Read Jinghpaw Hanson Version Bible DANIELA 8 Bible Online

DANIELA 8 - Jinghpaw Hanson Version Bible bible

DANIELA 8

¹Ya hkawhkam Belashaza hkaw dung ai masum ning hta e, ngai Daniela gaw shawng na shingran hpe mu ai hpang shingran bai mu nngai.

²Ngai mu ai shingran gaw da ndai rai nga ai; ngai hkum nan Elam mungdaw na Shushan htingnu hta e rai nga nna, shingran mu yang gaw, Ulai hka kau e rai nga nngai.

³Shaloi ngai dap mada yu yang, yu u, nrung lahkawng tu ai sagu la langai mi, dai hka kau e tsap nga ai; dai nrung lahkawng galu nga timung, langai mi grau galu nna, dai gaw hpang e tu ai nrung rai nga ai.

⁴Dai sagu la gaw sinna de, dingdung de, dingda de daru gasat ai, ngai mu nngai: hpa ashu ashan mung hkap daw lu ai n rai; shi a lata na mawai la lu ai wa mung kadai n nga ai: shi galaw mayu ai hte maren shi galaw nna, shi hkum hpe shagrau shatsaw wu ai.

⁵Dai lam hpe ngai sumru yu nga yang, yu u, namla langai mi gaw sinna maga de na paw pru nna, aga n kabye ai, mungkan ting chyam hkra gat hkawm wu ai: dai namla gaw shi a myi lapran e nja rawng ai nrung langai mi tu nga ai.

⁶Shi gaw nrung lahkawng tu ai hte, hka kau e tsap nga ai sagu la hpang de du nna, shi a n-gun shakun let, shi hpe gat htim wu ai.

⁷Shing rai shi gaw, dai sagu la hte ni wa nna, pawt bu ai hte shi hpe daru dang kau ai hte, de a nrung yan hpe agrawp daw kau ya ai, ngai mu nngai: dai sagu la gaw hkap daw lu ai n-gun n nga ai majaw, namla gaw shi hpe ga de kadawng kau nna, kabye kau wu ai: dai sagu la hpe, shi a lata na mawai la lu ai wa, kadai n nga ai.

⁸Dai rai nna dai namla gaw shi hkum hpe grai shagrau shatsaw wu ai; shi n-gun an yang, dai nrung kaba daw mat lu ai: de a malai, sumsing lamu man mali maga de ang wa ai, nja rawng ai nrung mali tu pru wa ai.

⁹Ya dai mali na langai mi hta nrung kaji langai mi tu pru nna, dai gaw dingda maga de mung, sinpraw maga de mung, reng htum ai mung a maga de mung, nachying galu kaba nga ai.

¹⁰Dai gaw sumsing lamu na zaw nawng zaw wa dep hkra kaba wa nna, dai zaw nawng zaw wa nkau mi hte, shagan ni nkau mi hpe, ga de jahkrat kau nna, kabye anin mu ai.

¹¹Dai hta n-ga, dai nrung gaw, zaw nawng zaw wa ni a madu hpe du hkra, tinang hkum hpe shagrau shatsaw nna, tutnawng nawng ya ai wan nat hkungga hpe shi kaw na dawm la nna, shi a chyoi pra ai shara hpe run kau ya wu ai.

¹²Shing rai tara tawt lai ai lam majaw, dai zaw nawng zaw wa hte tutnawng nawng ya ai wan nat hkungga hpe, de a lata hta ap kau ya ai rai nna, dai nrung gaw tengman ai hpe ga de kabai jahkrat kau ai hte, tinang myit hkrai hkan nna, awng wa ai.

¹³Shaloi chyoi pra ai wa langai mi a ga tsun ai nsen ngai na nngai: bai, chyoi pra ai wa kaga gaw, ga tsun ai chyoi pra ai wa hpe shaga nna, “Dai chyoi pra ai shara hte, zaw nawng zaw wa hpe kabye anin kau ai hkrum hkra, tutnawng nawng ya ai wan nat hkungga hte, jahten shabyak chye ai tara tawt lai ai lam pru ai shingran gaw, gaten du hkra ri na rai ta?” ngu nna san wu ai.

¹⁴Shaloi shi gaw, “Jahpawt shana hkying lahkawng masum tsa lai ai du hkra, rai na ra ai; dai hpang chyoi pra ai shara hpe jasan jaseng na mara ai,” nga nna ngai hpe htan ai.

¹⁵Ya ngai Daniela gaw dai shingran mu nna, de a lachyum tam sawk yu nga yang, yu u, masha nsan ai wa langai mi nye a man e tsap nga ai.

¹⁶Bai Ulai hka hkin-gau lapran na masha nsen ngai na nngai: dai nsen gaw, “Gabriela e, ndai wa hpe ya mu ai shingran chye na shangun u,” ngu nna shaga wu ai.

¹⁷Shing rai dai wa gaw ngai tsap nga ai shara de sit wa ai; shi sit wa yang, ngai hkrit gari nna, gum dagup nga nngai: shi chyawm gaw, “Masha kasha e, chye na u; ndai shingran gaw hpang jahtum na aten hte seng nga ai,” nga nna ngai hpe tsun ai.

¹⁸Ya shi gaw ngai hpe ga tsun yang, ngai ga hta gum dagup let, nawng mat nga nngai: shi chyawm gaw ngai hpe ahtawk nna, jan rai tsap shangun nngai.

¹⁹Shaloi shi gaw, “Yu u, pawt sindawng ai jahtum aten e byin na ra ai lam, ngai nang hpe chye shangun de ga: dai gaw madat da ai, hpang jahtum na aten hte seng nga ai.

²⁰Nang mu ai, nrung lahkawng tu ai sagu la gaw, Medi hte Persi hkawhkam rai nga ai.

²¹Mun mazut tu ai namla gaw Heleni hkawhkam rai nga ai: shi a myi lapran e tu ai nrung kaba gaw, shawng na hkawhkam rai nga ai.

²²Dai nrung daw mat nna, de a malai nrung mali tu pru ai gaw, shawng na mungdan hta mungdan mali tai wa timung, shi a n-gun atsam rawng na n rai, nga ai, rai nga ai.

²³Dai mungdan ni a jahtum ai aten hta, tara tawt lai ai ni a yubak hpring wa yang, n hkru ai myi man man nna, hkalem hkalau ai hku chye hkan ai hkawhkam langai mi paw pru na ra ai.

²⁴Dai wa gaw daru magam rawng timung, shi a n-gun hte n rai; shi gaw jahten shabyak grai chye wa nna, awng wa ai hte shi a myit hkan na ra ai: hpung shingkang rawng ai ni hte, chyoi pra ai amyu hpe, jahten shabyak kau na ra ai.

²⁵Shi a hpaji daw ai a marang e, shi a lata hta hkalem hkalau ai lam awng wa na ra ai: shi gaw shi hkum hpe shagrau shatsaw nna, ndum shami e masha law law hpe jahten shabyak kau na ra ai: dai hta n-ga, madu ni a Madu hpe shi hkap daw na ra ai; rai timung, masha lata hte n re ai, shi agrawp kau ai hkrum na ra ai.

²⁶Dai hta kaga, shana hte jahpawt a lam, madun dan ai shingran ga teng nga ai: rai timung, dai shingran ga hpe naw ip da u; kaning rai nme law, de a lachyum gaw naw na ai nhtoi hte seng nga ai,” nga nna ngai hpe tsun ai.

²⁷Ngai Daniela gaw ma mat nna, tawng marang mi machyi nga nngai: dai hpang ngai rawt nna, hkawhkam a amu hpe gun hpai nngai: dai shingran lam ngai mau nga timung, dai hpe kadai n chye na ma ai.