Read Jinghpaw Hanson Version Bible HOSEA 9 Bible Online

HOSEA 9 - Jinghpaw Hanson Version Bible bible

HOSEA 9

¹“Israela e, masha amyu ni zawn, kabu gara ai myit hkum madun et; kaning rai nme law, nang gaw na a Karai Kasang hpe shinggan kau let, shawa num tai nga ndai; nang gaw chyarang shagu hta shawa num shabrai hpyi sha ndai.

²Mam chyarang hte tsabyi si htumbyen, shanhte a asak hpe bau lu na, n rai; shi gaw, tsabyi ningnan mung lu na, n rai.

³Shanhte gaw Yehowa a mungdan hta shanu lu na, n rai; Ehprim gaw Egutu mung de nhtang wa nna, shanhte gaw Asuri mung hta e, n san n seng ai shahpa sha na mara ai.

⁴Shanhte gaw Yehowa a matu, tsabyi jahku dumhpung ru jaw lu na, n rai, dai hta shi awng sharawng lu na, n rai; shanhte a shagu hkungga gaw, sharung shayawt ai ni a shahpa hte bung na ra ai; sha ai ni yawng awu asin hkrum na mara ai: shanhte a shahpa hpe, tinang hkrai sha mu ga; dai gaw Yehowa a nta hta shawn lu na, n rai.

⁵Madat da ai zuphpawng hte, Yehowa a poi shani e, nanhte kaning rai galaw na myit ta?

⁶Kaning rai nme law, yu mu, hten byak ai kata na, shanhte pru wa masai; rai timung, Egutu mung hta shanhte hpawng nga nna, Memhpi mare hta lup kau ai hkrum na mara ai: gumhpraw hte shatsawm ai arai ni hpe, tsamat tu lim kau na ra ai: shanhte a janghpang ni hta ju hpun tu na ra ai.

⁷Ari jaw na aten du sai; matai htang na shani du sai; Israela amyu chye lu na ra ai: na a law la ai shut hpyit ai hte, ladu lai ai n dawng n yawt myit majaw, myihtoi wa gaw angawk ai wa, wenyi shung ai wa mana bu ai wa, tai nga ai.

⁸Ehprim gaw, tinang a Karai Kasang a sin langa tai yu sai: myihtoi wa gaw, lam shagu hta mahkam hkrum nna, shi a Karai Kasang a nta hta, n dawng n yawt ai hkrai rai nga ai.

⁹Gibea mare a aprat e zawn, shanhte gaw tinang hkum hpe grai awu asin di kau manu ai: shi gaw shanhte a shut hpyit ai hpe dum nna, shanhte a yubak majaw, ari jaw na ra ai.”

¹⁰“Ngai gaw, zaibru jang e tu ai tsabyi si zawn, Israela hpe mu hkrup nngai; shawng si ai lakum hpun hta shawng myin ai lakum si zawn, nanhte a nji nwa ni hpe, ngai mu mada nngai: rai timung shanhte gaw, Bala-peora hpang de sa nna, tinang hkum hpe kaya kahpa lam hta ap kau nhtawm, tinang ra ai hpara hte maren, matsat shabat hkum tai wa masai.

¹¹Ehprim a arawng sadang gaw, u zawn pyen mat na ra ai; shangai chyinghkai n nga, gawngli ai mung n pra, kasha shaprat ai kata na ra ai.

¹²Kasha ni hpe bau maka timung, langai mi n ngam hkra, ngai shanhte hpe dawm la kau na nngai: gaja wa, ngai shanhte hpe kau da yang, shanhte dingnye hkrum sha mu ga.

¹³Ehprim gaw, ngai mu ai hte maren, Turu mare zawn, ngwipyaw ai shara hta dè nga timung, shi gaw tinang a kashu kasha ni hpe, sat kau ai wa a lata hta, sa ap ya na ra ai.

¹⁴Yehowa e, shanhte hpe jaw mu: nang hpa jaw na n ni? gawng n li ai kan, chyu n pru ai madoi chyu hpang, shanhte hpe jaw mu.

¹⁵Shanhte a n hkru n hkra ai a npawt yawng, Gilgala mare hta rai nga ai; dai yang e ngai shanhte hpe n dawng n yawt nngai: shanhte a n hkru n hkra ai a amu majaw, ngai shanhte hpe nye a nta na shachyut kau na nngai: htawm hpang e shanhte hpe tsawra na, n rai: shanhte a du ni yawng, gumlau ni rai nga ma ai.

¹⁶Ehprim gaw ahtu adep hkrum ai majaw, tinang aru hkraw mat nna, asi n si lu ma ai; kasha shangai timung, tsawra htum ai kasha ni hpe, ngai sat kau na nngai.

¹⁷Nye a Karai Kasang a ga hpe n madat ai majaw, shi shanhte hpe kau da nna, shanhte gaw maigan amyu ni hta, brak hkawm ai ni tai na mara ai.”