Read Jinghpaw Hanson Version Bible ZEHKARIA 4 Bible Online

ZEHKARIA 4 - Jinghpaw Hanson Version Bible bible

ZEHKARIA 4

¹Ngai hte ga tsun ai lamu kasa bai sa du nna, yup pyaw ai wa hpe jasu ai zawn, ngai hpe jasu let,

²“Nang hpa mu n ta?” nga nna ngai hpe san yang, ngai gaw, Ngai mada yu nna, “yu u, ja hte galaw ai pyengdin shadun hpe ngai mu nngai; de a matu e sau di langai mi hte pyengdin sanit rai nga ai; dai pyengdin langai hte langai a matu sau pyawng sanit matut nga ai:

³de a makau e tsanlun hpun lahkawng tu nna, sau di a hkra maga langai mi, pai maga langai mi, rai nga ai,” ngu nna htan nngai.

⁴Bai ngai gaw, “Nye a Madu e, ndai ni hpa rai nga ma ta?” ngu nna ngai hte ga tsun ai lamu kasa hpe san nngai.

⁵Shaloi ngai hte ga tsun ai lamu kasa gaw, “Ndai hpa rai nga ai, nang n chye n ni?” nga nna ngai hpe san yang, “N chye nngai, Madu e,” ngu nna htan we ai.

⁶Shaloi dai wa gaw, “Da ndai gaw, N-gun atsam hte n rai, hpung shingkang hte n rai, nye a Wenyi hte sha dang lu na ra ai,” nga nna Zaw nawng zaw wa up ai Yehowa tsun ai hte, Zerubabela hpang de du ai Yehowa a mungga rai nga ai.

⁷“Bum kaba e, nang kadai rai n ta?” “nang gaw Zerubabela man e layang tai na ndai; shi gaw magum nlung hpe mara da nna, masha ni gaw, Dai hta chyeju nga u ga, chyeju nga u ga, nga nna jahtau garu na mara ai,” nga nna ngai hpe tsun ai.

⁸Dai hta n-ga, Yehowa a mungga ngai kaw du nna,

⁹“Zerubabela lata gaw ndai nta a npawt nhpang, gaw da nu ai; shi a lata hte shangut na ra ai; shing rai, Zaw nawng zaw wa up ai Yehowa gaw, nanhte hpang de ngai hpe shangun dat ai, nang chye lu na ndai.

¹⁰Kaning rai nme law, amu kaji shabyin ai nhtoi hta, n kaw n law di ai, kadai wa rai ta? Zerubabela lata hta dai shadawn sumri lang nga ai hpe, shanhte mu jang, ndai sanit kabu na mara ai; dai pyengdin sanit chyawm gaw mungkan ting hta hproi gat ai Yehowa a myi rai nga ai, nga ai.”

¹¹“Shaloi ngai gaw, Pyengdin shadun a hkra maga hte pai maga tu ai, tsanlun hpun lahkawng, hpa rai ta? ngu nna san nngai.

¹²Bai ngai gaw, ‘Aja nsan ai asau ru shalen dat ai, aja pyawng lahkawng a makau e nga ai, tsanlun lakung lahkawng gaw, hpa rai ta?’ ngu nna kahtap san nngai.

¹³Shaloi dai lamu kasa gaw, ‘Ndai hpa rai nga ai hpe, nang n chye n ni?’ nga nna san yang, ‘N chye nngai, Madu e,’ ngu nna ngai htan we ai.

¹⁴Dai rai nna shi gaw, ‘Dai lakung yan gaw, mungkan ting a Madu man e tsap nga ai, namman chya hkam ai yan, rai nga ma ai,’ nga ai.”