Read Jinghpaw Hanson Version Bible AMO 9 Bible Online

AMO 9 - Jinghpaw Hanson Version Bible bible

AMO 9

¹Dai Madu gaw, dai tawn hkungri makau e tsap nga ai hpe, ngai mu nngai: shi gaw, Chyinghka hkinbawng ni ashun awam hkra, nta shadaw ni hpe adawt agrawp kau nna, mung masha ni a baw ntsa e ru bun shangun mu; ngai shanhte hpe htum hkra nhtu hte sat kau na nngai: langai mi pyi hprawng lu na n rai, langai mi muk lawt lu na n rai.

²Shanhte gaw katsan ga du hkra nhkun htu timung, nye a lata dai kaw na shanhte hpe shaw la na ra ai; sumsing lamu de lung timung, ngai shanhte hpe shayu dat na nngai.

³Hkarmela bum pungding e, makoi nga ma timung, ngai shanhte hpe tam shapraw na nngai: ngai kaw na lawt hkra, nammukdara hpungtang e makoi nga timung, shanhte hpe kawa na baren, ngai hkang da na nngai.

⁴Hpyen ni shanhte hpe bawng rim mat wa timung, shanhte hpe sat kau na nhtu, dai shara e ngai hkang da na nngai: chyeju madun na n rai, ari jaw na matu, ngai shanhte hpe mada yu na nngai.

⁵Kaning rai nme law, Zaw nawng zaw wa up ai Madu Yehowa gaw, lamu ga hpe ahtawk yang, dai gaw byawng mat wa nna, dai hta shanu nga ai ni yawng, yawn hkyen nga na mara ai: dai gaw hka nu zawn tung rawt nna, Egutu hka nu zawn bai hkyet mat na ra ai:

⁶shi gaw sumsing lamu ntsa e shi a gawk ni hpajang da nna, ginding aga ntsa e shi a lamu udaw htawk da wu ai; nammukdara hka hpe shi shaga nna, lamu ga ntsa e ru dat wu ai: shi a mying shingteng Yehowa rai nga ai.

⁷Israela kashu kasha ni e, nanhte gaw nye a man e Hkusha kashu kasha ni zawn, rai nga myit dai, n rai ni? Ngai gaw Israela amyu hpe Egutu mung na, Hpilisti masha ni hpe Hkaphtora mung na, Suri masha ni hpe Kira mung na, woi shapraw nga ai, n rai ni? nga nna Yehowa tsun ai.

⁸Yu mu, Madu Yehowa gaw yubak kap ai mungdan hpe mada yu nna, dai hpe ga ntsa na shamyit kau na ra ai: rai timung, Yaku a amyu hpe ngai atsai awai shamyit kau na n rai. nga nna Yehowa tsun ai.

⁹Kaning rai nme law, yu mu, ngai htet da nna, n-gu hpe hking hta hking ai zawn, maigan amyu ni hta Israela amyu hpe ngai hking na nngai: rai timung, shingrun tum mi pyi, ga de hkrat na n rai.

¹⁰Ari ahpri anhte hpe dep lu na n rai, dai hte anhte hkrum na n rai, nga nna nye a amyu hta tsun ai yubak kap ai ni yawng, nhtu hte si na mara ai.

¹¹Nye a amyu masha ni gaw, naw ngam nga ai Edom amyu masha ni hte, nye a amying mying ai maigan amyu ni mahkra hpe, madu lu na matu,

¹²daw mat ai Dawi a sum hpe, dai shani e ngai sharawt nna, de a waw malawng ai hpe pat kau na nngai; de a marawng marang ni hpe ngai bai sharawt nna, moi chyaloi nhkoi na zawn de da na nngai, nga nna dai amu shabyin ai Yehowa tsun nga ai.

¹³Yu mu, yi hkauna shawt ai wa gaw, mam dan ai wa hte, tsabyi si kabye ai wa gaw, nli gat ai wa hte, matut lu na nhtoi du na ra ai: bum ni gaw, dwi ai tsabyi jahku yun nna, kawng ni yawng, jahku hkrai rai na ra ai, nga nna Yehowa tsun ai.

¹⁴Bawng dung mat wa hkrum ai nye a amyu Israela hpe ngai nhtang wa shangun nna, shanhte gaw marawng marang tai mat ai mare ni hpe bai de da nna, shanu nga na mara ai; shanhte gaw tsabyi sun hkai nna, tsabyi jahku lu na mara ai; sun galaw nna, namsi sha na mara ai.

¹⁵Ngai shanhte hpe tinang a lamu ga hta hkai da nna, ngai shanhte hpe jaw da ai, shanhte a lamu ga hta na, htawm hpang de baw kau ai hkrum na n rai, nga nna na a Karai Kasang Yehowa tsun nga ai.