Read Jinghpaw Hanson Version Bible AMO 7 Bible Online

AMO 7 - Jinghpaw Hanson Version Bible bible

AMO 7

¹Madu Yehowa ndai lam ngai hpe madun nngai: yu u, hkawhkam a mam dan ai hpang, mam nhpan tu ai aten e, shi gaw dinggam-yaw wunawng wuwa hpe hpan da nna,

²dai ni gaw, mung ting na tsit lali ai hpe sha kau ai majaw, ngai gaw, Madu Yehowa e, mara dat kau ya e; Yaku kaji nga ai majaw, kaning rai rawt lu na rai ta? ngu nna hpyi nngai.

³Yehowa mung dai lam myit malai nna, Dai lam byin lu na, n rai, nga nna tsun ai.

⁴Madu Yehowa ndai lam ngai hpe bai madun nngai: yu u, wan hte ari jaw na matu, Madu Yehowa wan shaga nna, dai gaw sung htum ai shara kaba hpe hkru kau nna, mungdaw hpe hkru magang nga ai.

⁵Shaloi ngai gaw, Madu Yehowa e, naw hkring u: Yaku kaji nga ai majaw kaning rai rawt lu na rai ta? ngu nna hpyi nngai.

⁶Madu Yehowa mung dai lam myit malai nna, Dai lam byin lu na, n rai, nga nna tsun ai.

⁷Bai shi ngai hpe madun nngai, yu u, Madu gaw, shadawn sumri hte shading ai bunghku makau e tsap nga nna, shi a lata hta shadawn sumri lang nga ai.

⁸Shaloi Yehowa gaw, Amo e, nang hpa mu nga n ta? nga nna san yang, ngai gaw, Shadawn sumri hpe mu nngai, ngu nna htan we ai. Shaloi dai Madu gaw, Yu u, Nye amyu Israela a ka-ang e, shadawn sumri shayu dat na nngai: htawm hpang e ngai shanhte hpe shalai dat na n rai;

⁹Isak a tsaw ai kawng ni katsi katsang shara, Israela a chyoi pra ai nta ni marawng marang tai mat nna, ngai gaw Yeroboam a nta nhtu hte gasat na nngai, nga nna ngai hpe tsun ai.

¹⁰Dai ga majaw, Betela hkinjawng Amazia gaw, Israela hkawhkam Yeroboam hpang de ga shana dat nna, Amo gaw Israela amyu ka-ang e, nang hpe gumlau nga ai: shi a ga nlang hpe, mungdan n hkam lu ai.

¹¹Kaning rai nme law, Amo gaw, Yeroboam nan nhtu hte si nna, Israela gaw ndai mungdan kaw na, bawng dung ai de, teng teng woi wa ai hkrum na ra ai, nga nna tsun ai, ngu dat wu ai.

¹²Dai hta n-ga Amazia gaw, Myihtoi wa e, Yuda mung de hprawng wa nu; dai yang e myihtoi htoi nna, asak bau u;

¹³Betela shara hta chyawm gaw, htawm hpang de myihtoi hkum htoi et: dai ga hkawhkam a chyoi pra ai shara hte, hkawhkam htingnu rai nga ai, ngu nna Amo hpe tsun wu ai.

¹⁴Dai rai nna Amo gaw, Ngai myihtoi n rai nngai, myihtoi kasha mung n rai nngai; yamnga rem nna, lakum si lajang ai wa ngai rai nga nngai:

¹⁵Yehowa mahtang sagu hpung de na ngai hpe lata la nna, Sa su, nye a amyu Israela hpe myihtoi htoi u, nga nna ngai hpe hkang dat ai.

¹⁶Dai re ai majaw Yehowa a ga ya madat u: Nang gaw, Israela hpe lakap nna myihtoi hkum htoi et; Isak a dap hpe sha-ang nna, ga hkum tsun et, nga nna tsun ndai majaw, Yehowa ning nga ai:

¹⁷Na a madu jan gaw ndai mare hta shawa num tai na ra ai; na a shayi shadang sha ni nhtu hte si mat nna, na a lamu ga gaw shadawn sumri hte karan kau ai hkrum na ra ai: nang nan n san n seng ai mung hta si wa nna, Israela gaw tinang a lamu ga kaw na, bawng dung ai de, teng teng woi wa ai hkrum na ra ai, ngu nna Amazia hpe htawn tsun wu ai.