Read Jinghpaw Hanson Version Bible ZEHKARIA 7 Bible Online

ZEHKARIA 7 - Jinghpaw Hanson Version Bible bible

ZEHKARIA 7

¹Ya hkawhkam Dari hkaw dung ai, mali ning na, Hkesle ngu ai shata jahku a mali ya shani e, Yehowa mungga Zehkaria hpang de du nga ai.

²Kaning rai nme law, Yehowa a man e tawngban nga na hte, Nde nlaw ning ngai galaw ai hte maren, dai shata manga hta e hkrap ngu hkrap ngoi let, ngai hkrai nga nga na gaw, naw galaw mai na rai ni? ngu nna Zaw nawng zaw wa up ai Yehowa nta na hkinjawng ni hte, myihtoi ni hpe, sa san yu na matu,

³Betela mare na ni, Sharezera yan Regem-melek hte shan hte rau nga ai ni hpe, shangun dat mu ai.

⁴Shaloi, Zaw nawng zaw wa up ai Yehowa a mungga ngai kaw du nna,

⁵Mung masha ni mahkra hte, hkinjawng ni hpe ning ngu tsun mu: “Nanhte gaw, ndai sanit shi ning tup, shata manga hte shata sanit hta, lusha gam nna hkrap ngu hkrap ngoi nga yang, gaja wa, ngai ra ai hte maren, lusha gam nga myit ni?

⁶Bai nanhte lu sha yang, tinang ra ai hte maren lu sha myit dai, n rai ni?

⁷Yerusalem mare hte, de a grup yin e nga ai mare ni hta, masha shanu nga nna, ngamu ngamai law nga ai hte, Dingda mung hte layang ga hta masha naw shanu nga ai aten e, moi na myihtoi ni a n-gup hte Yehowa jahtau tsun ai mungga hpe, nanhte madat mai ai, n rai myit ni?” nga ai.

⁸“Shaloi Yehowa a mungga Zehkaria kaw du nna,

⁹‘Malang ai hku tara dara mu; langai hte langai tinang a hpunau wa hpe n-gaw nwai ai hte matsan dum ai myit madun mu;

¹⁰gaida gaina, chyahkrai nmai, shingbyi manam wa hte matsan mayan ni hpe, adip arip hkum di mu; nanhte hta na kadai rai timung, tinang a hpunau wa hpe, n kaja ai hku hkum maw myit,’ nga nna Zaw nawng zaw wa up ai Yehowa a tsun nga timung,

¹¹shanhte madat mara ma ai n rai; n na la hkra, shanhte gaw tinang a lahpa hpe ari kaye nna, ana hpe pat kau shajang ma ai.

¹²Gaja wa, jep ai tara a ga hpe mung, moi na myihtoi ni a n-gup hte, Zaw nawng zaw wa up ai Yehowa a Wenyi shangun dat ai mungga hpe mung, n na la lu hkra, shanhte gaw tinang a myit masin hpe, nhpai lung zawn shaja nga ma ai: dai re ai majaw, Zaw nawng zaw wa up ai Yehowa kaw na, sindawng kahtet ai tsin-yam kaba pru nga ai.

¹³‘Shing rai, ngai shaga yang, shanhte n madat ai zawn, shanhte shaga yang, ngai mung n madat ni ai,’ nga nna Zaw nawng zaw wa up ai Yehowa tsun ai:

¹⁴Shanhte n chye ai maigan amyu ni yawng hta, ngai shanhte hpe bungsha hte ayai kau na nngai. Shing rai dai mungdan gaw, shanhte pru wa ai hpang, shingran katsi ai shara tai nna, kadai mung sa sa wa wa nga ai n rai: kaning rai nme law, shanhte gaw dai ngwipyaw ai mungdan hpe katsi katsang shara shatai kau manu hka,” nga ai.