Read Jinghpaw Hanson Version Bible ZEHKARIA 14 Bible Online

ZEHKARIA 14 - Jinghpaw Hanson Version Bible bible

ZEHKARIA 14

¹Yu u, Yehowa nhtoi du yang, amyu masha ni nang kaw na kashun la ai lanep, na a ka-ang e karan la na mara ai.

²Kaning rai nme law, Yerusalem mare hpe hpyen gasat na matu, maigan amyu ni mahkra hpe, ngai jahpawng na nngai: shanhte gaw dai mare hpe gasat la nhtawm, nta ni hpe hpya lu hpya sha nna, num ni hpe aroi arip di na mara ai; mare masha ka-ang hkup bawng dung wa timung, naw ngam nga ai masha ni gaw, dai mare hta naw nga lu na mara ai.

³Shaloi Yehowa gaw, hpyen majan aten e gasat gala nga ai hte maren, ndai amyu ni hpe gasat sa wa na ra ai.

⁴Dai shani hta, shi a lagaw, Yerusalem a sinpraw maga na Tsanlun bum ntsa e tsap nna, Tsanlun bum gaw, sinpraw maga kaw nna sinna maga du hkra, ka-ang brang ga wa ai hte, grai kaba ai kadit tai na ra ai: dai bum a chyen mi gaw, dingdung maga de, chyen mi gaw, dingda maga de, sit wa na ra ai.

⁵Shing rai nanhte gaw, nye a bum yan a lapran kadit lam hku hprawng wa na marin dai; kaning rai nme law, dai bum lapran a kadit gaw, Azela shara du hkra dam na ra ai: gaja wa, Yuda hkawhkam Uzia lakhtak e, dai nnang nawn majaw, nanhte hprawng gat ai hte maren, bai hprawng gat na marin dai; nye a Karai Kasang Yehowa gaw sa du nna, chyoi pra ai ni yawng shi hte rau lawm na mara ai.

⁶Dai shani e nhtoi n htoi na ra ai; nhtoi hkum ni n pru mat na ra ai:

⁷rai timung, dai gaw Yehowa chye ai nhtoi nan, rai nga ai: shani mung n rai, shana mung n rai; nrim hpawa e nhtoi htoi na ra ai.

⁸Dai shani e, Yerusalem mare kaw na, asak hka lwi pru na ra ai; chyen mi gaw sinpraw nawng de, bai chyen mi gaw sinna nawng de, ang wa na ra ai: dai gaw nlum ta e rai timung, kashung ta e rai timung, lwi nga na ra ai.

⁹Shaloi Yehowa gaw mungkan ting a Hkawhkam tai na ra ai: dai shani e, Yehowa gaw langai sha rai nga nna, shi a amying langai sha, tai na ra ai.

¹⁰Mungdan ting, Geba kawng kaw nna, Yerusalem a dingda maga na Rimon shara du hkra, layang ga tai na ra ai: dai mare daju chyawm gaw, sharawt shatsaw ai hkrum nna, Ben-yamin chyinghka kaw nna, shawng na chyinghka hte njut chyinghka du hkra, Hanaela langchyi kaw nna, hkawhkam a tsabyi htumbyen du hkra, de a htingra hta e, de nga na ra ai.

¹¹Mare masha ni de a kata de shanu nga nna, htawm hpang de dagam dala hkrum na n rai: Yerusalem mare gaw, angwi apyaw nga lu na ra ai.

¹²Yerusalem mare hpe gasat sa wa ai amyu ni mahkra hpe, Yehowa jaw na ari zinli, da ndai rai nga ai: shanhte naw hkrung nga yang pyi, shanhte a hkum shan yat mat nna, shanhte a myi tum ni yat mat na hte, shanhte a shinglet ni n-gup kata e, yat mat na ra ai.

¹³Dai shani e, Yehowa kaw na kabring kabrawng kaba, shanhte a ka-ang e byin pru wa ai hte, langai hte langai tinang manang wa a lata hpe magra jum nna, shanhte shada da gasat hkat na mara ai.

¹⁴Yuda mung, Yerusalem makau e hpyen gasat nga na ra ai: grup yin e nga ai maigan amyu ni a sutgan, ngu ai, aja, gumhpraw, hpun palawng law law wa, sumpum nga na ra ai.

¹⁵Shing rai dai hpyen dap e lawm ai, gumra, lawze, gawla-uk, lawgung hte yamnga mahkra mung, dai baw ari zinli hkrum na mara ai.

¹⁶Ya, Yerusalem mare hpe gasat sa wa ai masha amyu ni hta na, naw ngam nga ai ni langai hte langai, Zaw nawng zaw wa up ai Yehowa ngu ai, Hkawhkam wa hpe nawku na matu mung, dai sum poi hta lawm na matu mung, laning hte laning lung wa na mara ai.

¹⁷Zaw nawng zaw wa up ai Yehowa ngu ai Hkawhkam wa hpe, nawku na matu, Yerusalem mare de n lung wa ai, ga ntsa ting hta na amyu langai ngai nga ai rai yang, shanhte a ntsa e marang n htu na ra ai.

¹⁸Egutu amyu masha ni, n sa, n lung wa ma yang, shanhte a ntsa e mung, marang n htu na ra ai: dai hta n-ga, sum poi hta lawm na matu, n lung wa ai amyu ni hpe, Yehowa jaw ai ari zinli, shanhte a ntsa e du na ra ai.

¹⁹Da ndai gaw, sum poi hta lawm na matu n lung wa ai, Egutu amyu masha ni hte, maigan amyu ni mahkra hkrum na yubak rai nga ai.

²⁰Dai shani e, Yehowa a matu chyoi pra nga ai, nga nna, gumra dingsi ni hta ka shakap na mara ai: Yehowa a nta hta rawng ai di ni gaw, tawn hkungri man e nga ai gawm ni hte maren, chyoi pra na ra ai.

²¹Dai hta n-ga, Yerusalem mare hte Yuda mung hta nga ai di ni yawng, Zaw nawng zaw wa up ai Yehowa a matu, chyoi pra na ra ai; hkungga nawng ya ai ni yawng sa nna, dai di ni hpe la nhtawm, shan shadu na mara ai: dai shani kaw nna, Zaw nawng zaw wa up ai Yehowa a nta hta, Hkanani masha lawm sa na n rai.