Read Jinghpaw Hanson Version Bible ZEHKARIA 11 Bible Online

ZEHKARIA 11 - Jinghpaw Hanson Version Bible bible

ZEHKARIA 11

¹Lebanon e, na a arit hpun ni hkru kau hkra, na a chyinghka ni hpe hpaw malang da u.

²Marau hpun e, arit hpun gaw kadawng mat nna, daru magam rawng ai ni hten mat hkrum ai majaw, sharung shayawt u; Bashan wamyi hpun e, htat ai maling dinggram hpe gru kau ai majaw, sharung shayawt u.

³Sagu rem ni a daru magam yu mat ai majaw, shanhte sharung shayawt ai nsen sharawt ma ai; Yawdan hka a gumrawng gumtawng shara hten mat ai majaw, hkanghkyi hkalung ni a shabam ai nsen ngoi nga ai.

⁴Nye a Karai Kasang Yehowa ning nga sai: “Sat na matu san da ai, ndai sagu hpung hpe rem u;

⁵sagu madu ni gaw sagu ni hpe sat kau timung, mara nga ai, n nawn ma ai: dut sha kau ai ni mung, ‘Ngai sut su nngai majaw, Yehowa a nga u ga,’ nga ma ai: tinang amyu sagu rem ni pyi, sagu ni hpe matsan n dum ma ai.

⁶Dai rai nna ngai mung, htawm hpang de, ndai mung na masha ni hpe matsan dum na n rai; yu mu, masha langai hte langai hpe, tinang a htingbu wa a lata hte, tinang a hkawhkam wa a lata hta, ngai ap kau na nngai: shanhte gaw dai mungdan hpe shaza kau nna, ngai shanhte a lata na, mung masha ni hpe, mawai la na n rai,” nga nna Yehowa tsun ai.

⁷Shing rai ngai gaw sat na matu san da ai, matsan mayan sagu hpung hpe, rem nga nngai. Sagu rem dawhkrawng lahkawng ngai la nna, langai mi hpe, Chyeju, langai mi hpe, Matut manoi, ngu shamying nngai; shaloi ngai gaw dai sagu hpung hpe rem nga nngai.

⁸Shata mi hta dai sagu rem masum hpe ngai shamyit kau nngai: kaning rai nme law, shanhte a majaw nye a myit nri nga nna, shanhte mung ngai hpe matsat ma ai.

⁹Shaloi ngai gaw, “Ngai nanhte hpe rem na n rai: si ai wa gaw, si u ga; shamyit kau hkrum ai wa gaw, hkrum u ga; naw ngam nga ai ni gaw, langai wa mi langai wa hpe sha u ga,” nga nna tsun let,

¹⁰masha amyu mahkra hte ngai tawn da ai ga shaka hpe run kau na matu, Chyeju ngu ai dawhkrawng hpe ngai la nna, atawk kau nngai.

¹¹Dai shani e dai ga shaka run kau ai hkrum nna, dai lam gaw Yehowa kaw na rai nga ai, sagu hpung hta na, nye a ga madat ai matsan mayan sagu ni, chye nga ma ai.

¹²Shaloi ngai gaw, “Ngai lu la ang ai shabrai, ngai hpe jaw mayu yang, jaw mi, n jaw mayu yang, rai u ga,” nga nna sagu hpung na ni hpe tsun nngai. Shing rai shanhte gaw, ngai hpe shabrai jaw na, gumhpraw sumshi shen ma ai.

¹³Shaloi Yehowa gaw, “Shanhte ngai hpe manu shatawng da ai, jahpu kaba hpe la nna, dibu sama a man e kabai tawn u,” nga nna ngai hpe tsun ai majaw, dai gumhpraw lap sumshi hpe ngai la nna, Yehowa nta na dibu sama a man e kabai tawn ngai.

¹⁴Dai hpang, Yuda hte Israela kahpu kanau myit dut kau na matu, Matut manoi ngu ai dawhkrawng kaga hpe, ngai atawk kau nngai.

¹⁵Bai Yehowa gaw, “Angawk ai sagu rem wa a arai ni hpe naw dagraw la u:

¹⁶kaning rai nme law, yu u, ndai mungdan hta sagu rem wa langai mi hpe ngai paw pru shangun na nngai: Dai wa gaw lam yit ai ni hpe n yu, bra mat ai ni hpe n tam, machyi ai ni hpe n shamai, hkam kaja ai ni hpe ushat n jaw ai sha, hpum sau ai ni hpe shi sha kau nna, de a lahkru ni hpe malaw kau na ra ai.

¹⁷Sagu hpung hpe kau da ai, n hkaw ai sagu rem wa gaw, dingnye lu u ga: shi a lahpum hte, hkra maga na myi hta, nhtu tsin-yam du u ga: lahpum ting hkraw kap mat u ga, hkra maga na myi kyaw mat u ga,” nga ai.