Read Jinghpaw Hanson Version Bible ZEHKARIA 3 Bible Online

ZEHKARIA 3 - Jinghpaw Hanson Version Bible bible

ZEHKARIA 3

¹Bai shi gaw, hkinjawng agyi kaba Yoshua gaw Yehowa a lamu kasa a man e tsap nga ai hpe mung, Satan gaw shi hpe mara shagun na matu, shi a hkra maga e tsap nga ai hpe mung, ngai hpe madun nngai.

²Shaloi Yehowa gaw, “Satan e, Yehowa nang hpe daru u ga; Yerusalem mare hpe lata la ai Yehowa gaw, nang hpe gaja wa daru u ga: ndai gaw, wan hta na gare la ai wan nhtaw sha rai nga ai, n rai ni?” ngu nna Satan hpe tsun wu ai.

³Ya Yoshua gaw, agang chyalang re ai hpun palawng bu hpun nna, lamu kasa a man e tsap nga ai.

⁴Shaloi lamu kasa gaw, “Agang chyalang re ai hpun palawng raw kau mu,” ngu nna shi a man e tsap nga ai ni hpe tsun mu ai. Bai shi gaw Yoshua hpe mung, “Yu u, na a mara hpe ngai raw kau ni ai rai nna, tsawm htap ai hpun palawng nang hpe jahpun na nngai,” ngu wu ai.

⁵Ngai mung, “San seng ai lagup shi hpe shagup ya u ga,” ngu nna hpyi nngai; shing rai shanhte gaw, san seng ai lagup shi hpe shagup ya nna, shi hpe shabu jahpun mu ai: Yehowa a lamu kasa mung, makau e tsap nga ai.

⁶Bai Yehowa a lamu kasa gaw, Yoshua hpe sakse hkam nna,

⁷“Zaw nawng zaw wa up ai Yehowa ning nga ai, ‘Nang gaw nye a lam ni hta hkan hkawm nna, nye a ga matsun hpe hkan nang nga yang, nye a nta na tara agyi nang tai nna, nye a wang ni hpe sin lu na ndai: grup yin e tsap nga ai ni a ka-ang e, nang mung ahkang aya lu la na ndai.

⁸Hkinjawng agyi Yoshua e, nang hte na a man e dung nga ai manang ni, madat mara mu; shanhte gaw kumla tai ai masha rai nga ma ai: kaning rai nme law, yu mu, nye a shangun ma ngu ai, Makrung hpe, ngai paw pru shangun na nngai.

⁹Yoshua man e ngai shadun da ai nlung hpe mada yu mu; nlung langai mi hta myi sanit tu nga ai; yu u, dai hta tawk ang ai hpe ngai tawk ka da nna, lani mi hta sha dai mungdan a shut ai mara hpe, htawm kau na nngai,’ nga nna Zaw nawng zaw wa up ai Yehowa tsun ai.

¹⁰Dai shani e nanhte langai hte langai, tinang a tsabyi ru hte lakum hpun npu e, htingbu htingbyen ni hpe shaga na myit dai,” nga nna Zaw nawng zaw wa up ai Yehowa tsun ai.