Read Jinghpaw Hanson Version Bible HAGI 2 Bible Online

HAGI 2 - Jinghpaw Hanson Version Bible bible

HAGI 2

¹Ya shata sanit a hkun langai ya shani e, myihtoi Hagi a n-gup hte Yehowa mungga bai du nna,

²Yuda munggyi Shelatila kasha, Zerubabela hpe mung, Yehozadak a kasha hkinjawng agyi Yoshua hpe mung, naw ngam nga ai mung masha ni hpe mung, ga tsun nna,

³Ndai nta a shawng na hpung shingkang hpe mu yu ai wa, nanhte hta kadai naw hti nga a ta? Ya ndai kaning san nga a ta? Shadawn yu yang, nanhte a man e hpa n re ai zawn rai nga ai, n rai ni?

⁴Rai timung Zerubabela e, n-gun da ting u, nga nna Yehowa tsun ai: Yehozadak a kasha, hkinjawng agyi, Yoshua e, n-gun da ting u; mung masha ni mahkra e, n-gun da ting nna, bungli galaw mu, nga nna Yehowa tsun ai:

⁵kaning rai nme law, Egutu mung na pru wa nna, nye a Wenyi nanhte hte rau shanu nga yang, ngai nanhte hte tawn da ai ga shaka hte maren, ngai nanhte hte rau rai nga nngai; hkum hkrit myit, nga nna Zaw nawng zaw wa up ai Yehowa tsun ai.

⁶Dai hta kaga, Zaw nawng zaw wa up ai Yehowa ning nga ai: Gade n na yang, sumsing lamu hte ginding aga hpe, nammukdara hte hkarang hpe, ngai bai ashun na nngai:

⁷maigan amyu ni mahkra hpe mung, ngai ashun na nngai; maigan amyu ni mahkra a hpu htum ai baw sa du nna, ngai gaw ndai Nta hpe hpung shingkang hte jahpring na nngai, nga nna Zaw nawng zaw wa up ai Yehowa tsun ai.

⁸Gumhpraw yawng nye a rai nga ai, aja mung nye a rai nga ai, nga nna Zaw nawng zaw wa up ai Yehowa tsun ai.

⁹Ndai nta a hpang jahtum na hpung shingkang gaw, shawng na hta grau kaba na ra ai, nga nna Zaw nawng zaw wa up ai Yehowa tsun ai: ndai shara hta e ngwipyaw lam ngai tawn da na nngai, nga nna Zaw nawng zaw wa up ai Yehowa tsun ai.

¹⁰Dari hkaw dung ai, ni ning na shata jahku a hkun mali ya shani e, Yehowa a mungga, myihtoi Hagi a n-gup hte du nna,

¹¹Zaw nawng zaw wa up ai Yehowa ning nga ai; Hkinjawng ni hpe tara lam san yu u:

¹²Masha langai ngai, tinang a nba lawai hte chyoi pra ai shan makai nna la wa let, muk, shatmai, tsabyi jahku, sau, shahpa lama ma hpe, dai nba hte hkra yang, dai shahpa gaw chyoi pra na rai ni? ngu nna san yang, hkinjawng ni gaw, Chyoi pra na, n rai, ngu nna htan mu ai.

¹³Bai Hagi gaw, Si mang hkra nna, n san n seng ai wa gaw, dai langai ngai hpe hkra yang, dai gaw n san n seng na rai ni? ngu nna san yang, hkinjawng ni gaw, N san n seng na ra ai, ngu nna shi hpe htan mu ai.

¹⁴Shaloi Hagi gaw, Ndai amyu hte, ndai mung masha ni gaw nye a man e dai zawn rai nga ma ai; shanhte a lata galaw ai amu mahkra mung, dai zawn rai nga ai; ndai yang e shanhte nawng ya ai kumhpa mung, n san n seng nga ai, nga nna Yehowa tsun ai.

¹⁵Dai rai yang, myit yu mu; Yehowa nawku Htingnu hta, nlung langai mi gaw langai mi a ntsa e garai n mara ai shani kaw nna, dai ni du hkra, sawn yu mu:

¹⁶ndai aten laman e, n-gu dang hkun pru ai mam sumpum de sa du yang, dang shi sha lu la nga ai; bai, tsabyi yam manga shi la na matu, htumbyen de sa du yang, hkun sha lu la nga ai.

¹⁷Ngai gaw nanhte galaw ai makan mahkra hpe, hkau pyi pyi ai, mam maru ru ai, sin hkrat ai tsin-yam hte shari timung, nanhte gaw ngai hpang de n kayin wa myit dai, nga nna Yehowa tsun ai.

¹⁸Dai rai nna naw myit yu mu; shata jahku a hkun mali ya e, Yehowa a nawku Htingnu a npawt nhpang gaw da ai shani kaw nna ya du hkra, sawn yu mu:

¹⁹mamdum hta, nai mam rawng sa ni? gaja wa, tsabyi ru, lakum hpun, hkainu si hpun hte tsanlun hpun ni, asi garai n si ma ai: rai timung, dai ni kaw nna, ngai nanhte hpe shaman ya na nngai, nga ai.

²⁰Ya shata jahku a hkun mali ya shani e, Yehowa a mungga, Hagi kaw bai du nna,

²¹Yuda munggyi Zerubabela hpe htawn tsun u: Ngai gaw sumsing lamu hte ginding aga hpe ashun na nngai:

²²hkawhkam mungdan ni a tingnyang hpe, ngai gale galau kau na nngai: maigan amyu ni a hkawhkam mungdan ni a n-gun atsam hpe, ngai agrawp kau na nngai; hpyen leng ni hte dai hta jawn ai ni hpe, ngai gale galau di kau na nngai; gumra ni hte gumra jawn ai ni gaw, langai hte langai tinang a hpunau wa a nhtu hte kadawng hkrat na mara ai.

²³Zaw nawng zaw wa up ai Yehowa ning nga ai: Nye a shangun ma, Shelatila kasha, Zerubabela e, ndai shani e ngai nang hpe woi la nna, nye a dazik lachyawp zawn san da na nngai, nga nna Yehowa tsun ai: kaning rai nme law, ngai nang hpe lata la ni ai, nga nna, Zaw nawng zaw wa up ai Yehowa tsun ai.