Read Jinghpaw Hanson Version Bible HOSEA 7 Bible Online

HOSEA 7 - Jinghpaw Hanson Version Bible bible

HOSEA 7

¹Ngai gaw Israela hpe shamai ya mayu yang, Ehprim a n shawp ai hte, Samari n hkru ai lam dan pru nga ai; kaning rai nme law, shanhte gaw masu matsa lam hkan nna, lagu lagut wa kata de shang ai hte, damya hpung ni, shinggan de hpya lu hpya sha ma ai.

²Shanhte a n hkru ai amu mahkra hpe ngai matsing nga nngai, shanhte gaw tinang a kraw e n dum ma ai: ya e pyi tinang a amu ni gaw, shanhte hpe wang tawn nga ai; shanhte gaw nye a man e nga nga ma ai.

³Shanhte gaw tinang a n kaja ai amu hte, hkawhkam wa hpe, tinang a masu ai ga hte, du ni hpe, shapyaw nga ma ai.

⁴Shanhte yawng num shaw la shaw ai ni rai nga ma ai: shanhte gaw muk kabaw ai wa kahtet shangun ai wan htung hte bung nga ma ai: shi gaw shadung gumchya nna, muk wawm ai du hkra, dai wan hpe shagrung ra ai, n rai.

⁵Anhte a hkawhkam wa a poi shani hta e, du ni gaw nhpat hkra tsabyi jahku hte nang ma ai; shi gaw n kaw n law re ai ni hpe hkap hkalum la nga ai.

⁶Gaja wa shanhte gaw, gyam yu nga let, tinang myit hpe wan htung zawn kahtet shangun mu ai: shanhte a muk kabaw ai wa gaw, shana tup yup nga timung, dai gaw jahpawt manap e wan shinglet zawn grung nga ai.

⁷Shanhte nlang hte gaw, wan htung zawn kahtet nga nna, tinang a tara agyi ni hpe hkru kau manu ai; shanhte a hkawhkam ni yawng, kadawng mat masai: shanhte hta na, ngai hpe shaga ai wa langai mi n nga ai.

⁸Ehprim gaw maigan amyu ni hte kayau nga ai; shi gaw, maga sha kabaw nna, n galau ai muk pa rai nga ai.

⁹Tsasam masha ni gaw shi a n-gun sha kau timung, shi dai lam n chye nga ai: shi a baw hta kara ahpraw kayau kaya tu pru timung, shi dai lam n chye nga ai.

¹⁰Israela a gumrawng gumtawng ai gaw, tinang a man e dawdan ai sakse tai timung, shanhte gaw dai daram hkrum ninglen, tinang a Karai Kasang Yehowa hpang de n wa ai hte, shi hpe n tam ma ai.

¹¹Ehprim gaw myit n rawng ai. angawk ai hkrudu hte bung nga ai: shanhte gaw Egutu hpe shaga, Asuri mung de sa wa ma ai.

¹²Shanhte sa wa ma yang, nye a sumgawn hte ngai shanhte hpe ka-up na nngai: ntsa malen u hpe zawn, ngai shanhte hpe ga de jahkrat kau na nngai: shanhte a zuphpawng hta na ma ai hte maren, ngai shanhte hpe ari jaw na nngai.

¹³Shanhte ngai kaw na pru mat wa ai majaw, dingnye lu mu ga; ngai hpe shut hpyit ai majaw, hten byak hkrum mu ga: ngai shanhte hpe shaw la mayu timung, shanhte nye a lam masu ga tsun nga ma ai.

¹⁴Shanhte gaw tinang yup ku ntsa e hpyi jahtau timung, tinang myit masin hte ngai hpe n shaga ma ai: nai mam hte tsabyi jahku lu la na matu, shanhte zuphpawng nna, ngai hpe gumlau ma ai.

¹⁵Shanhte a lata hpe ngai sharin ya nna, n-gun shaja timung, shanhte gaw nye a lam hkalem ai hku maw ma ai.

¹⁶Ntsa e dung ai wa hpang de, shanhte nhtang wa ma ai, n rai: shanhte gaw n ding ai ndan hte bung ma ai; du ni a shinglet grang ai ga tsun ai majaw, shanhte gaw nhtu hte si na mara ai: dai gaw Egutu mung hta e, shanhte hkrum na asawng asang lam rai nga ai.