Read Jinghpaw Hanson Version Bible YOELA 2 Bible Online

YOELA 2 - Jinghpaw Hanson Version Bible bible

YOELA 2

¹Ziun mare hta e, pahtau dum mu; nye a chyoi pra ai bum ntsa e garu jahtau mu; mung masha ni yawng hkrit gari nga mu ga; kaning rai nme law, Yehowa a nhtoi du ra ai, dai gaw ni magang ra ai:

²dai nhtoi gaw nsin sin ai hte sin mak nna, sumwi mung ai hte chyang htat ai nhtoi, rai nga ai; bum ni a ntsa e jahpawt manap nhtoi pri rai nga ai zawn, law la ai hte n-gun atsam rawng ai amyu du ra ai: dai zawn re ai gaw, shawng de galoi n byin yu ai; shanhte a hpang e mung, prat shaning law law du hkra, byin yu na n rai.

³Shanhte a shawng e wan hkru nga ai, shanhte a hpang e wan shinglet grung nga ai: mungdan gaw, shanhte a man e Eden sun zawn rai nga nna, shanhte lai ai hpang, katsi katsang re ai zaibru jang, tai nga ai: gaja wa, shanhte a lata na lawt lu ai, hpa mung n nga ai.

⁴Shanhte a hpraw nsam gaw gumra hte bung nna, shanhte gaw gumra jawn ai ni zawn, gat nga ma ai.

⁵Dai ni gaw, bum pungding ntsa e, ngoi ai hpyen leng zawn, yi hku hkru ai wan shinglet zawn, hpyen htim na matu hkyen tawn ai n-gun ja ai amyu zawn, wu nna, gumtawng shingtawt nga ma ai.

⁶Shanhte a man e masha amyu ni myit htum mat nna, myi man yawng chyang mat nga ai.

⁷Shanhte gaw share ninghkrin zawn gat nna, hpyen masha zawn, mare bunghku hpe lung ma ai; langai hte langai n shai ai, tinang lam ang ang hkan sa ma ai.

⁸Kadai mung manang wa hpe n hkra ai; tinang lam tinang hkan hkawm ma ai: ri nhtu hkra timung, hkala nba n hkrum ma ai.

⁹Dai ni gaw mare ntsa e shingtawt hkawm ma ai; mare bunghku ntsa e gat hkawm ma ai; nta ni hta lung shang ma ai; lagu lagut zawn, hkuwawt hku shang bang wa ma ai.

¹⁰Dai ni a man e lamu ga ashun awam nga ai; sumsing lamu ni gari nga ai; ajan hte shata sin mat nna, shagan ni a nhtoi mat ma ai:

¹¹Yehowa gaw shi a luksuk ni a man e, shi a nsen sharawt nga ai; shi a hpyen dap gaw, nachying gaba nga ai; shi a mungga hpajang ai wa gaw, n-gun ja nga ai: kaning rai nme law, Yehowa a nhtoi gaw, galu kaba ai hte grai hkrit mai ai nhtoi rai nga ai; kadai wa hkam lu na rai ta?

¹²Ya rai timung, Yehowa gaw, Lusha gam let, hkrap ngu hkrap ngoi nna, sharung shayawt let, nanhte a myit masin mahkra hte ngai hpang de nhtang wa marit:

¹³nanhte a hpun palawng n rai, myit masin hpe gang je kau nna, nanhte a Karai Kasang Yehowa hpang de bai wa marit: shi gaw matsan dum ai hte chyeju jaw ai myit, galu kaba ai hte n gaw nwai ai myit, rawng nna, ari jaw na lam myit malai nga ai.

¹⁴Nanhte a Karai Kasang Yehowa hpe, lusha kumhpa hte dumhpung hkungga, naw nawng ya lu hkra, shi myit malai lu nna, nanhte hpang de nhtang wa let, shaman ai chyeju nanhte hpe n gam jaw na, kadai wa chye lu a ta? nga nna tsun ai.

¹⁵Ziun mare hta e, pahtau dum mu; lusha gam ai aten san da mu; shawa hpawng zuphpawng mu:

¹⁶mung masha ni hpe jahpawng mu, shawa hpung hpe shachyoi shapra mu; dingla ni hpe jahpawng mu; ma kaji ni hte chyu chyu ai ni hpe hpawng shangun mu: la ningnan wa gaw shi a gawk kaw na, num ningnan gaw shi shim ai shara kaw na, pru mu ga.

¹⁷Yehowa a amu gun hpai ai hkinjawng ni gaw, nta jan hte tawn hkungri lapran e hkrap ngu hkrap ngoi let, Yehowa e, na a amyu hpe matsan dum e law maigan amyu ni anhte a ntsa e up nga nna, na a sali wunli masha ni aroi arip hkrum hkra, shanhte a lata hta anhte hpe hkum ap kau et: Shanhte a Karai Kasang kanang nga a hka? Nga nna masha amyu ni hta, hpa majaw tsun shajang na ma ta? nga nna tsun mu ga.

¹⁸Shaloi Yehowa gaw shi a mungdan a lam lahpawt lama dum nna, shi a amyu masha ni hpe matsan dum nga ai.

¹⁹Dai hta kaga Yehowa gaw shi a amyu masha ni hpe htan nna, Yu mu, ngai gaw nanhte hpang de nai mam, tsabyi jahku hte sau shangun dat nna, nanhte hkru kat na marin dai: maigan amyu ni hta, ngai nanhte hpe, htawm hpang de aroi arip jahkrum na, n rai:

²⁰dingdung maga na luksuk laba ni hpe, ngai nanhte kaw na tsan tsan de jahtaw kau nna, akrin akraw hte katsi katsang re ai mung de, shachyut kau na nngai: dai ni a man maga sinpraw nawng de, shingdu maga sinna nawng de dep nna, de a manam ai hte hpu hkying ai gaw mawng pru na ra ai: kaning rai nme law, Yehowa amu kaba galaw nu ai.

²¹Mungdan e, hkum hkrit et; kabu gara ai hte sharawng awng nga u: kaning rai nme law, Yehowa gaw amu kaba galaw nu ai.

²²Pa ga na ashu ashan ni e, hkum tsang myit; kaning rai nme law, nam mali na udat shara ni tu prut nga ai; namsi hpun ni si si nga ai; lakum hpun hte tsabyi ru ni, ja kat nga ma ai.

²³Dai rai nna, Ziun a kashu kasha ni e, kabu gara nga mu; nanhte a Karai Kasang Yehowa hta, sharawng awng nga mu: kaning rai nme law, shi gaw marang nhpaw hpe, ram ai hte maren, nanhte hpe jaw manit dai; gaja wa shi gaw, shawng shata kaw nna, marang nhpaw hte marang shadoi nanhte a ntsa e jahtu nu ai.

²⁴Shing rai mam chyarang ni hkaulan mam hte hpring nna, htumbyen ni tsabyi jahku hte asau kabrat na ra ai.

²⁵Ngai nanhte hpang de shangun dat ai, nye a hpyen luksuk kaba ngu ai, dinggam-yaw, hkakrit, shingchyut hte shingtai sha kau ai shaning ni, ngai nanhte hpe bai hkin ya na nngai.

²⁶Shaloi nanhte gaw lusha law nna, hkru hkru kat kat sha let, nanhte hte mauhpa amu galaw ai, nanhte a Karai Kasang Yehowa a mying ningsang hpe shakawn kungdawn na marin dai; nye a amyu masha ni mung, htawm hpang de kaya kahpa galoi n hkrum na masai.

²⁷Dai hta n-ga, ngai gaw Israela amyu ka-ang e rai nga ai mung, ngai nanhte a Karai Kasang Yehowa rai nga nna, ngai hta shaje n nga ai mung, nanhte chye lu na marin dai: nye a amyu masha ni mung, htawm hpang de kaya kahpa galoi n hkrum na masai.

²⁸Dai hte a hpang e ngai gaw, ashan yawng a ntsa e nye a Wenyi hpe ru jaw nna, nanhte a shayi shadang sha ni myihtoi htoi na mara ai; nanhte a dingla ni yup mang mu na mara ai; nanhte a brang ram ni shingran mu na mara ai;

²⁹rai sa, dai nhtoi hte yawng, nye a nchyang la ni hte, nye a nchyang jan ni a ntsa e mung, nye a Wenyi hpe, ngai ru jaw na nngai.

³⁰Sumsing lamu hta e mung, ginding aga ntsa e mung, mauhpa amu ngu ai, asai, awan hte wan hkut shadaw hte hpe, ngai madun na nngai.

³¹Galu kaba re ai hte, hkrit mai ai, Yehowa a nhtoi garai n du yang, ajan hpe nsin hte, shata hpe asai hte, galai kau na ra ai.

³²Dai shaloi e, Yehowa a mying ningsang hpe gang shaga ai wa kadai mung, mawai hkrang la ai kaw du na ra ai: kaning rai nme law, Yehowa tsun da sai hte maren, Ziun bum hte Yerusalem mare hta e, shanglawt ni nga nga na mara ai; naw ngam nga ai ni hta, Yehowa shaga la ai ni, lawm na mara ai.