Read Jinghpaw Hanson Version Bible LUKA 11 Bible Online

LUKA 11 - Jinghpaw Hanson Version Bible bible

LUKA 11

¹Lang mi na shi gaw shara mi hta akyu hpyi nga ai rai nna, shi hpyi ngut jang, shi a sape langai mi gaw, “Madu e, Yawhan gaw shi a sape ni hpe akyu hpyi na sharin ya ai zawn, anhte hpe mung sharin ya mi,” ngu nna shi hpe tsun mu ai.

²Shaloi shi gaw, “Nanhte akyu hpyi yang ning ngu mu: ‘Wa e, Na a mying ningsang chyoi pra nga lit ga; Na a mungdan du wa ru ga.

³Anhte ra ai lusha gaw, shani shagu anhte hpe jaw mi.

⁴Anhte hpe shut ai ni yawng mayawng a mara, anhte raw kau ya ga ai majaw, anhte a yubak hpe mung raw kau ya mi. Agung alau nga ai de mung anhte hpe hkum sa shangun mi,’ ngu mu,” ngu nna shanhte hpe tsun mu ai.

⁵Bai shi shanhte hpe, Nanhte hta na langai mi jinghku lu ai rai nna, yuptung hpawa e shi kaw sa nhtawm, “Jinghku wa e, muk tawng masum ngai hpe gan hkoi ya e;

⁶nye a jinghku wa hkrun lam de na ngai kaw du ra ai rai nna, shi hpe jaw sha na hpa mung n lu nngai,” ngu wu yang,

⁷nhku de na wa gaw, “Ngai hpe hkum shatsang et; chyinghka mung la kau se ai, ngai sha ni mung ngai hte rau yup ku hta rai mat masai: nang hpe jaw na ngai n rawt lu ni ai, ngu nna hkap htan na wu ni?

⁸Ngai nanhte hpe tsun made ga, jinghku re ai nga nna n rawt jaw hkraw rai timung, shi akroi anoi hpyi nga ai majaw, dai wa hpe ra mara rawt jaw na wu ai.

⁹Bai, nanhte hpe ngai tsun made ai gaw, Hpyi mu, shaloi nanhte lu la na myit dai; tam mu, shaloi nanhte mu na myit dai; akawk mu, shaloi nanhte a matu hpaw ya na ra ai.

¹⁰Kaning rai nme law, hpyi ai wa kadai mung lu la ai; tam ai wa mung mu la ai, akawk ai wa hpe mung hpaw ya na ra ai.

¹¹Nanhte hta kadai kawa mung, kasha gaw muk hpyi yang, nlung jaw na wu ni? nga hpyi yang, nga a malai lapu jaw na wu ni?

¹²udi hpyi yang, n-gawgawk jaw na wu ni?

¹³Dai rai nna, nanhte n hkru nga myit dai ni pyi, tinang a kasha ni hpe kaja ai kumhpa chye jaw myit yang gaw, dai hta grau nna sumsing lamu na Kawa gaw, shi e hpyi ai ni hpe dai Chyoi pra ai Wenyi jaw na n rai hka!” ngu nna tsun mu ai.

¹⁴Lang mi na shi gaw n chye shaga ai nat hpe shapraw kau wu ai: nat pru mat wa ai hpang, n chye shaga ai wa gaw shaga nga ai. Shawa masha ni gaw mau mat nga ma ai.

¹⁵Rai timung, shanhte hta na nkau mi gaw, “Nat agyi wa Bezebula hte she, shi nat ni hpe shaden kau lu ai,” nga ma ai.

¹⁶Nkau mi mung shi hpe chyam dinglik yu let, lamu de na lamik kumla hpyi ma ai.

¹⁷Shi chyawm gaw shanhte a myit mang chye ya wu ai majaw, shanhte hpe, “Dinghku brun ai mungdan shagu gaw, hten mat ga ai rai nna, nta mi hte nta mi hpe kamyet daw agrawp mat ga ai.

¹⁸Ngai gaw Bezebula hte nat ni hpe shaden kau nga ai, nga nna nanhte tsun myit dai hte maren, Satan mung tinang hte hka bra mat sai rai yang gaw, shi a mungdan kaning rai grin nga lu na lu ta?

¹⁹Ngai Bezebula hte nat ni hpe shaden kau mawe ai rai yang gaw, nanhte a kasha ni kadai wa hte shaden kau nga ma ta? dai majaw, shanhte gaw nanhte hpe tara dara ai agyi ni tai na mara ai.

²⁰Karai Kasang a layung hte ngai nat ni hpe shaden kau mawe ai rai yang chyawm gaw, Karai Kasang a mungdan nanhte kaw du sai rai nga ai.

²¹N-gun ja ai wa gaw ri nhtu lang nna, shi a nta nbang npan sin nga yang, shi a arai ni gaw ashim sha rai nga lu ai:

²²shi hta n-gun grau ja ai wa sa nna, dai wa hpe gasat dang kau ngut jang she, shi kam ai ri nhtu hpe magawn la kau ya nhtawm, shi a arai ni hpe karan kachyan di la kau ya wu ai.

²³Ngai hpang maga de n nga ai wa gaw, gumlau maga de rai nga ai: ngai hte kahkyin gumdin n re ai wa gaw, ayai aya rai nga ai.

²⁴Dai n seng ai nat gaw masha hta na pru nhtawm, hkraw hkun ai shara hkan e hkawm sa wa nna, simsa na shara tam nga ai; n mu wu jang, Ngai pru kau da se ai nta de ngai bai nhtang wa na nngai, nga ai.

²⁵Bai du wa yu yang, dai nta gaw asan awan, ye kau nna mawn da nga la ai hpe, wa mu wu ai.

²⁶Shaloi shi nhtang sa nna, shi hta grau n hkru ai nat sanit shaga wa nhtawm, shanhte shang nna, dai yang e anga nga ma ai: dai rai nna, dai masha a hpang de na asam gaw shawng de na hta grau ru wa lu ai,” ngu nna tsun mu ai.

²⁷Shing nga tsun nga yang, dai shawa hpawng kata na numsha langai mi gaw shi a nsen shaja nna, “Nang hpe gun ai hkritung hkriwang hte, nang chyu ai madoi chyu hpang gaw, a nga lit dai,” ngu nna shi hpe tsun wu ai.

²⁸Yesu gaw, “Rai sa, Karai Kasang a mungga madat la nna, hkan nang ai ni gaw a lu ma ai,” nga ai.

²⁹Shawa masha ni gumbawm wa ma ai shaloi, shi tsun hpang wu ai gaw, “Ndai prat na ni gaw n hkru ai amyu rai nga ai: shanhte lamik kumla tam nga ma ai; rai timung, Yona a lamik kumla hta kaga, hpa lamik kumla mung shanhte hpe n dan na nme ai.

³⁰Yona gaw Ninewe masha ni a man e lamik kumla tai wa ai zawn, dai Masha Kasha mung, ndai amyu a man e, lamik kumla tai na ra ai.

³¹Dai tara dara ai nhtoi hta, dingda mung na hkawhkam jan gaw, ndai prat na amyu hte rau rawt wa nna, shanhte hpe dawdan na ra ai: kaning rai nme law, shi gaw Shawlumon a hpaji madat na, ga jahtum de na sa du ai: yu mu, ndai yang e Shawlumon hta grau kaba ai wa nga nga ai.

³²Tara dara ai nhtoi hta Ninewe masha ni gaw, ndai prat na amyu hte rau rawt wa nna, shanhte hpe dawdan na mara ai; kaning rai nme law, Yona hkaw tsun ai ga majaw, shanhte myit malai lu ma ai: yu mu, ndai yang e Yona hta grau kaba ai wa nga nga ai.

³³Pyengdin shatu nhtawm, makoi shinggang gawk e mung, mung hte dagup nna mung, kadai n tawn da ga ai: shang sa ai ni de a htoi san ai mu lu hkra, pyengdin shadun hta shadun da ga ma ai.

³⁴Na myi gaw hkumhkrang a pyengdin rai nga lit dai; na a myi asan sha rai nga yang, na a hkum ting ahtoi nga ai: n kaja nga lit yang gaw, na a hkum mung sin chyip rai nga ai.

³⁵Dai re ai majaw, nang hta rawng ai ahtoi gaw, sin mat ai n sin mat ai, a yu nga u.

³⁶Na a hkumhkrang hta shara mi muk n sin ai, hkum ting htoi nga ai rai yang gaw, pyengdin htoi tu kabrim ai hte nang hpe jahtoi ya ai zawn, na a hkumhkrang ting htoi na ra ai, ngu wu ai.

³⁷Shing nga tsun nga yang, Hparishe langai mi, shi kaw shani shat sha na, shi hpe shaga wu ai: shaloi shi shang nna, shat sha na dung nga ai.

³⁸Shat garai n sha yang, hka n shin ai hpe, dai Hparishe wa mu nna mau nga ai.

³⁹Dai rai nna Madu gaw, “Nanhte Hparishe ni gaw, gawm hte ban hpe shinggan maga de sha shapra ga myit dai; nanhte a kata maga de wa gaw, kashun kashe re ai hte, n hkru n shawp ai hpring chyat nga malit dai.

⁴⁰Masha angawk ni e, shinggan maga galaw ai wa gaw, kata maga de mung galaw ai, n rai ni?

⁴¹Rai timung, kata de rawng ai arai hpe alu jaw mu; shaloi, yu mu, nanhte a matu nlang san pra nga na rai malit dai.

⁴²Hparishe ni e, nanhte dingnye lu myit dai! kaning rai nme law, shingtawn pan, shinglim pan ni hte shat mai lap amyu myu hta na, htamshi hta htammi nanhte lahkawn sha myit htawm me, dingman ai hku tara dara na hte, Karai Kasang a tsawra ai lam hpe gaw, lai kau da myit dai: shawng na mung galaw nna, hpang na hpe mung n tawt kau myit taw gaw, mai na malit dai.

⁴³Hparishe ni e, nanhte dingnye lu myit dai! tara jawng ni hta grau reng ai dung shara ni hpe mung, gat hkan e hkungga shachyen ai ga hpe mung, nanhte sharawng la myit dai.

⁴⁴Nanhte dingnye lu myit dai! nanhte gaw masha ni n chye ai hte, de a ntsa e hkawm sa lu hkra prai mat sai lup ni hte bung myit dai,” ngu nna shi hpe tsun wu ai.

⁴⁵Shaloi tara sara langai mi htan nna, “Sara e, nang shing nga ai gaw, anhte hpe mung roi lawm nga ndai,” ngu nna shi hpe tsun wu ai.

⁴⁶Dai nga jang Yesu gaw, “Nanhte tara sara ni mung dingnye lu myit dai! nanhte gaw masha ni hpe gun yak ai lit shagun nhtawm, tinang ni gaw dai lit ni hpe layung mi hte pyi n jahkra yu myit dai.

⁴⁷Nanhte dingnye lu myit dai! Nanhte a nji nwa ni sat kau ai myihtoi ni a lup ni hpe nanhte galaw lajang myit dai:

⁴⁸dai rai nna nanhte a nji nwa ni a amu hta sakse tai ai ni hte, myit hkrum ai ni nanhte rai nga myit dai: kaning rai nme law, shanhte gaw myihtoi ni hpe sat kau nna, shanhte a lup ni hpe nanhte galaw lajang myit dai.

⁴⁹Dai re ai majaw, Karai Kasang a hpaji byeng-ya tsun ai gaw, Myihtoi hte kasa hpe ngai shanhte hpang de shangun dat na we ai rai nna, dai ni hta na nkau mi hpe shanhte sat kau ai hte di nna, zingri zingrat na maru ai:

⁵⁰shing rai, Abela asai kaw nna, tawn hkungri hte nawku nta lapran e sat kau hkrum ai Zakari a asai du hkra, ginding aga lat kaw nna ru kau hkrum ai myihtoi nlang a bunglat gaw, ndai aprat na amyu hpe shagun lu na rai nga ai, nga ai;

⁵¹rai sa, ngai nanhte hpe tsun made ga, dai bunglat gaw ndai aprat na amyu hpe shagun lu na rai nga ai.

⁵²Tara sara ni e, nanhte dingnye lu myit dai! hpaji sumsaw gaw nanhte kyem da myit htawm, tinang dai mung n shang, shang mayu ai ni hpe mung, nanhte hkum shadang da myit dai,” ngu wu ai.

⁵³Dai yang na pru wa yang, laika ka ai sara ni hte Hparishe ni gaw, shi hte ja ja ndang kalang nga nna, shi a n-gup na ga langai ngai hte shi hpe mara shagun lu hkra

⁵⁴gyam yu nga let, lam law law hte shi hpe tsun shadut ma ai.