Read Jinghpaw Hanson Version Bible DANIELA 6 Bible Online

DANIELA 6 - Jinghpaw Hanson Version Bible bible

DANIELA 6

¹Ya Dari gaw, mungdan amu mahkra hpe gun hpai na matu, munggyi latsa e hkun tawn da na, myit hkut nga ai;

²hkawhkam wa akyu n yawm hkra, dai munggyi ni gaw jahpan dan na matu, shanhte a ntsa e munggyi kaba masum shi tawn da nna, dai masum hta langai mi gaw Daniela rai nga ai.

³Ndai Daniela hta nyan kaja rawng ai majaw, shi gaw munggyi kaba ni hte kaga munggyi ni hta ningtawn ningla rai nga nna, shi hpe mungdan ting a ntsa e tawn da na, hkawhkam wa myit ra nga ai.

⁴Shaloi munggyi kaba ni hte kaga munggyi ni gaw, mungdan up ai lam hta Daniela hpe mara shagun na tam ma timung, shi gaw kangka rai nga nna, shut ai hte myit magaw ai lam, shi hta n nga ai majaw, mara shagun shara hpa n mu ma ai.

⁵Dai rai nna ndai masha ni gaw, “shi a Karai Kasang hpe nawku ai htung hta kaga, ndai Daniela hpe mara shagun shara hpa mung anhte mu na ga ai, n rai,” nga nna shada tsun hkat ma ai.

⁶Shing rai ndai munggyi kaba ni hte kaga munggyi ni gaw, hkawhkam wa man de sa hpawng nna, “Hkawhkam Dari e, nang tutnawng ahkrung nga n ga:

⁷Nang hta kaga, hpara hpe mung, masha hpe mung, nhtoi sumshi ya laman e, akyu hpyi ai wa kadai mung, hkanghkyi nhkun hta jahkrat bang kau ai hkrum u ga, nga nna n galai mat lu ai hkawhkam mungga shapraw na matu, munggyi kaba ni, du ni, munggyi ni, bawmung ni hte hpyen du ni yawng, bawng hkrum saga ai.

⁸Ya, hkawhkam wa e, n galai mat lu ai Medi hte Persi masha ni a htung hte maren, ndai tara hpe shagrin da nna, dai laika hpe amying dazik shakap u,” ngu nna, tsun mu ai.

⁹Dai re ai majaw hkawhkam Dari gaw, dai laika hte tara hpe amying dazik shakap wu ai.

¹⁰Dai laika hta amying dazik shakap nga ai hpe, Daniela chye jang, shi gaw shi a nta de shang wa sai; ya, shi a gawk hkuwawt chyinghka ni gaw, Yerusalem mare de ang nna hpaw nga ai: shing rai shi gaw shawoi galaw ai hte maren, lani mi hta masum lang lang, lahput hput di let akyu hpyi nna, shi a Karai Kasang hpe shakawn kungdawn nga ai.

¹¹Shing rai munggyi ni zuphpawng nna, Daniela gaw shi a Karai Kasang man e akyu hpyi ai hte tawngban nga ai hpe, mu ma ai.

¹²Shaloi shanhte sit sa nna, “Hkawhkam wa e, nang hta kaga hpara hpe mung, masha hpe mung, nhtoi sumshi ya laman e akyu hpyi ai wa kadai mung, hkanghkyi nhkun hta jahkrat bang kau ai hkrum u ga, nga nna mungga laika hpe nang amying dazik shakap da nu ai, n rai ni?” nga nna hkawhkam tara laika a lam san mu ai. Hkawhkam wa mung, “N galai mat lu ai Medi hte Persi masha ni a tara hte maren, dai lam teng nga ai,” ngu nna htan wu ai.

¹³Dai rai nna shanhte gaw, “Hkawhkam wa e, bawng dung ai Yuda kashu kasha ni hta lawm ai, ndai Daniela gaw, nang hpe mung, nang amying dazik shakap ai tara hpe mung, hpa n nawn nna, lani mi hta masum lang lang, akyu hpyi nga ai,” ngu nna hkawhkam wa hpe tsun mu ai.

¹⁴Hkawhkam wa gaw dai ga na jang, myit grai n pyaw nna, Daniela hpe kaning di mawai la lu na, myit sumru yu ai hte, jan shang ai du hkra shi hpe shalawt dat lu na ginshan tam shakut nga ai.

¹⁵Rai timung, ndai masha ni gaw hkawhkam wa man e bai hpawng nna, “Hkawhkam wa e, lang mi shapraw ai hkawhkam mungga hte tara gaw, n galai mat lu ai, nga nna Medi hte Persi masha ni a tara hta rawng nga ai hpe, dum u,” ngu nna hkawhkam wa hpe shadum mu ai.

¹⁶Shaloi hkawhkam wa ahkang jaw nna, shanhte gaw Daniela hpe woi la nhtawm, hkanghkyi nhkun hta jahkrat bang kau mu ai. Hkawhkam wa chyawm gaw, “Daniela e, nang n sim n sa nawku nga ai, na a Karai Kasang gaw, nang hpe mawai la na ra ai,” ngu wu ai.

¹⁷Shanhte lungpa la nna, nhkun mahka hpe pat nhtawm, Daniela amu hta n jat n yawm lu hkra, hkawhkam a lachyawp dazik hte mung, mung du ni a lachyawp dazik hte mung, dawk da mu ai.

¹⁸Dai hpang hkawhkam wa gaw shi a htingnu de wa mat nna, shana tup shat n sha nga ai: sumpyi dum ai baw mung, shi hpang de n jashawn wu ai: yup mung n lu sha nga ai.

¹⁹Bai hkawhkam wa gaw, jahpawt jau jau e rawt nna, hkanghkyi nhkun de alawan sa wa ai.

²⁰Dai de ni wa jang shi gaw hkrap ngu hkrap ngoi ai nsen hte Daniela hpe shaga nna, “A hkrung nga ai Karai Kasang a shangun ma Daniela e, nang n sim n sa nawku nga ai, na a Karai Kasang gaw, hkanghkyi ni a n-gup na nang hpe mawai la lu a ni?” ngu nna san wu ai.

²¹Shaloi Daniela gaw, “Hkawhkam wa e, nang tutnawng ahkrung nga n ga.

²²Nye a Karai Kasang gaw, shi a lamu kasa shangun nna, hkanghkyi ni a n-gup pat kau ya ai hte, ngai hkala nba n hkrum nngai: kaning rai nme law, shi a man e ngai san seng nga nngai; na a man e mung, hkawhkam wa e, ngai hpa n shut nngai,” ngu nna hkawhkam wa hpe htan wu ai.

²³Shaloi hkawhkam wa gaw, nachying kabu nna, Daniela hpe nhkun de na shaw la na lam, hkang dat wu ai. Shing rai Daniela gaw nhkun de na shaw la ai hkrum nna, shi gaw shi a Karai Kasang hta shamyet nga ai majaw, hkala nba hpa mung shi hta n mu nga ai.

²⁴Dai hpang Daniela hta mara shagun ai ni hpe, hkawhkam wa hkang dat ai ga hte, shanhte shaga nhtawm, kashu kasha madu jan ni hte hpawn, hkanghkyi nhkun de jahkrat bang kau nna, hkanghkyi ni shanhte hpe kawa amya kau ai hte, htumpa de garai n du yang, shanhte a nrut nra yawng hpe, agrawp daw kau ya mu ai.

²⁵Dai hpang Dari hkawhkam gaw, ga ntsa ting hta e shanu nga ai amyu baw ni hte, ga amyu myu tsun ai masha yawng hte hpe laika ka nna, “Nanhte hta ngwipyaw ai gaw, law htam wa u ga law:

²⁶nye a mungdan ting chyam hkra masha nga manga hte gaw, Daniela a Karai Kasang man e hkrit hkungga nga mu, ngu nna hkang da ai ga ngai hkang dat nngai: kaning rai nme law, shi gaw ahkrung nga ai Karai Kasang rai nga nna, htani htana prat dingsa agrin nga ai: shi a mungdan gaw hten byak mat lu ai n rai; shi a ahkang aya gaw, lamu ga htum hkra rai na ra ai:

²⁷shi hkye hkrang la nna mawai la lu ai; sumsing lamu hte ginding aga hta lamik kumla hte mauhpa amu shi galaw nga ai; shi gaw Daniela hpe hkanghkyi ni a n-gup na mawai la lu ai,” ngu nna ka shabra dat wu ai.

²⁸Shing rai ndai Daniela gaw Dari up hkang ai prat e mung, Persi masha Kuru up hkang ai prat e mung, galu kaba wa nga ai.