusalem mare na, Karai Kasang a nawku htingnu nta kata na kashun la ai ja gawm ni hpe shapraw nna, hkawhkam wa hte shi a du salang ni, numdung num ni hte lashi num ni, dai gawm ni hta lu lu ma ai.

⁴Gaja wa shanhte tsabyi jahku lu nna, aja, gumhpraw, magri, hpri, hpun hte nlung e tawk galaw ai hpara ni hpe, shakawn kungdawn ma ai.

⁵Dai ahkying hta nan, masha lata a layung dawng pru nna, pyengdin shadun tawtap e, hkawhkam htingnu shakum na engade hta ka da nga ai: hkawhkam wa gaw ka da nga ai lata hpe mu wu ai.

⁶Dai rai nna hkawhkam wa myi man sum ai hte, myit ung ang nga ai; shi a mashi marung n-gun kya wa nna, shi a lahput shada ahkawk nga ai.

⁷Bai hkawhkam wa gaw, “mandan bau ai ni, Hkalde sara ni, gumhpan hpan ai ni hpe shaga mu,” ngu nna shabam dat wu ai: shing rai hkawhkam wa gaw, “Ndai ka da ai lam hte, de a ga lachyum ngai hpe htai dan lu ai wa kadai mung, hkyeng sawm ai hpun palawng bu hpun nna, ja hkachyi gali let ndai mungdan hta masum ngu na du tai na ra ai,” ngu nna Babelon hpaji rawng ai ni hpe tsun wu ai.

⁸Shing rai hkawhkam wa a hpaji rawng ai ni nlang sa du timung, shanhte gaw dai ka ai ga hpe n hti lu ai hte, de a lachyum hkawhkam wa hpe n htai dan lu mu ai.

⁹Dai rai nna hkawhkam Belashaza gaw nachying myit ung ang nga nna, shi a myi man sum wa ai hte, shi a du salang ni myit law nga ma ai.

¹⁰Ya, hkawhkam wa hte shi a du salang ni tsun ai ga majaw, hkawhkam jan kaba poi gawk de shang nna, “Hkawhkam wa e, tutnawng ahkrung nga n ga: myit hkum ung ang et; myi man hkum sum et:

¹¹chyoi pra ai hpara ni a wenyi rawng ai wa langai mi, na a mungdan hta shanu nga ai: hpara ni a hpaji hte bung ai, myit leng ai, chye chyang ai hte hpaji byeng-ya gaw, na nwa a prat e, dai wa hta rawng nga ai; na nwa hkawhkam Nebuhkadneza mung, gaja wa dai wa hpe lakle sara ni, mandan bau ai ni, Hkalde sara ni hte gumhpan hpan ai ni a ntsa e, up shangun wu ai:

¹²kaning rai nme law, Belteshaza ngu nna hkawhkam wa shamying ai ndai Daniela hta, nyan kaja, chye chyang ai myit, hpaji byeng-ya hte yup mang chye htai ai, makoi magap lam chye shapraw ai, gumwai ga chye malan ai nyan rawng nga ai. Ya, Daniela hpe shaga u; de a ga lachyum shi shapraw dan na ra ai,” ngu nna tsun wu ai.

¹³Dai rai nna Daniela hpe hkawhkam wa man e jashawn wu ai. Hkawhkam wa mung, “Nye wa hkawhkam wa gaw, Yuda mung na woi wa nna, Yuda bawng dung ni a kashu kasha ni hta lawm ai, Daniela, nang rai nga n ni?

¹⁴Chyoi pra ai hpara ni a Wenyi nang hta rawng nna, myit leng ai, chye chyang ai hte nyan kaja nang hta hpring nga ai, nga nna kajai ai shi ngai na nngai.

¹⁵Ya ndai ka da ai ga hpe hti nna, de a ga lachyum ngai hpe htai dan na matu, hpaji rawng ai ni hte Mandan bau ai ni hpe, nye a man e jashawn timung, shanhte gaw de a lachyum htai dan lu ma ai, n rai.

¹⁶Nang mahtang htai dan lu nna, gumwai ga malan lu ai hpe, na a lam ngai na ni ai: ya, ndai ka da ai ga hpe nang hti lu nna, de a lachyum ngai hpe shapraw dan lu yang, hkyeng sawm ai hpun palawng nang bu hpun nna, ja hkachyi gali let, ndai mungdan hta masum ngu na du tai na rin dai,” ngu nna Daniela hpe tsun wu ai.

¹⁷Dai rai nna Daniela gaw, “Hkawhkam wa e, dai kumhpa nang kaw rai nga u ga; nang jaw mayu ai shabrai kaga wa hpe jaw u: rai timung dai ka da ai ga hpe na a man e ngai hti dan nna, de a lachyum shapraw na nngai.

¹⁸Nang hkawhkam wa e, Tsaw Htum ai Karai Kasang gaw, na nwa Nebuhkadneza hpe mungdan hte hpawn, daru magam, arawng sadang hte hpung shingkang jaw wu ai:

¹⁹shi hpe jaw ai daru magam majaw, masha amyu baw ni hte ga amyu myu tsun ai ni yawng, shi a man e hkrit gari shajang nga ma ai: sat kau mayu ai wa hpe shi sat kau nga ai; jahkrung da mayu ai wa hpe jahkrung da nga ai; shagrau shatsaw mayu ai wa hpe shagrau shatsaw nga ai; shagrit kau mayu ai wa hpe shagrit kau nga ai.

²⁰Rai timung, gumrawng gumtawng lam hkan galaw hkra, shi myit kaba nna masin ja nga yang, shi gaw hkawhkam tingnyang na gum-yu yu mat ai hkrum nna, shi a hpung shingkang hkoi mat wa sai;

²¹shinggyim masha shanu ai shara na shi hpe shaden kau nna, shi a myit gaw ashu ashan myit hte maren tai wa ai hte, shi gaw nam lawze ni hte rau nga ai; Tsaw Htum ai Karai Kasang gaw masha mungdan hta up nga nna, de a ntsa e up shangun mayu ai wa kadai hpe mung, up shangun nga ai, shi chye matsing ai aten du hkra, shi gaw usu zawn tsingdu sha nna, shi a hkumhkrang gaw sumsing lamu mari hte madi mat nga ai.

²²Nang shi a kasha Belashaza e, ndai lam yawng hte hpe chye ninglen, na a myit hpe shagrit da wu ai, n rai;

²³sumsing lamu na Madu hpe nang shinggan kau nna, shi a nta na gawm ni hpe, na a man de jashawn nhtawm, nang hte na a agyi salang ni, numdung num ni hte lashi num ni, dai gawm ni hta tsabyi jahku lu nga ma hka; dai hta n-ga, myi n mu, na n na, hpa mung n chye ai gumhpraw, aja, magri, ahpri, hpun hte nlung hpara ni hpe nang shakawn kungdawn nna, na nsoi nsa Madu ngu ai, na a lam yawng hpajang tawn da ai Karai Kasang hpe, nang shagrau sha-a ai n rai:

²⁴dai re ai majaw, dai lata daw mi, shi a man na pru nna, ndai ga ka shakap da wu ai.

²⁵Ka shakap da ai ga chyawm gaw, Mana, mana, Tekela, Uhparsin nga ai:

²⁶da ndai gaw de a ga lachyum rai nga ai: mana ngu ai gaw, na a mungdan hpe Karai Kasang hti yu nna, jahtum kau nu ai;

²⁷Tekela ngu ai gaw, nang hpe joi hta shen yu yang, nang yawm nit dai;

²⁸Peresa, ngu ai gaw, na a mungdan hpe karan kau nna Medi hte Persi masha ni hpe ap kau nu ai, nga ai, rai nga ai,” ngu nna hkawhkam wa hpe tsun dan wu ai.

²⁹Shaloi Belashaza hkang da ai hte maren, shanhte gaw Daniela hpe hkyeng sawm ai hpun palawng jahpun nna, ja hkachyi gali nhtawm, mungdan hta masum ngu na du shi tai sai, nga nna shi a lam mungga shabra dat mu ai.

³⁰Dai shana e pyi, Hkalde hkawhkam Belashaza sat kau ai hkrum nna,

³¹Medi masha Dari gaw, shi a asak kru shi lahkawng ning e, dai mungdan hpe up hpang wu ai.