Read Jinghpaw Hanson Version Bible AMO 3 Bible Online

AMO 3 - Jinghpaw Hanson Version Bible bible

AMO 3

¹Israela kashu kasha ni e, Mungdan ting na amyu ni mahkra hta, nanhte hpe hkrai ngai chye nga nngai majaw, nanhte a shut hpyit ai nlang hte hpe, ngai nanhte a ntsa e du shangun na nngai,

²nga nna Egutu mung na woi shapraw ai amyu ting hpe lakap sha-ang nna, Yehowa tsun ai ga hpe madat mara la mu.

³Marai lahkawng myit n hkrum yang, rau hkawm lu a ni?

⁴Hkanghkyi gaw htim na shan n nga yang, nam mali e shabam ga a ni? hkanghkyi uram gaw, shahpa n lu rim yang, shi a nhkun kata e nying ga a ni?

⁵Ga ntsa e mahkam n hkam yang, u lu ga a ni? Hkam da ai mahkam hta hpa n lu yang, htim ga a ni?

⁶Mare hta pahtau dum yang, mare masha ni n hkrit kajawng na ma ni? Yehowa kaw na n rai yang, tsin-yam tsindam lama ma, mare hta byin na a ni?

⁷Gaja wa, Madu Yehowa gaw, shi myit maw ai lam, shi a shangun ma myihtoi ni hpe garai n shapraw dan yang, hpa mung galaw na n rai.

⁸Hkanghkyi shabam yang, n hkrit ai, kadai nga na rai ta? Madu Yehowa shaga yang, myihtoi n htoi na, kadai wa rai ta?

⁹Samari mung na bum ni a ntsa e zuphpawng nna, de a kabring kabrawng kaba ai hte, de a ka-ang e nga ai adip arip hkrum ai ni hpe mada yu mu, ngu nna Ashdod a htingnu ni hte, Egutu mung na htingnu ni hta, ashi shabra nga mu.

¹⁰Kaning rai nme law, tinang a htingnu ni hta kashun kashe hte, hpya lu hpya sha ai sut, mahkawng da ai ni gaw, malang ai hku n chye galaw ma ai, nga nna Yehowa tsun ai.

¹¹Dai re ai majaw, Madu Yehowa ning nga ai: Hpyen wa gaw du nna, mungdan hpe wang tawn nhtawm, shi gaw na a n-gun hpe shayawm nna, na a htingnu ni gaw, hpya kau ai hkrum na ra ai.

¹²Yehowa ning nga ai: Sagu rem wa gaw hkanghkyi a n-gup na lagaw lahkawng, shing n rai, na daw mi sha gare la lu ai zawn, Samari mare hta yup ku jut e dung nna, Damasku panep ntsa e hkrawn taw nga ai Israela kashu kasha ni gaw, gare la ai hkrum na mara ai.

¹³Madat mara mu; Yaku a nta a lam sakse hkam nna mara shagun mu, nga nna Zaw nawng zaw wa up ai, Madu Yehowa tsun ai.

¹⁴Kaning rai nme law, Israela amyu hpe, tinang a shut hpyit ai majaw, ari jaw ai shani hta, Betela hkungri ni hpe mung, ngai ari jaw na nngai: dai hkungri a nrung ni daw kau ai hkrum nna, ga de di hkrat na ra ai.

¹⁵Dai hta kaga, kashung ta na nta hte nlum ta na nta hpe, ngai run kau na nngai: magwi kawng nta ni hten mat nna, galu kaba ai nta ni, htum mat na ra ai, nga nna Yehowa tsun ai.