Read Jinghpaw Hanson Version Bible DANIELA 9 Bible Online

DANIELA 9 - Jinghpaw Hanson Version Bible bible

DANIELA 9

¹Hkalde mung hta hkawhkam tai wa sai, Medi amyu Ahasuru a kasha Dari hkaw dung ai shawng shaning hta e,

²ngai Daniela gaw laika ni hpe sawn yu yang, Yerusalem mare hten byak nna, sanit shi ning lai wa u ga, nga nna myihtoi Yeremia kaw du ai Yehowa a mungga majaw, ndai shaning ni a nambat hpe, ngai chye na lu nngai.

³Dai rai nna ngai gaw, lusha gam nna, lachyit nba bu hpun ai hte, wan dap galu let, Madu Karai Kasang hpe akyu hpyi nna, tawngban ai hte tam nngai.

⁴Ngai gaw nye a Karai Kasang Yehowa hpe akyu hpyi nna tawngban let, “Madu e, nang hpe tsawra nna, na a hkang da ai ga hkan shatup ai ni hpe, ga shaka shagrin da nna, n-gaw nwai ai myit madun ai, galu kaba ai hte hkrit mai ai Karai Kasang e,

⁵anhte yubak galaw saga ai; anhte shut hpyit nga saga ai; anhte n hkru nga ai hte gumlau nna, na a matsun maroi ga hte, na a hkang da ai ga hpe pyi, kau da saga ai:

⁶na a mying gang let, anhte a hkawhkam ni, du ni, ji wa ni hte, mung masha ni mahkra hpe htawn tsun ai, na a shangun ma myihtoi ni a ga hpe mung, anhte n madat kau saga ai.

⁷Madu e, dinghpring ai gaw nang hte seng nga ai: nang hpe shut hpyit ai yubak majaw, shapraw kau ai hkrum nna, ni ai, tsan ai, mung shagu hta bra nga ai, Yuda mung na ni, Yerusalem mare na ni hte, Israela masha ni yawng ngu ai, anhte hte, dai ni rai nga ai hte maren, myi man sum ai hkrai seng nga ai.

⁸Madu e, anhte nang hpe yubak galaw ga ai majaw, anhte a hkawhkam ni, du ni, ji wa ni hte myi man sum ai hkrai seng nga ai.

⁹Matsan dum ai hte yubak raw dat kau ai lam, anhte a Madu Karai Kasang hte seng nga ai: anhte mahtang shi hpe gumlau saga ai.

¹⁰Anhte a Karai Kasang Yehowa gaw, shi a shangun ma myihtoi ni a lata hte, anhte a matu tawn da ai tara hpe hkan nang hkra, shi a nsen hpe, anhte n madat nga ga ai.

¹¹Gaja wa, Israela amyu ting, na a nsen hpe n madat hkra, lam yit mat wa nna, na a tara hpe tawt lai kau masai: dai re ai majaw Karai Kasang a shangun ma Mawshe a tara laika hta ka da sai matsa mawa ga hte dagam dala ga, anhte a ntsa e ru bun nu ai: kaning rai nme law anhte shi hpe yubak galaw saga ai.

¹²Anhte hpe mung, anhte hpe tara dara ai, anhte a tara agyi ni hpe mung, daru ai ga hpe shi shagrin nna, tsin-yam tsindam kaba anhte a ntsa e shapraw nu ai: kaning rai nme law, Yerusalem mare hta byin ai zawn, sumsing lamu npu e kanang n byin yu sai.

¹³Mawshe tara laika hta ka da ai hte maren, ndai tsin-yam tsindam yawng, anhte a ntsa e du sai: rai timung, anhte gaw, anhte a shut hpyit ai lam koi kau nna, na a tengman ai lam hpe chye na lu hkra, anhte a Karai Kasang Yehowa a chyeju hpe lu la na, tawngban saga ai n rai.

¹⁴Dai majaw Yehowa gaw ndai tsin-yam tsindam hpe matsing da nna, anhte a ntsa e shapraw dat nu ai; kaning rai nme law, anhte a Karai Kasang Yehowa gaw, galaw ai amu mahkra hta dinghpring nga ai: anhte mahtang shi a nsen hpe n madat saga ai.

¹⁵Ya chyawm gaw, na a amyu hpe n-gun ja ai lata hte, Egutu mung na shapraw nna, dai ni rai nga ai hte maren, arawng sadang dan hkung ai, anhte a Karai Kasang Madu e, anhte yubak galaw saga ai, tara n lang ai hku hkan nang saga ai.

¹⁶Ya Madu e, na a dinghpring ai myit ting hkan nna, na a pawt sindawng ai hte myit kahtet ai hpe, chyoi pra ai bum ngu ai, na a mare Yerusalem hta na dawm la kau u, ngu nna ngai tawngban nngai: kaning rai nme law, anhte a yubak hte anhte a ji wa ni a shut hpyit ai a majaw, Yerusalem mare hte, na a amyu masha ni gaw, grup yin e de nga ai nlang hte a man e, shatan nhkan shara tai wa sai.

¹⁷Dai re ai majaw, anhte a Karai Kasang e, na a mayam wa a akyu hpyi ai hte tawngban ai ga madat mara ya e; Madu a chyeju jaw e, katsi katsang rai nga ai, na a chyoi pra ai shara ntsa e, na a myi man naw htoi tu shangun u.

¹⁸Nye a Karai Kasang e, na a na kayin nna, madat mara ya e; na a myi hpaw nna, anhte katsi katsang rai nga ai hpe mung, na a mying gang ai mare hpe mung, mada yu u; anhte gaw tinang dinghpring ai hpe hpa nna tawngban ga ai, n rai; na a chyeju myit kaba hpa nna she, tawngban nga ga ai.

¹⁹Madu e, madat mara ya e; Madu e, yubak raw dat kau ya e; Madu e, madat mara nna shabyin ya e; nye a Karai Kasang e, na a chyeju jaw e, hkum ganung et; kaning rai nme law, na a mare mung, na a amyu masha ni mung, na a amying mying nga ma ai,” ngu nna akyu hpyi nngai.

²⁰Ya ngai ga tsun nga nna, akyu hpyi nga let, nye a yubak hpe mung, nye amyu Israela masha ni a yubak hpe mung, yin la nna, nye a Karai Kasang a chyoi pra ai bum a matu, nye a Karai Kasang Yehowa man e akyu hpyi nga yang,

²¹gaja wa, ngai naw akyu hpyi nga yang pyi, shawng na shingran hta dan pru ai, dai wa Gabriela gaw, alawan pyen sa wa nna, shana hkungga nawng ya ai aten e, ngai hpe sa ahtawk nga ai.

²²Dai wa gaw ngai hpe sharin ya ai hte, ngai hpe ga tsun nna, “Daniela e, nang hpe hpaji byeng-ya hte chye chyang ai myit jaw de ga, ngai ya pru sa wa nngai.

²³Nang akyu hpyi hpang yang, htet da ai ga pru nna, nang hpe tsun shana ya na ngai du nngai: nang gaw grai tsawra hkam ai wa rai nga ndai: dai majaw, dai lam sumru yu nna, shingran a lachyum chye na u.

²⁴Tawt lai ai amu hpe shangut na hte, yubak hpe jahtum kau na matu mung, shut hpyit ai a matu gawng malai hkungga nawng ya nna, prat dingsa dinghpring ai hpe jashawn na matu mung, shingran hte myihtoi ga hpe dazik shakap nna, chyoi pra htum ai shara hpe namman chya ya na matu mung, na a amyu hte, na a chyoi pra ai mare ntsa e, nhtoi bat sanit shi, san da nga sai.

²⁵Dai re ai majaw ndai lam chye matsing u: Yerusalem mare hpe bai de shagrin da na ga pru ai shani kaw nna, du ngu ai, namman chya hkam ai wa prat du hkra, nhtoi bat sanit na na ra ai: dai mare gaw ru tsang hkrum ai aten laman e, mare lam ni hte kaduk bai galaw htu ai, nhtoi bat kru shi lahkawng na na ra ai.

²⁶Dai nhtoi bat kru shi lahkawng lai ai hpang, namman chya hkam ai wa gaw sat kau ai hkrum nna, shi hte seng ai gaw n nga na ra ai: dai hpang e du na ra ai hkawhkam masha ni gaw, mare hte chyoi pra ai shara hpe jahten sharun kau nna, de a jahtum ai gaw hka hpungtun rai na ra ai: dai san da ai aten htum hkra hpyen majan hkrai rai nga nna, marawng marang tai mat na ra ai.

²⁷Bai shi gaw, nhtoi bat mi e, masha law law hte ngang ai ga shaka tawn da nna, dai bat mi a ka-ang shani e, hkungga nawng ya ai hte shadung kumhpa hpe, hkum kau na ra ai: jahten shabyak kau ai wa langai mi, matsat shabat re ai singkaw hta pyen du timung, aten du jang, san tawn da ai ari hte, pawt sindawng ai gaw, jahten shabyak kau ai wa a ntsa e ru bun na ra ai,” nga nna ngai hpe tsun ai.