Read Jinghpaw Hanson Version Bible ZEHKARIA 1 Bible Online

ZEHKARIA 1 - Jinghpaw Hanson Version Bible bible

ZEHKARIA 1

¹Dari hkaw dung ai ni ning na shata matsat hta e, Yehowa a mungga gaw Berehkia a kasha Yido a kashu, myihtoi Zehkaria hpang de du nna,

²“Yehowa gaw nanhte a nji nwa ni hpe grai pawt bu nga ai.

³Dai re ai majaw, mung masha ni hpe tsun mu, Zaw nawng zaw wa up ai Yehowa ning nga ai: ‘Ngai hpang de wa marit, shaloi ngai nanhte hpang de wa na nngai,’ nga nna Zaw nawng zaw wa up ai Yehowa tsun ai.

⁴Zaw nawng zaw wa up ai Yehowa ning nga ai: ‘Nanhte a n hkru n hkra ai lam hte, n shawp ai lailen kau da nna, ngai hpang de wa marit,’ nga nna moi na myihtoi ni tsun jahtau timung, nye a ga n na la ai hte, nye a lam n madat hkraw ai, nanhte a nji nwa ni zawn, hkum rai myit, nga nna Yehowa tsun ai.

⁵Nanhte a nji nwa ni, ya kanang nga ma ta? Myihtoi ni gaw prat dingnawng e hkrung nga chye ma ni?

⁶Nye a shangun ma myihtoi ni hpe, ngai hkang da ai mungga hte matsun maroi ga chyawm gaw, nanhte a nji nwa ni hpe dep sai, n rai ni? Shing rai shanhte yin la nna, Anhte a lam hte, anhte a arawn alai hte maren, anhte hpe nhtang jaw na, ‘Zaw nawng zaw wa up ai Yehowa myit shatawng da ai hte maren, shi anhte hpe di mi ai,’ nga nna tsun ma ai,” nga ai.

⁷Dari hkaw dung ai, ni ning na, shi langai ngu ai, Shebat shata a hkun mali ya e, Yehowa a mungga gaw, Berehkia kasha, Yido a kashu, myihtoi Zehkaria hpang de du sai.

⁸Ngai gaw shana e shingran mu nna, yu u, gumra ahkyeng jawn ai wa langai mi hpe ngai mu nngai; dai wa gaw murtu maling na shingnip htat ai shara e hkring nga nna, shi a hpang e hkyeng ai, mut ai hte hpraw ai gumra tsap nga ma ai.

⁹Shaloi ngai gaw, “Nye a madu e, ndai ni kadai rai mata?” ngu nna san we yang, ngai hte ga tsun ai lamu kasa gaw, “Dai ni kadai re ai, ngai nang hpe madun na nngai,” nga nna ngai hpe tsun ai.

¹⁰Shing rai, Murtu hpun maling e hkring nga ai wa gaw, “Ndai ni gaw, ga ntsa ting jawt hkawm na, Yehowa shangun dat ai ni, rai nga ma ai,” ngu nna htan wu ai.

¹¹Dai ni mung, “Anhte gaw ga ntsa ting jawt hkawm saga ai; yu u, ga ntsa ting asim sha nga nna, ban sa nga ai,” ngu nna murtu maling e hkring nga ai Yehowa a lamu kasa hpe htan mu ai.

¹²Shaloi Yehowa a lamu kasa gaw, “Zaw nawng zaw wa up ai Yehowa e, ndai sanit shi ning tup, nang sindawng kahtet ai Yerusalem hte Yuda mung na mare ni hpe, gaten du hkra matsan n dum nga na rai ta?” ngu nna san wu ai.

¹³Yehowa mung, ngai hte ga tsun ai lamu kasa hpe, mai kaja, ngwipyaw ga hte, htan wu ai.

¹⁴Shing rai, ngai hte ga tsun ai lamu kasa gaw, “Tsun jahtau u; Zaw nawng zaw wa up ai Yehowa ning nga ai: Ngai gaw Yerusalem mare hte Ziun bum hpe, grai wa nja nhpra nga nngai;

¹⁵asan apan de nga ai amyu ni hpe ngai ja ja sindawng kahtet nngai; kaning rai nme law, ngai gaw nye a amyu hpe kaji sha mi pawt yang, shanhte gaw ladu lai hkra zingri ma ai.

¹⁶Dai re ai majaw, Yehowa ning nga ai: Chyeju gun let, ngai Yerusalem mare de nhtang wa ni ai; ndai mare hta nye a Nta hpe galaw da na ra ai; mare de ai shara hpe shadawn sumri hte shadawn na ra ai,” nga nna Zaw nawng zaw wa up ai Yehowa tsun ai.

¹⁷“Bai tsun jahtau u, Zaw nawng zaw wa up ai Yehowa ning nga ai: Nye a mare kahtawng ni gaw, ngamu ngamai naw hpring kabrat na ra ai: Yehowa gaw Ziun bum hpe naw shalan shabran nna, Yerusalem mare hpe, naw lata la na ra ai,” nga ai.

¹⁸Shaloi ngai mada yu yang, yu u, nrung mali rai nga ai.

¹⁹Shing rai, ngai hte ga tsun ai lamu kasa hpe, “Ndai ni gaw kaning re ai rai ta?” ngu nna san we yang, shi gaw, “Ndai nrung ni gaw, Yuda mung, Israela mung hte Yerusalem mare hpe shabra kau ai nrung ni rai nga ma ai,” nga nna ngai hpe htan ai.

²⁰Bai Yehowa gaw ndup marai mali ngai hpe madun dan ai.

²¹Shaloi ngai gaw, “Ndai ni, hpa galaw na sa mata?” ngu nna san we yang, shi gaw, “Ndai nrung ni gaw, kadai n mada yu wam hkra, Yuda mung masha ni hpe shabra kau timung, ndai ndup ni gaw, dai nrung ni hpe jahkrit kau na matu sa nna, Yuda mung hpe shabra kau ai, maigan amyu ni a nrung ni hpe jahkrat kau na ni, rai nga ma ai,” nga nna htan ai.