Read Jinghpaw Hanson Version Bible AMO 6 Bible Online

AMO 6 - Jinghpaw Hanson Version Bible bible

AMO 6

¹Ziun bum ntsa e ngwipyaw nga nna, Samari bum ntsa e hkrithpa n dum nga ai, Israela masha ni shamyet shanat nga ai, masha ni a daru magam rawng ai ni gaw, dingnye lu ma ai.

²Hkalna de sa nna, mada yu mu; dai kaw nna, galu kaba ai Hamat de sa mu; dai hpang Hpilisti mung na Gat mare de yu wa mu: nanhte gaw, ndai mung ni hta grau kaja nga myit ni? nanhte a lamu ga jarit, shanhte a lamu ga jarit hta grau dam nga a ni?

³Nanhte gaw ari hkrum na nhtoi hpe sharen kau nna, kashun kashe ni a tingnyang hpe shani tawn myit dai:

⁴magwi kawng yup ku hta nanhte kaleng taw nga nna, panep ni hta hkum chyan nga ai hte, sagu hpung na sagu kasha hpe mung, dumsu ulawng na dumsu kasha hpe mung, sha myit dai:

⁵nanhte gaw tingse dum let, nchyun chyun nna, Dawi a dum ai baw, tinang a matu galaw myit dai:

⁶tsabyi jahku hpe gawm hta lu nhtawm, kaja htum ai sau hte tinang hkum hpe chya myit dai: shanhte chyawm gaw, Yawsep a hkala nba hkrum ai lam, hpa n yawn ma ai.

⁷Dai re ai majaw shanhte gaw, shawng rim mat wa hkrum ai ni hte rau, bawng dung sa wa nna, kaleng taw let, tinang hkum hpe chyan ai ni a pyaw daw kadaw ai lam, htum mat na ra ai.

⁸Zaw nawng zaw wa up ai Karai Kasang Yehowa gaw, Yaku a gumrawng gumtawng ai hpe ngai matsat kau nna, shi a htingnu ni hpe n dawng nga nngai: dai re ai majaw ndai mare hte, dai hta rawng marawng hpe, ngai ap kau na nngai, nga nna Madu Yehowa tinang hkum hpe dagam nna tsun nga ai.

⁹Shing rai nta langai mi hta marai shi ngam nga timung, shanhte si na mara ai.

¹⁰Ya si mat ai wa a kawa doi, mang nat ai wa hte rau sa nna, si mang hpe nhku de na shapraw yang, nta jut e makoi nga ai wa hpe shaga nna, Nang hte rau langai mi naw nga a ni? ngu nna san wu yang, dai wa gaw, N nga sai, nga nna htan jang, kawa doi gaw, Atsin sha nga u, Yehowa a amying hpe shaga mai ai n rai, nga nna daru kau na ra ai.

¹¹Kaning rai nme law, yu u, Yehowa htet da ai hte maren, galu kaba ai nta gaw waw malawng kau ai, nta kaji gaw, je malang kau ai, hkrum na ra ai.

¹²Gumra gaw lungbra hkan e gat lu a ni? dumsu hte dai hpe shawt lu a ni? nanhte mahtang tara malang ai hku shagri, dinghpring ai hpe lashi pila hte galai kau manu ai;

¹³nanhte gaw hpa n re ai hta kabu nna, Anhte gaw, tinang n-gun hte nrung shatut lu ga ai, nga nna grang dakat myit dai.

¹⁴Rai timung, Israela dap e, yu mu, nanhte hpe hpyen ai amyu langai mi ngai sharawt nna, shanhte gaw Hamat mashang kaw nna, Araba hka shi du hkra, nanhte hpe zingri zingrat na myit dai, nga nna Zaw nawng zaw wa up ai Karai Kasang Yehowa tsun ai.