Read Jinghpaw Hanson Version Bible ZEHKARIA 10 Bible Online

ZEHKARIA 10 - Jinghpaw Hanson Version Bible bible

ZEHKARIA 10

¹Marang shadoi htu ai aten e, marang htu u ga, Yehowa hpe hpyi mu; Yehowa gaw myihprap gala shangun nna, marang nhpawng jahtu ya ai hte, langai hte langai a matu, pa ga e hkai nmai shatut wu ai.

²Terahpim sumla ni chyawm gaw, ga kaman tsun nna, shaba wawt ai ni, masu ai shingran mu ma ai; shanhte gaw n teng ai yup mang htai dan nna, shanhte a shalan shabran ai ga, kaman lila rai nga ai: dai re ai majaw, mung masha ni gaw, sagu zawn lam dam nna, sagu rem wa n nga ai majaw, ruyak ai hkrum ma ai.

³“Ngai gaw sagu rem ai ni hpe, pawt kahtet nga nna, namla ni hpe, ari jaw na nngai: kaning rai nme law, Zaw nawng zaw wa up ai Yehowa gaw, shi a sagu hpung ngu ai, Yuda dap hpe kawan katsan yu nna, shanhte hpe, hpyen shani na laring gumra zawn, shatai na ra ai.

⁴Shi kaw na, njut nlung, hpri maina, hpyen ndan hte, ahkang aya lu ai ni yawng, pru na mara ai.

⁵Shanhte gaw share ninghkrin zawn tai nna, hpyen majan shani e, hpyen ni hpe, mare lam na hkumpup hta, kabye kau na mara ai; Yehowa shanhte hte rau rai nga ai majaw, shanhte hpyen gasat lu nna, gumra jawn ai ni, mak mat na mara ai.

⁶Ngai gaw Yuda dap hpe shangang shakang nna, Yawsep a dap hpe hkye hkrang la na nngai; shanhte hpe matsan dum nga ai majaw, ngai shanhte hpe nhtang wa shangun nna, nye a lata hte shapraw kau n hkrum ai ni zawn, shanhte tai na mara ai: kaning rai nme law, ngai gaw shanhte a Karai Kasang Yehowa rai nga nna, shanhte a ga, ngai madat na nngai.

⁷Ehprim masha ni gaw share ninghkrin zawn tai nna, tsabyi jahku hte hkru ai zawn, shanhte a myit masin kabu gara na ra ai; gaja wa, shanhte a kashu kasha ni, dai hpe mu nna, kabu gara na mara ai: shanhte a myit masin gaw, Yehowa hta sharawng awng na mara ai.”

⁸“Ngai shanhte hpe lahpyaw shaga nna, jahpawng na nngai; kaning rai nme law, ngai shanhte hpe hkye hkrang la ni ai: shawng e law htam ai zawn, shanhte law htam na mara ai.

⁹Ngai shanhte hpe nli zawn, masha amyu ni hta, gat ayai na nngai: shanhte gaw sumtsan mung ni hta e, ngai hpe dum na mara ai: shanhte mung kashu kasha ni hte rau hkrung nga nna, bai wa lu na mara ai.

¹⁰Ngai shanhte hpe Egutu mung de na, nhtang woi wa nna, Asuri mung de na jahpawng la na nngai: shanhte a matu nga shara n nga ai majaw, ngai shanhte hpe Gilead hte Lebanon mung de woi wa na nngai.

¹¹Shi gaw kyin dut ngu ai nawng hta rap lu nna, ngai gaw nammukdara hka leng ni hpe kayat kau na hte, Nila hka hpungla ni yawng, hkyet mat na mara ai: shing rai Asuri mung a gumrawng gumtawng shara yu mat nna, Egutu mung na hkawhkam sumdoi, htawm kau ai hkrum na ra ai.

¹²Ngai gaw Yehowa hta shanhte hpe shangang shakang nna, shanhte gaw shi a amying hta, hkawm sa lu na mara ai,” nga nna Yehowa tsun ai.