Read Jinghpaw Hanson Version Bible AMO 8 Bible Online

AMO 8 - Jinghpaw Hanson Version Bible bible

AMO 8

¹Madu Yehowa ndai lam ngai hpe bai madun nngai: yu u, myin ai namsi hpring ai ka langai mi dan nga ai.

²Shaloi shi gaw, Amo e, nang hpa mu n ta? nga nna san yang, ngai gaw, Myin ai namsi hpring ai ka langai mi mu nngai, ngu nna htan we ai. Shaloi Yehowa gaw, Nye amyu Israela myin nna, di kau ai hkrum na ra ai; htawm hpang e ngai shanhte hpe shalai dat na n rai.

³Dai aten hta e nawku htingnu na mahkawn mangoi ga, hkrap shabam ai hte galai mat na ra ai: si mang ni law nga nna, shara shagu hta na atsin sha kabai kau na mara ai, nga nna Madu Yehowa ngai hpe tsun ai.

⁴Matsan mayan ni hpe gumhpraw hte, hpa n lu ai ni hpe kyepdin man mi hte, mari la lu nna, hkaulan mam shingrun dut kau lu na matu,

⁵dang hpe kaji, joi hpe kaba shangun nna, maw sha map sha let, Anhte mam dut lu na, shata praw hkaulan mam dut lu na, laban nhtoi lau lai u ga, nga nna tsun let,

⁶hpa n lu ai ni hpe gamaw kau mayu ai hte, matsan mayan ni hpe mungdan kaw na jahtum kau mayu ai ni e, ndai ga madat mara mu.

⁷Yehowa gaw, Yaku a gumrawng gumtawng ai hpe dum let, Gaja wa, shanhte amu bungli hpe ngai galoi mung malap mali kau na n rai, ngu nna dagam da nu ai.

⁸Ndai ga majaw lamu ga gari awam nna, dai hta shanu nga ai ni yawng, yawn hkyen nga na, n rai ni? gaja wa dai gaw, hka nu zawn tung rawt nna, Egutu hka nu zawn lim wa ai hte bai hkyet mat na ra ai.

⁹Madu Yehowa ning nga ai: Dai aten hta, ngai gaw, shani ka-ang e jan shang shangun nna, lamu san ai shani hta mungkan ga hpe jasin kau na nngai.

¹⁰Nanhte a pyaw poi ni hpe yawn hkyen ai hte, nanhte a mahkawn mangoi ga hpe sharung shayawt ai hte, ngai galai kau na nngai; masha yawng lachyit nba kyit nna, abaw yawng krin nga na lam, ngai shabyin na nngai; kasha shingtai si ai majaw hkrap ai zawn ngai hkrap shangun nna, de a jahtum ai gaw n hpru n mai ai nhtoi zawn tai na ra ai.

¹¹Yu mu, ndai mungdan hta, ngai hku wa shangun ai aten du na ra ai: kawsi hpang gara hku wa n rai, Yehowa a mungga hpe n na lu ai hku wa, rai na ra ai.

¹²Mung masha ni gaw, Yehowa a mungga hpe tam let, nawng mi kaw nna nawng mi du hkra, dingdung kaw nna dingda du hkra, gat nwan hkawm timung, n mu lu na ma ai.

¹³Dai shani e tsawm htap ai hkawnsek ni hte, n-gun ja ai shabrang ni gaw, hpang gara ai hte ba mat na mara ai.

¹⁴Samari a shut hpyit ai lam hkan nna, Dan e, na a hpara hkrung nga ai hte maren, nga nna mung, Berasheba a htung hking grin nga ai hte maren, nga nna mung, tsun dagam ai ni gaw kadawng mat nna, galoi mung bai rawt lu na n rai, nga nna Madu Yehowa tsun ai.