Read Jinghpaw Hanson Version Bible MAHTE 12 Bible Online

MAHTE 12 - Jinghpaw Hanson Version Bible bible

MAHTE 12

¹Dai aten hte hta Yesu gaw laban nhtoi e, hkaibang yi hku ga hkawm wa ai, shi a sape ni mahtang kawsi hkrum ma ai rai nna, mam nsi di la nhtawm, sha ma ai.

²Hparishe ni dai mu jang, shanhte gaw, “Yu u, laban nhtoi e n mai galaw ai amu, na a sape ni galaw ma ai,” ngu nna shi hpe tsun mu ai.

³Shi shanhte hpe, “Dawi hte shi kaw hkan nang ai ni hte rau kawsi hkrum ma yang, shi gaw Karai Kasang a nta de shang nna,

⁴shi mung, shi hte rau nga ai ni mung, n mai sha ai, hkinjawng ni chyu sha mai sha ai madun da ai muk ni hpe la sha nu ai lam hpe pyi, nanhte n hti yu myit ni?

⁵Bai, laban nhtoi e dai Htingnu hta nga ai hkinjawng ni, laban nhtoi hpe wu kau mu timung, mara n nga ai gaw, dai tara laika hta nanhte n hti yu myit ni?

⁶Nanhte hpe ngai tsun made ai gaw, Dai Htingnu hta grau kaba ai mahtang gaw, nang e rai nga ai.

⁷Hkungga jaw ai lam n rai, matsan dum ai lam hpe sha ngai tsaw nngai, nga ai ga hpe nanhte chye mu taw gaw, mara n kap ai ni hpe, nanhte mara shagun na myit dai n rai:

⁸kaning rai nme law, dai Masha Kasha gaw, laban nhtoi a Madu rai nga ai,” ngu mu ai.

⁹Bai, dai shara kaw nna shi sat sa wa nhtawm, shanhte a tara jawng hta shang ai:

¹⁰ya yu mu, lata katsing si ai masha langai mi nga ai rai nna, shanhte gaw shi hpe, mara shagun lu u ga, “Laban nhtoi hta e mai shamai ya a ni?” ngu nna, shi hpe san mu ai.

¹¹Dai majaw shi shanhte hpe, “Nanhte hta sagu langai mi lu ai masha lawm nna, dai gaw laban nhtoi e nhkun hta hkrat yang, dai hpe n dun shaw la ai wa langai ngai nga na myit ni?

¹²Masha gaw sagu hta gade grau hpu a hka! Dai rai nna, laban nhtoi hta amu kaja galaw na sut nga ai,” ngu mu ai.

¹³Shaloi shi gaw dai wa hpe, “Na a lata ladawn u,” ngu wu ai. Dai majaw shi ladawn nna, dai gaw maga mi na zawn majing rai mat lu ai.

¹⁴Hparishe ni chyawm gaw pru wa nna, shi hpe kaning di jahten kau lu na lam bawng nga ma ai.

¹⁵Yesu dai hpe chye jang, kaga de htawt mat wa ai. Masha law law mung, shi kaw hkan nang ma ai rai nna, shanhte nlang hte hpe shamai shatsai di nhtawm,

¹⁶shi a lam n shabrawng dat mu ga, shanhte hpe ginhtim dat mu ai.

¹⁷Dai byin wa ai lam gaw, “Ngai lata la ai, nye a shangun ma hpe, Ngai myit sharawng awng ai nja nhpra wa hpe, yu mu.

¹⁸Nye Wenyi shi a ntsa e ngai bang da ya nna, Shi masha amyu ni hpe dawdan ai lam tsun dan na mu ai.

¹⁹Shi gaw n gasat, n jahtau na rai nna, Shi a nsen hpe lam hkan e n na lu na mu ai.

²⁰Tara dara ai lam nlaw wa ai du hkra, Bye dip kau ai mai-aw hpe shi n shadaw na hte Nhkut hku ai wan shat hpe, n sat kau na wu ai.

²¹Shi a amying hta masha amyu ni myit mada na mara ai,” nga nna, myihtoi Esaia tsun ai ga dik wa na matu byin wa sai.

²²Dai shaloi jang, myi kyaw ai hte n chye shaga ai nat kap ai wa langai mi hpe, shi kaw woi bang mu ai: shi gaw dai wa hpe shamai ya nu ai rai nna, n chye shaga ai wa gaw shaga lu ai hte myi mu lu nu ai.

²³Dai majaw shawa masha ni mau mahka nna, “Ndai wa gaw Dawi a kasha rai nga a hka?” nga nna tsun shajang ma ai.

²⁴Hparishe ni mahtang dai hpe na jang, “Nat ni a du Bezebula hte n rai yang gaw, ndai wa nat ni hpe shaden kau lu na n rai,” nga ma ai.

²⁵Shanhte a myit mang ai hku chye ya mu ai majaw, shi shanhte hpe tsun mu ai gaw, “Dinghku brun ai mungdan shagu gaw hten bya mat na ra ai: gara mare, gara nta rai timung, dinghku bra mat wa yang, hking nga lu na n rai.

²⁶Satan gaw Satan hpe shaden kau ai rai yang gaw, shi gaw tinang hte hka bra wa nga ai: dai rai taw gaw, shi a mungdan kaning rai nme hking lu na lu ta?

²⁷Ngai chyawm gaw Bezebula hte sha nat ni hpe shaden kau mawe ai rai yang gaw, nanhte a kasha ni kadai wa hte shaden kau nga ma ta? Dai majaw shanhte gaw nanhte hpe tara dara ai agyi ni tai na mara ai.

²⁸Karai Kasang a wenyi hte nat ni hpe ngai shaden kau mawe ai rai yang gaw, Karai Kasang a mungdan nanhte kaw du sai rai nga ai.

²⁹N-gun ja ai wa hpe shawng n gyit kau yang gaw, shi a arai kashun la na, n-gun ja ai wa a nta nhku de kadai shang lu na rai ta? gyit da yang she shi a nta hpe hpya lu na rai nga ai.

³⁰Ngai hpang maga de n nga ai wa gaw, nye a gumlau maga de rai nga ai: ngai hte kahkyin gumdin n re ai wa gaw, ayai aya rai nga ai.

³¹Dai majaw ngai nanhte hpe tsun made ga, yubak hte shatan nhkan ga amyu myu hpe, masha kaw na raw dat kau lu na lam hku nga ai; rai timung, Wenyi hpe shatan nhkan ga, raw dat kau lu na lam n nga ai.

³²Dai Masha Kasha hpe ga hte shut hpyit ai wa kadai hpe mung, mara raw dat kau ya na lam hku nga ai; Chyoi pra ai Wenyi hpe ga hte shut hpyit ai wa chyawm gaw, ndai aprat hta rai timung, hpang na aprat hta rai timung, raw dat kau ya ai hkrum lu na n rai.

³³Dai hpun kaja nga ai hte, de a asi mung kaja nga ai, ngu mu: shing n rai, dai hpun n kaja nga ai hte, de a asi n kaja nga ai, ngu mu: kaning rai nme law, hpun hpe gaw tinang a asi hte chye ginhka lu ai.

³⁴Pu htum amyu ni e, nanhte n hkru nga myit dai mi, kaja ai ga kaning rai tsun lu na myit ta? kaning rai nme law, kraw hta hpring chyat nga ai kaw na, n-gup de tsun nga ai.

³⁵Kaja ai wa gaw tinang a kaja ai sutdek hta na kaja ai arai shapraw wu ai; n kaja ai wa mahtang gaw, n kaja ai sutdek hta na n kaja ai arai shapraw wu ai.

³⁶Nanhte hpe ngai tsun made ga, masha ni tsun nga ai, tinang a kaman lila ga yawng hte a majaw, tara dara ai nhtoi hta e, jahpan dan na hkrum na mara ai.

³⁷Kaning rai nme law, na a ga majaw nang awlaw ai hkrum na ndai: shing n rai, na a ga majaw, dawdan ai hkrum na rin dai,” ngu mu ai.

³⁸Dai shaloi laika ka ai sara ni hte Hparishe ni nkau mi shi hpe htan nna, “Sara e, nang dan ai lamik kumla langai mi, anhte mu mayu ga ai,” ngu mu ai.

³⁹Shi htan let shanhte hpe tsun mu ai gaw, “N hkru ai hte shut hpyit ai amyu gaw, lamik kumla tam ma ai; myihtoi Yona a lamik kumla hta kaga, hpa lamik kumla mung, shanhte hpe n dan na nme ai.

⁴⁰Yona gaw shani masum ya hte shana masum na du hkra, dai nga kaba a kan kata e rawng nga ai hte maren, dai Masha Kasha mung, shani masum ya hte shana masum na du hkra, ga sung ai kata e rawng nga na ra ai.

⁴¹Tara dara ai nhtoi hta, Ninewe masha ni gaw, ndai prat na amyu hte rau rawt wa nna, shanhte hpe dawdan na maru ai: kaning rai nme law, Yona hkaw tsun ai ga a majaw shanhte myit malai lu ma ai: yu mu, ndai yang e, Yona hta grau kaba ai wa nga nga ai.

⁴²Tara dara ai nhtoi hta, dingda mung na hkawhkam jan gaw, ndai prat na amyu hte rau rawt wa nna, shanhte hpe dawdan na ra ai: kaning rai nme law, shi gaw Shawlumon a hpaji madat na, ga jahtum de na sa du ai: yu mu ndai yang e, Shawlumon hta grau kaba ai wa nga nga ai.

⁴³Dai n seng ai nat chyawm gaw, masha hta na pru nhtawm, hkraw hkun ai shara hkan e hkawm sa wa nna, simsa na shara tam wu timung, n mu nu ai.

⁴⁴Shaloi shi gaw, Ngai pru kau da se ai nta de, ngai bai nhtang wa na nngai, nga ai: bai du wa yu yang, dai nta gaw asan awan di nna, ye kau ai hte shatsawm da ai hpe, mu nu ai.

⁴⁵Shaloi shi nhtang sa nna, shi hta grau n hkru ai nat sanit hpe shaga wa nhtawm, shanhte shang nna dai yang e a rawng nga ma ai; dai rai nna, dai masha a hpang de na asam gaw, shawng de na hta, grau ru wa lu ai: dai hte maren ndai n hkru ai amyu hta byin wa na ra ai,” ngu mu ai.

⁴⁶Shawa masha ni hpe ga naw tsun nga yang, shi a kanu hte kanau ni gaw, shi hte ga tsun na nga nna shinggan e tsap nga ma ai.

⁴⁷Dai rai nna marai langai mi gaw, “Yu u, na nnu hte nnau ni, nang hte ga tsun na, shinggan e tsap nga ma ai,” ngu wu ai.

⁴⁸Htan let shi hte ga tsun ai wa hpe shi tsun wu ai gaw, “Ngai nu hte ngai nau ni gaw, kadai ni rai nga ma ta?” ngu wu ai.

⁴⁹Bai, shi a sape ni hpang de shi a lata ladawn nna,

⁵⁰“Ngai nu hte ngai nau ni hpe yu mu: sumsing lamu hta nga ai nye Wa a myit hku hkan galaw ai ni kadai mung, ngai nau, ngai jan, ngai nu, rai nga ma ai,” ngu nna tsun mu ai.