Read Jinghpaw Hanson Version Bible ZEHKARIA 12 Bible Online

ZEHKARIA 12 - Jinghpaw Hanson Version Bible bible

ZEHKARIA 12

¹Israela amyu hpe sha-ang ai, Yehowa a shingran mungga, da ndai rai nga ai: Sumsing lamu hpe kahpyan nna, ginding aga a npawt nhpang gaw da ai hte, masha a kraw kata e, wenyi hpan da ai Yehowa gaw, ning nga ai:

²“Yu u, ngai gaw, grup yin e nga ai masha amyu ni mahkra a matu, nang shangun ai gawm, Yerusalem mare hpe shatai na nngai; Yerusalem mare hpe wang tawn ai shaloi jang, dai gawm gaw, Yuda amyu a ntsa e mung, dai hte maren tai na ra ai.

³Dai hta kaga, dai aten e ngai gaw, masha amyu ni mahkra a matu, Yerusalem mare hpe li la ai nlung shatai na nngai; dai nlung hpe hpai kau mayu ai ni yawng, hkala nba hkrum na mara ai: dai hpe dang kau na matu, ga ntsa amyu baw ni yawng rau zuphpawng na mara ai.

⁴Dai aten e ngai gaw gumra shagu hpe hkrit kajawng shangun nna, gumra jawn ai wa hpe mana bu shangun nngai: Yuda dap hpe ngai mada yu nna, amyu masha ni a gumra shagu hpe myi kyaw shangun na nngai,” nga nna Yehowa tsun ai.

⁵Shing rai Yuda du ni gaw, ‘Yerusalem masha ni a Karai Kasang, Zaw nawng zaw wa up ai Yehowa majaw, shanhte gaw nye a n-gun rai nga ma ai, nga nna kraw e tsun na mara ai.'

⁶“Dai aten e ngai gaw, Yuda du ni hpe, hpun sumpum kata e rawng ai wan htung hte, hkauling ka-ang na wan shanan zawn, shatai na nngai: shanhte gaw pai, hkra, grup yin e nga ai masha amyu ni mahkra hpe hkru kau na mara ai: Yerusalem masha ni chyawm gaw tinang a buga ngu ai, Yerusalem mare hta, naw a shanu nga na mara ai.

⁷Rai timung, Dawi a nta masha ni hte, Yerusalem mare na ni gaw, Yuda mung masha ni hta grau kaba ai arawng n lu la mu ga, Yehowa gaw Yuda mung masha ni a sum ni hpe shawng hkye hkrang la na ra ai.

⁸Dai shani e, Yehowa gaw, Yerusalem masha ni hpe makawp maga na ra ai; shanhte hta n-gun n ja ai wa gaw, dai shaloi e Dawi zawn tai na ra ai; Dawi a dap gaw, Karai Kasang zawn, rai sa, shanhte a shawng e langang sa ai Yehowa a lamu kasa zawn, tai na ra ai.

⁹Dai shani e, Yerusalem mare hpe gasat na matu, sa wa ai maigan amyu ni mahkra hpe shamyit kau na, ngai n-gun dat na nngai.”

¹⁰“Dawi a nta ntsa e mung, Yerusalem mare na ni a ntsa e mung, chyeju dum ai hte tawngban ai myit, ngai ru bun na nngai; shanhte gaw tinang galun waw ai, ngai hpe, mu mada na mara ai rai nna, kasha shingtai a matu hkrap ai zawn, shanhte gaw shi a matu hkrap ngu hkrap ngoi na mara ai: kasha alat a matu myit ru ai zawn, shi a matu myit ru na mara ai.

¹¹Dai shani e Megido kadit hta e, Hadarimon a matu, hkrap ngu hkrap ngoi rai nga ai zawn, Yerusalem mare hta e, hkrap ngu hkrap ngoi kaba, rai na ra ai.

¹²Mungdan ting hta, dap mi hte dap mi, kaga lak lak, hkrap ngu hkrap ngoi na mara ai: Dawi a dap lak mi, shanhte a num ni lak mi; Nahtan a dap lak mi, shanhte a num ni lak mi;

¹³Lewi a dap lak mi, shanhte a num ni lak mi; Shime a dap lak mi, shanhte a num ni lak mi;

¹⁴naw ngam nga ai dap ni yawng, dap mi hte dap mi, lak mi, shanhte a num ni lak mi, hkrap ngu hkrap ngoi na mara ai.”