Read Jinghpaw Hanson Version Bible OBEDIA 1 Bible Online

OBEDIA 1 - Jinghpaw Hanson Version Bible bible

OBEDIA 1

¹Obedia a shingran ga. Madu Yehowa gaw Edom mung hpe lakap nna ning nga tsun ai: Yehowa kaw na shiga anhte na saga ai; maigan amyu ni hpang de kasa mung shangun dat nu ai. Shi gaw, Rawt mu, shi hpe hpyen gasat na anhte rawt saga, nga nna tsun ai.

²Yu u, maigan amyu ni hta, ngai nang hpe kaji shangun sade ai; n sawn n sang di ai, nang ja ja hkrum nit dai.

³Lungpu hta rawng nna, tsaw ai shara e shanu nga let, “Ngai hpe ga de kadai jahkrat lu na i?” nga nna kraw lawang e tsun ai wa e, na a gumrawng ai myit nang hpe hkalem kau nit dai.

⁴Langda hte maren nang tsaw nga nna, shagan ni a lapran e na a tsip tsip lu timung, dai kaw nna ngai nang hpe jahkrat kau na de ai, nga nna Yehowa tsun ai.

⁵Lagu lagut ni nang kaw shang nna, shana na damya ni rai yang gaw, shanhte ra ai made sha lagu na ma ai, n rai ni? Tsabyi si di ai ni nang kaw shang yang, shanhte nlim ngam da na ma ai, n rai ni? Nang chyawm gaw, gade wa byak mat hkrum nit hka!

⁶Esaw gaw gade wa sawk yu ai hkrum nga a hka! Shi makoi da ai sutgan hpe, mu hkrup manu hka!

⁷Nang hte ga shaka da ai ni nlang, na a lamu ga jarit du hkra, nang hpe shaden kau manit dai: nang hte hku ai ni, nang hpe hkalem nna, dang kau manit dai; na a muk sha ai ni, na a npu e mahkam up da manu ai: shi gaw nyan kata nga ai.

⁸Dai shani e ngai gaw, Edom a zai byeng-ya rawng ai ni hte, Esaw a bum na nyan hpaji hpe, jahtum kau na we ai, n rai ni? nga nna Yehowa tsun ai.

⁹Teman e, Esaw a bum na nlang hte gaw, sat kau ai hte shamyit kau ai hkrum mu ga, na a share ninghkrin ni yaw mat na mara ai.

¹⁰Na nnau Yaku hpe adip arip di kau wu ai majaw, kaya kahpa nang hpe htinggrum nna, htani htana jahtum kau ai nang hkrum na rin dai.

¹¹Masha tsasam ni gaw, Yaku a arung arai hpe kashun la kau nna, maigan masha ni shi a chyinghka ni hta shang wa ai hte, Yerusalem a lam hpaida da ai shani e, nang nan wora maga de tsap nga nna, shanhte hte langai sha zawn, rai nga ndai.

¹²Na nnau wa tsin-yam tsindam hkrum ai shani e, hkum yu sharawng et; Yuda kashu kasha ni hten byak hkrum ai nhtoi hta, hkum yu kabu et; shi ru tsang hkrum ai nhtoi hta, myit kaba ai ga hkum tsun et.

¹³Nye a amyu shoihpa shoirang hkrum ai shani e, shanhte a chyinghka hta hkum shang et; shanhte shoihpa shoirang hkrum ai shani e, shanhte a ruyak ai hpe hkum yu kabu et; shanhte shoihpa shoirang hkrum ai shani e, shanhte a arung arai hpe hkum kashun la et.

¹⁴Shi a hprawng lawt ai ni hpe, hkap ban la na matu, lam mashe hkan e hkum tsap nga et; kyin dut hkrum ai nhtoi hta na, naw ngam nga ai ni hpe, hkum ap kau et.

¹⁵Kaning rai nme law, Yehowa a nhtoi gaw, maigan amyu ni mahkra a ntsa e, ni magang ra ai; nang galaw ai hte maren, nang hpe di na ra ai: na a arawn alai, na baw ntsa nhtang wa na ra ai.

¹⁶Kaning rai nme law, nye a chyoi pra ai bum ntsa e shanu ai ni gaw, dai gawm hpe lu ai zawn, maigan amyu ni yawng tut tut lu na mara ai: gaja wa, shanhte lu ai hte mayu dat nna, galoi n pra yu ai ni zawn, rai na mara ai.

¹⁷Rai timung Ziun bum ntsa e lawt lu ai ni shanu nga nna, dai gaw chyoi pra ai shara rai na ra ai: Yaku a dap gaw, tinang madu ang ai lamu ga hpe, madu lu na ra ai.

¹⁸Yaku a nta gaw, wan, Yawsep a nta gaw, wan shinglet, Esaw a nta chyawm gaw, yi hku tai na ra ai; dai hta shanhte wan shachyi nna, hkru mat na ra ai; Esaw a nta hta kadai mung ngam nga na n rai: Yehowa shing nga tsun ai.

¹⁹Dingda mung na ni gaw, Esaw a bum hpe, layang ga na ni gaw, Hpilisti masha ni hpe, madu na mara ai: shanhte gaw, Ehprim pa ga hte Samari prang ga hpe madu lu nna, Ben-yamin gaw Gilead mung hpe, madu lu na ra ai.

²⁰Hkanani masha ni hta bawng dung nga ai, Israela kashu kasha ni a luksuk ni gaw, Zarephta du hkra lamu ga hpe madu lu nna, Sehpara e bawng dung nga ai Yerusalem masha ni gaw, dingda maga na mare ni hpe madu lu na mara ai.

²¹Esaw a bum hpe tara dawdan na matu, hkye hkrang la ai madu ni, Ziun bum de lung wa nna, dai mungdan gaw Yehowa a mungdan rai na ra ai.