Read Jinghpaw Hanson Version Bible ZEHKARIA 5 Bible Online

ZEHKARIA 5 - Jinghpaw Hanson Version Bible bible

ZEHKARIA 5

¹Bai ngai mada yu nna, yu u, pyen yawn nga ai laika katsu hpe, ngai mu nngai.

²Shaloi shi gaw, “Nang hpa mu n ta?” nga nna ngai hpe san yang, “Pyen yawn nga ai laika katsu hpe mu nngai; de a galu de dawng hkun, nda de dawng shi rai nga ai,” ngu nna htan nngai.

³Shaloi shi gaw, “Da ndai gaw mungdan ting hta bra nga ai dagam dala lam rai nga ai: kaning rai nme law, lagu lagut yawng, dai laika man mi a ga hte maren, jahtum kau ai hkrum na ra ai; masu lam dagam ai ni langai hte langai laika man mi a ga hte maren, jahtum kau ai hkrum na mara ai.

⁴Ngai dai laika katsu hpe shapraw dat nna, dai gaw lagu lagut wa a nta hta mung, nye a mying gang nna masu lam dagam ai wa a nta hta mung, shang nna, shi a nta ka-ang e nga nga let, dai nta a ngau ni nlung ni hte hpawn, dai nta hpe shamyit kau na ra ai,” nga nna Zaw nawng zaw wa up ai Yehowa tsun ai.

⁵Shaloi ngai hte ga tsun ai lamu kasa gaw pru nna, “Ya pru wa ai arai hpe mada yu u,” nga nna ngai hpe tsun ai.

⁶Shaloi ngai gaw, “Ndai hpa rai ta?” ngu nna san we ai. Shi gaw, “Ya pru wa ai gaw, Dawm rai nga ai,” nga ai. Bai shi gaw, “Dai gaw, mung ting hta shanhte myit maw ai lam rai nga ai,” nga nna kahtap tsun ai:

⁷ya, yu u, din din re ai machyu magap hpe hpaw mahka nna, dai dawm kata e num langai mi dung nga ai hpe, ngai mu nngai.

⁸Shaloi lamu kasa gaw, “Ndai gaw yubak mara rai nga ai,” nga nna tsun let, dai num hpe dawm kata de kanawng bang nna, dawm mahka e machyu pa hte magap da wu ai.

⁹Bai ngai mada yu yang, yu u, nbung zawn chyang ai, singkaw tu ai num lahkawng paw pru nga ai: shan gaw mali tau singkaw zawn, singkaw tu nna, dai dawm hpe aga hte sumsing lamu lapran e hpai shalun mu ai.

¹⁰Shaloi, ngai hte ga tsun ai lamu kasa hpe, “Shan gaw dai dawm hpe gade hpai shalun mu ta?” ngu nna san we ai.

¹¹Shi gaw, Dai dawm a matu, Shina mung hta e nta galaw na, hpai lung wa ma ai: dai hpe shachyip ngut jang, dai dawm hpe, de a shara hta shadun da na ra ai,” nga nna ngai hpe htan ai.