Read Jinghpaw Hanson Version Bible LUKA 1 Bible Online

LUKA 1 - Jinghpaw Hanson Version Bible bible

LUKA 1

¹Shawng nnan kaw nna, tinang lala mu ai ni hte, mungga gun hpai nga ai ni gaw,

²anhte kaw e byin ngut sai lam ni hpe, anhte e hkai dan madan hte maren, maumwi ka hpajang da ai masha law law wa nga ma ai majaw:

³ngai mung yawng mayawng hpe npawt ndung hkren azin ayang tam san la ngut jang,

⁴nang sharin la sai ga a dinggrin nga lit dai hpe, nang chye lu n ga, na a matu matut manoi ka da na, ngai myit lu nngai, arawng lu htum ai Htawhpilu e.

⁵Yuda mung up ai Herod hkawhkam a lakhtak e, Abia hpung hta nang ai, Zakari mying ai hkinjawng langai mi nga ai; shi a madu jan gaw Arun amyu shayi sha ni hta na rai lu ai; shi a amying gaw Elisabet ngu ai, rai nga ai.

⁶Dai yan gaw, Madu a jep ai tara hte hkang da mada yawng hpe htep lahti hkan nang ma ai rai nna, Karai Kasang a man e dinghpring ai yan rai nga ma ai.

⁷Shan gaw kasha n lu ma ai; kaning rai nme law, Elisabet gaw maudung dung nga ai hte, shan lahkawng aprat kaba masai.

⁸Ya shi gaw, shi a hpung hte rau abat wa ang nna, Karai Kasang man e hkinjawng amu gun nga yang,

⁹dai Madu a nta nhku e manam pyaw ai baw shang nat na, hkinjawng htung hte maren, hpaida hte lata la ai hta ang wu ai.

¹⁰Dai manam pyaw nat ai ahkying hta shawa masha ni nlang hte gaw, shinggan e akyu hpyi let nga nga ma ai.

¹¹Shaloi dai Madu a lamu kasa gaw, manam pyaw nat ai hkungri a hkra maga de, shi hpe tsap shadan dan wu ai.

¹²Zakari gaw dai mu jang kajawng nna hkrit kahpra mat nga ai.

¹³Dai lamu kasa chyawm gaw, “Zakari e, hkum hkrit et; nang hpyi ai ga madat ya nit dai rai nna, na madu jan Elisabet gaw na a matu shadang sha shangai na ra ai; shi a amying Yawhan ngu nna, nang shamying ya na ru ai;

¹⁴Na a matu kabu gara ai hte ngwipyaw shara tai na ra ai; shi shangai wa ai a majaw masha lanlak mung, kabu gara wa na mara ai.

¹⁵Kaning rai nme law, shi gaw dai Madu a man e galu kaba wa na ra ai; tsabyi hte chyaru shi lu na n rai; kanu a hkritung nna pyi, Chyoi pra ai Wenyi hte hpring na ra ai.

¹⁶Israela kashu kasha ni law law hpe, shanhte a Madu Karai Kasang hpang de shi kayin wa shangun na maru ai.

¹⁷Kawa ni a myit masin hpe kasha ni hpang de, je hpre ai ni hpe dinghpring ai ni a hpaji ningli lam de kayin wa shangun na hte, dai Madu a matu mazing da ai amyu hpe lajang shachyip da na, Elia a wenyi hte atsam rawng let, shi a shawng numshawn e sa wa na ra ai,” ngu nna shi hpe tsun wu ai.

¹⁸Shaloi Zakari gaw, “Dai gaw ngai kaning di chye lu na we ta? ngai gaw dingla ni ai, nye madu jan mung aprat kaba sali ai,” ngu nna lamu kasa hpe htan wu ai.

¹⁹Dai lamu kasa, “Ngai gaw Karai Kasang a man e tsap nga ai Gabriela rai nga nngai; nang hpe tsun dan wu nga nna, ndai kabu gara shiga tsun shana ya na, ngai hpe shangun dat ni ai.

²⁰Yu u, dai ahkying du yang dik wa na ra ai nye a ga hpe, nang n kam ndai majaw, dai amu byin ai nhtoi du hkra, ga n tsun lu ai ma-a nga na rin dai,” ngu nna shi hpe htan tsun wu ai.

²¹Shawa masha ni gaw Zakari hpe a la nga nna, nawku Htingnu nhku e na na rawng nga mat ai hpe, mau ma ai.

²²Shi pru wa yang shanhte hpe ga n tsun lu ai rai nna, dai nawku Htingnu nhku e shingran mu nu ai hpe, shanhte dum ya ma ai: shi gaw shanhte hpe a dingsi dan nga nna, ma-a let nga nga ai.

²³Ya, shi daw jau ai amu a nhtoi gu jang, shi a nta de bai wa ai.

²⁴Dai hpang shi a madu jan Elisabet gaw na-um nasin hkum rai wa nna, Masha ni a man e ngai hkrum ai shatan nhkan hpe,

²⁵mada mara nna yeng seng kau ya ai nhtoi hta, dai Madu gaw ngai hpe ning di ni ai, nga nna shata manga tup up rawng nga ai.

²⁶Ya, shata kru hta, lamu kasa Gabriela hpe Karai Kasang kaw nna, Galile mung na Nazaret ngu ai mare e nga ai,

²⁷Dawi amyu hta na Yawsep ngu ai wa mahtan da ai mahkawn hpang de shangun dat wu ai: dai mahkawn a amying chyawm gaw Mari ngu ai, rai nga ai.

²⁸Dai lamu kasa gaw Mari kaw du jang, “Chyeju nga lit ga, nang a lu ndai, dai Madu gaw nang hte rau nga nga ai law,” ngu wu ai.

²⁹Mari gaw dai ga majaw masin kahpra nna, ndai shachyen ai ga gaw, kaning nga ai ga rai na ra i? nga nna myit aru yu nga ai.

³⁰Shaloi dai lamu kasa gaw, “Mari e, hkum hkrit et; nang Karai Kasang a man e myi man pa nit dai:

³¹yu u, nang na-um nasin rai wa nna shadang sha shangai na rin dai; shi a amying Yesu ngu nna, nang shamying ya na ru ai.

³²Dai wa gaw galu kaba na ra ai rai nna, Tsaw htum ai wa a Kasha ngu ai hkam la na ru ai; Madu Karai Kasang mung, shi kawa Dawi a tingnyang, shi hpe jaw na wu ai rai nna,

³³shi gaw Yaku a nta ntsa e, htani htana e a up nga na ra ai: shi a mungdan mung htum ngu ai nga na n rai,” ngu nna shi hpe tsun wu ai.

³⁴Shaloi Mari gaw, “Dai gaw kaning rai byin na a ta? ngai la n chye nngai,” ngu nna, lamu kasa hpe tsun wu ai.

³⁵Dai lamu kasa gaw, “Chyoi pra ai Wenyi na ntsa de du nna, Tsaw htum ai wa a atsam nang hpe shingnip ka-up na ra ai; dai re ai majaw shangai na ra ai wa gaw, Chyoi pra ai wa, Karai Kasang a Kasha ngu ai hkam la na ra ai.

³⁶Dai hta kaga, yu u, na a amyu jan Elisabet mung, gumgai rai sayang shadang sha na-um nasin hkum rai nga nna, maudung ngu ai num hta ya shata kru rai wa sai:

³⁷kaning rai nme law, Karai Kasang kaw na hpa mungga muk, atsam kata rai na ra ai n rai,” ngu nna shi hpe htan wu ai.

³⁸Shaloi Mari gaw, “Yu u, Madu a mayam jan ngai rai nga nngai; na a ga hte maren ngai hta rai wa u ga,” ngu wu ai. Shaloi dai lamu kasa gaw shi kaw na wa mat ai.

³⁹Dai nhtoi hte hta e Mari gaw, Yuda mung na bum ga e nga ai mare langai mi de alawan rawt sa nna,

⁴⁰Zakari a nta de shang nhtawm, Elisabet hpe hkrum shaga wu ai.

⁴¹Mari hkrum shaga ai ga Elisabet na la jang, shi a hkritung na ma gaw gumlawt nga ai:

⁴²Elisabet mung Chyoi pra ai Wenyi hte hpring nna nsen kaba hte jahtau let, “Numsha ni hta nang a lu ndai; na a hkritung na ma mung a lu lit dai law.

⁴³Nye Madu a kanu ngai kaw sa du ai gaw, hpa chyeju jaw e rai ra ai i?

⁴⁴Yu u, na a hkrum shaga ai ga nsen nye na hta shang jang, nye hkritung na ma gaw kabu gara ai hte gumlawt li ai.

⁴⁵Kamsham ai numsha gaw a lu ai; kaning rai nme law, dai Madu kaw nna shi hpe tsun ai ga gaw dik wa na ra ai,” nga ai.

⁴⁶Shaloi Mari gaw, “Nye myit masin dai Madu hpe shagrau li ai;

⁴⁷Nye wenyi mung ngai hpe hkye la ai Madu Karai Kasang hta kabu gara li ai.

⁴⁸Shi a mayam jan a myit gyip ai hpe shi mada yu nu ai; Yu u, ya kaw nna shu mashi shu masha prat dingsa, ngai hpe a lu ai, ngu na ma ni ai.

⁴⁹Atsam rawng ai wa gaw, ngai hpe galu kaba ai galaw ni ai; Shi a amying nsang chyoi pra lu ai:

⁵⁰Shi hpe hkrit kamyin ai ni a ntsa e, shu mashi shu masha du hkra, Shi a matsan dum ai myit anga nga ai.

⁵¹Shi a lahpum hte atsam pra di nu ai; Tinang kraw e maw ai hku hta gumrawng nga ai ni hpe, shi shabra kau nu ai.

⁵²Du magam ni hpe tingnyang na jahkrat kau nna, myit gyip ai ni hpe shagrau ya nu ai.

⁵³Kawsi hkrum ai ni hpe kaja ai hte jahkru shakat nna, sut su ai ni hpe kaman dat dat nu ai.

⁵⁴Anhte a ji wa ni hpe tsun da sai hte maren, Abraham hte shi a kashu kasha ni hpe,

⁵⁵Prat dingsa matsan dum ai lam dum nga na matu, Shi a shangun ma Israela hpe lanu lahku nu ai,” nga nna tsun ai.

⁵⁶Mari chyawm gaw Elisabet hte rau shata masum dang nga nhtawm, nta de bai wa mat ai.

⁵⁷Shaloi Elisabet gaw shangai nhtoi gu nna, shadang sha shangai wu ai.

⁵⁸Dai Madu gaw shi a chyeju chyalai shajan shi hpe madun wu ai gaw, htingbu ni hte mayu dama ni na ma ai rai nna, shi hte rau kabu gara ma ai.

⁵⁹Ya matsat ya nhtoi hta e dai ma hpe matu gadoi jaw na lam shanhte sa ma ai rai nna, shi kawa a amying hte maren, Zakari, ngu nna shamying ya mayu ma ai.

⁶⁰Kanu mahtang, “N rai, Yawhan ngu na re ai,” ngu nna htan wu ai.

⁶¹Shanhte gaw, “Na a baw sang hta shing nga mying ai langai mi muk n nga ai,” ngu nna shi hpe tsun mu ai.

⁶²Shaloi, dai ma hpe kaning ngu shamying mayu ai kun? nga nna kawa hpe dingsi san mu ai.

⁶³Shi gaw gamgu pa hpyi la nna, “Shi a amying Yawhan rai lu ai,” ngu nna ka dan wu ai. Shanhte nlang mau ma ai.

⁶⁴Dai ahkring mi hta shi gaw n-gup hpaw ai hte shinglet yan nna, Karai Kasang hpe shakawn kungdawn let ga tsun nga ai.

⁶⁵Dai re ai majaw, shanhte a makau grup yin hkan na ni nlang hte a ntsa e hkrithpa tai wa ai rai nna, dai ga mahkra gaw, Yuda bum ga ting hta e kajai gumhkawng wa ai.

⁶⁶Na mana ni yawng hte mung, tinang a kraw kata e dai hpe matsing da nna, “Ndai ma gaw, kaning re ai wa rai na ra ai i?” nga ma ai: kaning rai nme law, dai Madu a lata gaw shi hte rau nga nga ai.

⁶⁷Shaloi shi a kawa Zakari Chyoi pra ai Wenyi hte hpring wa nna, myihtoi ga hku tsun wu ai gaw,

⁶⁸“Dai Madu, Israela Karai Kasang gaw, a nga u ga law; Shi a amyu hpe kawan yu sa nna, hkrang la ai lam waw ya nu ai.

⁶⁹Chyaloi nhkoi nna shi a chyoi pra ai myihtoi ni a n-gup hte tsun da ai hte maren, Gumlau ni hte n dawng ai ni yawng a lata na hkye hkrang la ai lam hpaw na hte,

⁷⁰Anhte a ji wa ni hpe matsan dum ai lam madun na matu mung; Gumlau ni a lata na mawai la ai hkam ngut jang,

⁷¹Hkrit ai myit n rawng ai sha, anhte a prat dingnawng, Chyoi pra ai, dinghpring ai hte, shi a man e daw jau lu hkra,

⁷²Anhte a ji wa Abraham hpe dagam da ai, dagam ga ngu ai,

⁷³Shi a chyoi pra ai ga shaka hpe dum na matu mung,

⁷⁴Shi a shangun ma Dawi a nta hta, anhte a matu,

⁷⁵Hkye hkrang la ai nrung shatut ya ma ni ai.

⁷⁶Ma e, nang mung, Tsaw htum ai Wa a myihtoi ngu ai hkam la na rin dai: Anhte a Karai Kasang a matsan dum ai chyeju majaw,

⁷⁷Anhte a ntsa e Matsaw ntsa na nhtoi htoi la wa nna, Yubak mara raw dat kau na lam hte,

⁷⁸Shi a amyu hpe hkye hkrang la ai lam chye lu shangun na matu mung, Nsin, hte si ai shingnip kata e dung nga ai ni hpe htoi ya nna,

⁷⁹Anhte a lagaw hpe ngwi ai lam de woi wa na matu mung, Dai Madu a lam lajang na, shi a shawng e nang sa wa na rai nga ndai,” nga ai.

⁸⁰Dai ma mung kaba wa nna, wenyi atsam hta ja wa let, Israela masha ni kaw dan pru ai nhtoi du hkra, nam mali hkan e nga nga ai.