Read Jinghpaw Hanson Version Bible HOSEA 12 Bible Online

HOSEA 12 - Jinghpaw Hanson Version Bible bible

HOSEA 12

¹“Ehprim gaw, masu matsa ga hte, Israela dap gaw, hkalem hkalau ai hte, ngai hpe wang tawn nga ai; Yuda chyawm gaw, Karai Wa hte naw up nga lu nna, Chyoi Pra ai Wa hte, kangka rai nga ai.

²Ehprim gaw nbung hpe sha nna, sinpraw nbung hpe hkan shachyut nga ai: shi gaw masu matsa ai ga hte hten byak ai lam ni hpe, shani shagu shalaw dat nga ai; shanhte gaw Asuri hkawhkam wa hte ga shaka tawn da nna, Egutu mung de asau la sa ma ai.

³Yehowa Yuda hte ndang kalang hkat shara naw nga nna, shi gaw Yaku hpe, shi a arawn alai hte maren, ari jaw na ra ai; shi galaw ai amu hte maren, matai dawp na ra ai.

⁴Yaku gaw kanu a hkritung e, kahpu a lahtin jum nga ai; shi n-gun an wa yang, Karai Kasang hte kamu hkat wu ai:

⁵gaja wa, shi gaw lamu kasa hte kamu hkat nna, dang kau nu ai: shi hkrap ngu hkrap ngoi nna, shi hpe tawngban nu ai;

⁶Zaw nawng zaw wa up ai Yehowa gaw, Betela shara e shi hpe mu hkrup nna, dai yang e anhte hte ga tsun nga ai: shi a masat dingsat amying gaw Yehowa rai nga ai.

⁷Dai re ai majaw, na a Karai Kasang hpang de nhtang wa nu: matsan dum ai hte tara ding ai lam hkan nang nna, na a Karai Kasang hpe tutnawng myit mada nga u.”

⁸“Shi gaw Hkanan masha rai nga ai; n man ai joi shi lang nga ai: maw sha map sha ai amu, shi sharawng nga ai.

⁹Ehprim chyawm gaw, ‘Gaja wa, ngai sut su nngai; ngai arung arai mahkawng da nngai; rai timung, ngai shakut sharang ai amu mahkra hta, yubak ngu ai n shawp ai hpe, ngai hta mu lu na, n rai,’ nga nna tsun nga ai.

¹⁰Rai timung, ngai Yehowa gaw, Egutu mung na nang hpe shapraw la ai Karai Kasang rai nga nngai: madat da ai poi shani e nga ai zawn, ngai nang hpe sum hta, bai nga shangun lu na nngai.

¹¹Ngai gaw myihtoi ni hpe ga tsun ni ai; shingran law law hpe ngai madun ni ai; myihtoi ni a n-gup hte ga shadawn hku tsun nngai;

¹²Gilead mung, n shawp ai amu galaw ai rai yang, dai gaw be be kaman sha tai na ra ai: Gilgala hta usu nawng ya ai rai yang, shanhte a tawn hkungri ni gaw, yi hkauna hta dawng ai nlung sumpum zawn, tai na ra ai.”

¹³“Yaku gaw Suri mung de hprawng wa sai; Israela gaw num lu la hkra mayam tai nna, sagu rem nga ai.

¹⁴Yehowa gaw Israela hpe, myihtoi a lata hte Egutu mung na woi wa nna, myihtoi a lata hte bau sin hkrum nga ai.

¹⁵Ehprim gaw ngai hpe aja awa pawt bu shangun ni ai; dai re ai majaw, shi jahkaw kau ai sai, shi hta kap nna, shi shatan nhkan ai ga, shi a Madu gaw shi hpe nhtang jaw na ra ai.”