Read Jinghpaw Hanson Version Bible ZEHKARIA 8 Bible Online

ZEHKARIA 8 - Jinghpaw Hanson Version Bible bible

ZEHKARIA 8

¹Bai, Zaw nawng zaw wa up ai Yehowa a mungga ngai kaw du nna,

²“Ngai gaw Ziun bum hpe grai wa nja nhpra rai nga nngai: grai wa myit kahtet nna shi a matu nja nhpra nga nngai,” nga nna Zaw nawng zaw wa up ai Yehowa tsun ai, nga ai.

³Yehowa ning nga ai: “Ziun bum de ngai nhtang wa nna, Yerusalem mare ka-ang e shanu nga na nngai: Yerusalem mare hpe, Tengman ai mare, ngu nna mung, Zaw nawng zaw wa up ai Yehowa a bum hpe, Chyoi pra ai bum, ngu nna mung, shamying na mara ai,” nga ai.

⁴Zaw nawng zaw wa up ai Yehowa ning nga ai: “Yerusalem mare lam ni hta aprat kaba nna, dawhkrawng lang ai gumgai dingla ni, naw shanu nga na mara ai.

⁵Bai, ginsup nga ai numsha lasha ma ni gaw, mare lam ni hta hpring chyat nga na mara ai,” nga ai.

⁶Zaw nawng zaw wa up ai Yehowa ning nga ai: “Ndai amu gaw, naw ngam nga ai mung masha ni a man e, dai aten hta mauhpa nsan nga timung, nye a man e rai nga a ni?” nga nna Zaw nawng zaw wa up ai Yehowa tsun ai.

⁷Zaw nawng zaw wa up ai Yehowa ning nga ai: “Yu mu, ngai gaw nye a amyu masha ni hpe sinpraw mung hte sinna mung de na, hkye hkrang la na nngai;

⁸ngai shanhte hpe woi wa nna, shanhte gaw Yerusalem mare kata e shanu nga na mara ai; shing rai shanhte gaw nye a amyu tai nna, ngai gaw shanhte a tengman ai hte dinghpring ai Karai Kasang tai na nngai,” nga ai.

⁹Zaw nawng zaw wa up ai Yehowa ning nga ai: “Dai nawku Htingnu hpe gaw da na nga, Zaw nawng zaw wa up ai Yehowa a nta a npawt nhpang jung da ai shani e nga ai myihtoi ni a n-gup ga hpe, ndai aten e na lu ai ni e, nanhte a lata n-gun shaja mu.

¹⁰Kaning rai nme law, ndai nhtoi ni a shawng e nchyang shabrai n nga, Nga ugun mung n nga ai; hpyen ni a majaw, pru wa shang wa ai ni a matu mung, pyaw shara n nga ai: hpa majaw nga yang, ngai gaw masha langai hte langai hpe, tinang a htingbu wa hte hpyen shatai nngai.

¹¹Ya chyawm gaw, ndai naw ngam nga ai amyu masha ni hpe, moi shawng na ni hpe zawn, ngai n di na ni ai,” nga nna Zaw nawng zaw wa up ai Yehowa tsun ai.

¹²“Ngwipyaw nli ngai gat nngai; tsabyi ru si si nna, lamu ga gaw, nsi naisi shatut na ra ai; sumsing lamu gaw mari jahkrat nna, ndai naw ngam nga ai amyu masha ni gaw, ndai mahkra hpe madu lu na, ngai shabyin na nngai.

¹³Yuda dap e, nang mung Israela dap e, nanhte gaw maigan amyu ni hta dagam dala shara tai yu ai zawn, ngai nanhte hpe hkye hkrang la nna, nanhte gaw gumring gumrat shara tai na marin dai: hkum hkrit myit: nanhte a lata n-gun shaja mu.”

¹⁴Kaning rai nme law, Zaw nawng zaw wa up ai Yehowa ning nga ai: “Nanhte a nji nwa ni gaw, ngai hpe pawt bu shangun yang, shanhte hpe ari ahpri jaw na, ngai myit shatawng da nna, myit n malai nga ai hte maren,

¹⁵ndai aten e ngai bai myit yu nna, Yerusalem mare hte Yuda dap hpe mai kaja ai hku galaw na, myit shatawng da nngai: hkum hkrit myit,” nga nna Zaw nawng zaw wa up ai Yehowa tsun ai.

¹⁶“Nanhte hkan galaw na lam da ndai rai nga ai: Langai hte langai tinang a htingbu wa hte, tengman ai ga tsun mu; nanhte a mare chyinghka ni hta tengman ai hte ngwipyaw ai hku hkan nna, tara dara mu;

¹⁷nanhte hta kadai mung, tinang a htingbu wa hpe, n kaja ai hku hkum maw myit; n teng ai hku dagam ai hpe, hkum sharawng myit: kaning rai nme law, ndai lam mahkra hpe ngai n dawng nngai,” nga nna Yehowa tsun ai.

¹⁸Bai, Zaw nawng zaw wa up ai Yehowa mungga ngai kaw du nna,

¹⁹Zaw nawng zaw wa up ai Yehowa ning nga ai: “Shata mali hta e mung, shata manga hta e mung, shata sanit hta e mung, shata shi hta e mung, shata sanit hta e mung, shata shi hta e mung, matsing da ai lusha gam ai aten ladaw ni gaw, Yuda masha ni a matu kabu gara, myit pyaw ai hte sharawng awng ai poi ni tai na ra ai: dai re ai majaw, tengman ai hte ngwipyaw ai lam hpe tsawra nga mu.”

²⁰Zaw nawng zaw wa up ai Yehowa ning nga ai: “Masha amyu ni hte mare kahtawng na masha ni law law wa, naw sa wa na mara ai:

²¹mare langai mi a masha ni gaw, kaga mare de sa wa nna, Yehowa man e tawngban na matu mung, Zaw nawng zaw wa up ai Yehowa hpe hkan tam na matu mung, ‘anhte alawan sa wa saga; ngai mung sa na nngai,’ nga nna tsun shajang na mara ai.

²²Gaja wa, masha amyu ga daga hte, n-gun ja ai amyu baw ni gaw, Yerusalem mare hta, Zaw nawng zaw wa up ai Yehowa hpe hkan tam nna, Yehowa man e tawngban na matu, sa du na mara ai.”

²³Zaw nawng zaw wa up ai Yehowa ning nga ai: “Dai aten hta ga amyu baw kaga ga tsun ai marai shi gaw, Yuda masha wa a nba lawai matu jum let, ‘Karai Kasang nanhte hte rau rai nga ai, anhte na yu saga ai majaw, anhte nanhte hte rau sa na ga ai,’ nga nna tsun na mara ai,” nga ai.