Read Jinghpaw Hanson Version Bible ZEHKARIA 6 Bible Online

ZEHKARIA 6 - Jinghpaw Hanson Version Bible bible

ZEHKARIA 6

¹Bai ngai mada yu yang, yu u, bum lahkawng a lapran na, leng mali dan pru nga ai; dai bum yan gaw, magri bum rai nga ai.

²Shawng na leng hta gumra ahkyeng, lahkawng ngu na leng hta gumra achyang,

³masum ngu na leng hta gumra ahpraw, mali ngu na leng hta, n-gun ja nna ateng apang re ai gumra, rai nga ai.

⁴Shaloi ngai hte ga tsun ai lamu kasa hpe, “Nye a Madu e, ndai ni hpa rai ta?” ngu nna ngai san we ai.

⁵Lamu kasa gaw, “Dai leng ni gaw, ginding aga ting a Madu a man e tsap nga ai kaw na, pru wa ai, sumsing lamu na nbung mali rai nga ma ai.

⁶Gumra achyang dun ai leng gaw, dingdung maga de rai wa ma ai; gumra ahpraw gaw, dai ni a hpang de hkan nang ma ai; ateng apang re ai gumra ni gaw, dingda mung de rai wa ma ai,” nga nna ngai hpe htan ai.

⁷N-gun ja ai gumra ni mahtang, ga ntsa hta kahkrang hkawm na ahkang hpyi ma ai; dai rai nna Madu gaw, “Pru mu, ga ntsa hta kahkrang hkawm mu,” ngu nna tsun mu ai: shing rai dai ni gaw, ga ntsa hta e kahkrang hkawm ma ai.

⁸Bai dai lamu kasa gaw, “Yu u, dingdung mung de sa wa ai ni gaw, dingdung mung hta e nye a myit shakawp manu ai,” nga nna ngai hpe jahtau tsun ai.

⁹Bai Yehowa a mungga ngai kaw du nna,

¹⁰“Bawng dung hkrum nna, Babelon mung na bai wa ai, Heldai, Tobiya, Yedaia amyu masha ni hta na shaga la nna, dai shani jang, Zehpania kasha Yosia nta de sa shang u:

¹¹gaja wa, shanhte kaw na, aja gumhpraw la nna, ja janmau ni galaw nhtawm, Yehozadak a kasha, hkinjawng agyi Yoshua baw hta shagup mu:

¹²bai shi hpe ning ngu tsun u, ‘Zaw nawng zaw wa up ai Yehowa ning nga ai, Makrung mying ai wa hpe, mada yu u; shi gaw tinang a shara hta tu kaba wa nna, Yehowa a nawku Htingnu hpe, gaw da na ra ai:

¹³gaja wa shi nan, Yehowa a nawku Htingnu hpe gaw da nna, daru magam dan hkung let, shi a tingnyang hta dung nna up na ra ai; shi gaw shi a tingnyang ntsa e, hkinjawng mung tai nna, dai aya lahkawng a majaw, ngwipyaw na lam hpaji daw na ra ai.

¹⁴Dai janmau ni chyawm gaw, Helem, Tobiya, Yedaia, hte Zehpania kasha Hen a matu, Yehowa a nawku Htingnu hta, masat dingsat sakse tai na ra ai.

¹⁵Shing rai tsan tsan e rai nga ai ni, sa du nna, Yehowa nawku Htingnu hpe, gaw da karum na mara ai rai nna, Zaw nawng zaw wa up ai Yehowa gaw, nanhte hpang de ngai hpe shangun dat ai, nanhte chye lu na marin dai: nanhte gaw, nanhte a Karai Kasang Yehowa a nsen hpe, atsawm sha madat myit yang gaw, ndai lam byin na ra ai,’ nga ai.”