Read Jinghpaw Hanson Version Bible AMO 2 Bible Online

AMO 2 - Jinghpaw Hanson Version Bible bible

AMO 2

¹Yehowa ning nga ai: Moba a yubak masum hta n-ga, yubak mali majaw, ngai ari n jaw ai, nga na n rai: kaning rai nme law, shi gaw Edom hkawhkam a nrut nra ni hpe, namhtun ju nga ai:

²dai rai nna ngai gaw, Moba ntsa e wan jahkrat nna, Keriot a htingnu ni hkru mat na ra ai: Moba gaw, wu kadu ai, garu jahtau ai, pahtau dum ai hte rau, si mat na ra ai;

³de a ka-ang e tara agyi wa hpe ngai jahtum kau nna, shi hte rau du ni yawng hpe, sat kau na nngai, nga nna Yehowa tsun ai.

⁴Yehowa ning nga ai: Yuda a yubak masum hta n-ga, yubak mali majaw, ngai ari n jaw ai, nga na n rai: kaning rai nme law, shanhte gaw Yehowa a tara hpe kau da nna, shi a matsun maroi ga hpe, hkan nang ma ai, n rai; shanhte a kaji kawa ni hkan nang yu ai masu ga gaw, shanhte hpe mung shut kau shangun mu ai:

⁵dai rai nna ngai gaw, Yuda ntsa e wan jahkrat nna, Yerusalem a htingnu ni hkru mat na ra ai.

⁶Yehowa ning nga ai: Israela a yubak masum hta n-ga, yubak mali majaw, ngai ari n jaw ai, nga na n rai: kaning rai nme law, shanhte gaw, dinghpring ai wa hpe gumhpraw hte, matsan mayan wa hpe kyepdin man mi hte, dut kau ma ai;

⁷shanhte gaw matsan mayan ni a baw hpe, ga nhpu hte magap kau na ndawt nga nna, sumnung ai ni a lam hpe shanut kau ma ai; nye a chyoi pra ai amying ningsang awu asin hkrum hkra, kawa hte kasha gaw mahkawn langai sha hte jawm kanawn ma ai:

⁸shanhte gaw tang da ai nba hpe tawn hkungri shagu makau e nep nna yup ma ai: shawa la ai gumhpraw hte mari ai tsabyi jahku hpe, shanhte a Karai Kasang a nta hta lu ma ai.

⁹Rai timung ngai gaw, arit hpun hte maren tsaw nna, wamyi hpun zawn ja ai Amori masha ni hpe, shanhte a man e shaza kau ni ai: gaja wa, ndung de na asi hpe mung, npawt de na aru hpe mung ngai shaza kau nngai.

¹⁰Amori masha ni a mungdan hpe madu lu na matu, ngai nanhte hpe Egutu mung na woi shapraw nna, mali shi ning tup, nam mali hkan e woi lakawn wa nngai.

¹¹Nanhte a kasha ni hta na, myihtoi, nanhte a shabrang ni hta na, Nazari masha, ngai shatai ni ai. Israela kashu kasha ni e, ndai lam rai nga ai, n rai ni? nga nna Yehowa san ai.

¹²Nanhte chyawm gaw Nazari masha ni hpe tsabyi jahku lu shangun nna, myihtoi ni hpe, Myihtoi hkum htoi myit, nga nna jet myit dai.

¹³Yu mu, hkauling hte hpring ai leng, li dip nga ai hte maren, nanhte a shara hta, ngai nanhte hpe dip na nngai.

¹⁴Larau ladau re ai ni, hprawng lu na n rai; n-gun ja ai ni, tinang a n-gun dat lu na, n rai; share wa gaw, tinang a asak hpe hkrang la lu na, n rai:

¹⁵ndan lang ai wa mung, tsap nga lu na n rai; grai chye gat ai wa gaw, lawt lu na n rai; gumra jawn ai wa mung, tinang a asak hpe hkrang la lu na n rai;

¹⁶share ninghkrin ni hta nden grau ja ai wa gaw, dai shani hta e, singgu krin hprawng na ra ai, nga nna Yehowa tsun ai.