Read Jinghpaw Hanson Version Bible HOSEA 6 Bible Online

HOSEA 6 - Jinghpaw Hanson Version Bible bible

HOSEA 6

¹“Sa marit, Yehowa hpang de bai wa ga; shi amya kau timung, bai shamai ya na mi ai; jahpye kau timung, nma kayawp ya na mi ai.

²Ni ni lai yang, shi anhte hpe shalan shabran ya nna, masum ya rai yang anhte hpe bai sharawt ai hte, shi a man e, anhte hkrung nga na ga ai.

³Anhte chye na lu ga; Yehowa hpe chye lu hkra hkan tam ga: jahpawt manap teng teng du ai zawn, shi du pru na ra ai; shi anhte hpang de, marang shaya hte, lamu ga hpe madit ai marang shadoi zawn, du na ra ai.”

⁴“Ehprim e, ngai nang hpe kaning di na rai ta? Yuda e, ngai nang hpe kaning di na rai ta? Nan a chyeju dum ai myit gaw, jahpawt manap sumwi hte, jau jau e hkoi mat ai mari zawn, rai nga ai.

⁵Dai re ai majaw ngai shanhte hpe, myihtoi ni a ga hte kahtum gadaw di kau ni ai; nye a n-gup na pru ai ga hte shanhte hpe sat kau ni ai: ngai jeyang ai lam gaw, htoi tu ai nhtoi zawn, rai nga ai.

⁶Kaning rai nme law, hkungga jaw ai lam n rai, chyeju dum ai lam, wan nat hkungga hta Karai Kasang hpe chye chyang ai lam, ngai tsaw nga nngai.

⁷Rai timung, shanhte gaw Adam zawn, ga shaka hpe tawt lai kau manu ai: dai yang e shanhte gaw, myit magaw ai hku, ngai hpe di kau ma ni ai.

⁸Gilead mare gaw, n shawp ai amu galaw ai ni a mare rai nga ai; sai galu ai lagaw hkang hkrai rai nga ai.

⁹Damya hpung ni gaw, masha hpe gyam ai zawn, hkinjawng hpung ni gaw, Shehkem de sa wa ai lam hta, masha hpe sat kau ma ai: gaja wa, shanhte gaw sawse lawklek ai amu galaw ma ai.

¹⁰Israela nta kata e matsat shabat amu ngai mu nngai; Ehprim amyu gaw shawa num tai nna, Israela gaw awu asin di kau ai hkrum sai.

¹¹Yuda e, nye a amyu masha ni hpe bawng dung ai kaw na ngai nhtang wa shangun yang, na a matu mung, shu la na nsi naisi san da nga ai.”