Read Jinghpaw Hanson Version Bible HOSEA 13 Bible Online

HOSEA 13 - Jinghpaw Hanson Version Bible bible

HOSEA 13

¹“Ehprim gaw ga tsun yang, masha ni hkrit gari nga ma ai; shi gaw Israela hta grau htum ai wa rai nga ai: rai timung, shi gaw Bala hpara hte shut yang, shi si wa sai.

²Ya shanhte gaw yubak je je galaw nna, tinang nyan hkan let, tinang a gumhpraw hte jaw ai hpara sumla galaw ma ai: yawng hte gaw lasama amu hkrai rai nga timung, shanhte gaw dai sumla ni hpe ga tsun nna, hkungga nawng ya ai wa gaw, dumsu kasha ni hpe pup nga a hka!

³Dai re ai majaw shanhte gaw, jahpawt manap na sumwi, jau jau e hkoi mat ai mari, bungsha hte hkoi mat ai mam chyarang na nbun, wan htung na pru ai wan hkut zawn, tai mat na mara ai.”

⁴“Rai timung, ngai Yehowa gaw, Egutu mung na nang hpe shapraw la ai Karai Kasang rai nga nngai; ngai hta shaje Karai Kasang hpe, nang n chye nu ai: ngai hta kaga, hkye hkrang la ai wa n nga ai.

⁵Hkun hkraw ai shara ngu ai, nam mali e, ngai nang hpe chye ni ai.

⁶Shanhte a udat shara law ai majaw, hkru kat ma ai: hkru kat ma yang, shanhte myit kaba nna, ngai hpe, malap kau ma ai.

⁷Dai re ai majaw, ngai shanhte a matu, hkanghkyi zawn rai nga nngai; rawnggawk zawn, lam makau e gyam yu na nngai.

⁸Kasha mat ai tsap kanu zawn, ngai shanhte hpe hkap shadang nna, shanhte a myit masin a sap sanap ashep kau na nngai: ngai gaw dai yang e hkanghkyi yi zawn shanhte hpe kawa sha kau na nngai; matse labye ni shanhte hpe amya sha kau na mara ai.”

⁹“Israela e, nang hpe karum ai wa, ngai hte nan, nang nhtan shai nga ai gaw, nang hpe jahten shabyak ai lam rai nga ai.

¹⁰Na a hkawhkam wa gaw, mare shagu hta nang hpe hkye hkrang la lu hkra, ya kanang rai nga a ta? Anhte hpe hkawhkam hte du jaw mi, nga nna nang hpyi ai tara agyi ni gaw, kanang rai nga ma ta?

¹¹Ngai pawt bu ai hte, nang hpe hkawhkam jaw ni ai; nye a n-yun bu ai hte, shi hpe dawm la se ai.

¹²Ehprim a shut hpyit ai hpe, ngai makai da nna, shi a yubak hpe, mahkawng da ni ai.

¹³Shinggyim machyi ai num zawn, shi yawn hkyen hkrum na ra ai; shi gaw gam n rawng ai kasha rai nga ai: shangai nhtoi gu timung, madang nga ai ma rai nga ai.

¹⁴Shing rai ngai gaw shanhte hpe katsan ga de na mawai la na rai ni? si hkrung si htan kaw na, gare la na rai ni? Si hkrung si htan e, na a ana zinli, kanang nga a ta? Katsan ga e, nang shapraw ai tsin-yam tsindam, kanang nga a ta? myit malai na lam, ngai n mu nngai.”

¹⁵“Shi gaw shi a kahpu kanau ni hta mayat maya wa timung, sinpraw nbung du na ra ai; Yehowa a nbung zaibru jang de na bung wa nna, shi a hka hpawk hkyet mat ai hte, shi a hka npun hkraw mat na ra ai: hpyen wa gaw shi a sutdek hta na hpu ai baw arung arai mahkra hpe kashun la na ra ai.

¹⁶Samari gaw tinang a Karai Kasang hpe gumlau ai majaw, mara kap na ra ai: shanhte gaw ri nhtu hte kadawng si na mara ai: ma kaji ni gaw, adit kau ai hkrum nna, na-um nasin re ai num ni, ahkri ga kau ai hkrum na mara ai.”