Read Jinghpaw Hanson Version Bible HOSEA 10 Bible Online

HOSEA 10 - Jinghpaw Hanson Version Bible bible

HOSEA 10

¹“Israela gaw asi si ai, ring ai tsabyi ru rai nga ai: asi law ai made, shi gaw tawn hkungri ni hpe shalaw wu ai; shanhte a mungdan mai kaja ai hte maren, shanhte gaw tsawm ai shadaw sumla ni hpe sharawt ma ai.

²Shanhte a myit masin bra nga ai; ya shanhte gaw mara kap na mara ai; shi gaw shanhte a tawn hkungri ni hpe run kau nna, shadaw sumla ni hpe agrawp kau na ra ai.

³Gaja wa, shanhte gaw, Anhte Yehowa hpe n hkrit hkungga ai majaw, anhte hkawhkam n lu ga ai; hkawhkam lu timung, shi anhte a matu hpa galaw lu na rai ta? nga nna ya tsun na mara ai.

⁴Shanhte gaw ga kaman tsun nna, ga shaka tawn da yang, masu ai hku dagam ma ai: dai re ai majaw, hkauna lawk e tu ai mana hpun zawn, dawdan ai lam alawan du na ra ai.

⁵Samari masha ni gaw, Bet-awen a dumsu kasha a majaw, hkrit gari na mara ai: kaning rai nme law, de a hpung shinghkang hkoi mat ai majaw, mung masha ni hte, dai hta sharawng awng nga ai sumla hkinjawng ni gaw, yawn hkyen hkrum na mara ai.

⁶Dai hpe pyi, Asuri mung de la sa nhtawm, hkawhkam Yarib hpe kumhpa sak jaw na mara ai: Ehprim gaw arawng sum nna, Israela gaw tinang hpaji daw ai majaw, kaya dum na ra ai.

⁷Samari mung hte de a hkawhkam wa gaw, hka ntsa na jahpaw zawn rai nga ai.

⁸Israela yubak a npawt Awen mung, run kau ai hkrum na ra ai: de a tawn hkungri ni a ntsa e, ju hpun hte tsing tu lim kau nna, mare masha ni gaw, ‘Bum ni e, anhte hpe ka-up mi, kawng ni e, anhte a ntsa e hkrat bun mi,’ nga nna shaga na mara ai.”

⁹“Israela e, nang gaw Gibea aprat kaw nna, yubak galaw nit dai; dai yang e shanhte naw tsap nga ma ai: hpyen gasat ai gaw, n hkru n hkra ai kashu kasha ni hpe Gibea mare hta e naw dep na, n rai ni?

¹⁰Ngai galaw mayu yang, ngai shanhte hpe shari na nngai: shanhte a yubak amyu lahkawng hta manoi nga yang, masha amyu ni shanhte hpe wang tawn na mara ai.

¹¹Ehprim gaw ni nna, mam kabye ra ai upra rai nga timung, ngai gaw shi a du bau ntsa e, kandang mara na nngai: Ehprim a du hta jawn ai wa ngai shalun na nngai; Yuda gaw hkaibang galau nna, Yaku gaw masit na ra ai.”

¹²“Tinang a matu dinghpring ai nli gat mu, chyeju nsi naisi shu la mu; jahkam da ai yi hkauna ni hpe galau mu: Yehowa sa nna, nanhte a ntsa e dinghpring ai marang jahtu ai du hkra, shi hpe tam na aten ya rai nga ai.

¹³Nanhte gaw tara n lang ai galau hkai nna, n hpru n mai ai hpe dan la manit dai; masu magaw nsi naisi nanhte sha manit dai: kaning rai nme law, nang gaw tinang hkan ai lam hte, law la ai share ninghkrin ni hta, kam hpa nga ndai.

¹⁴Dai re ai majaw, na a amyu masha ni gaw, kabring kabrawng rai wa nna, hpyen majan gasat ai shani hta, Shalman gaw Betarbela hpe run kau ai hte maren, na a hpyen dap ni yawng, run kau ai hkrum na ra ai: kanu gaw kasha ni hte rau adit kau ai hkrum masai.

¹⁵Shing rai, nanhte a law la ai yubak majaw, Betela mare hta e dai zawn nanhte hkrum na marin dai: Israela hkawhkam gaw jahpawt nhtoi mahka e, atsai awai jahtum kau ai hkrum na ra ai.”