Read Jinghpaw Hanson Version Bible LUKA 15 Bible Online

LUKA 15 - Jinghpaw Hanson Version Bible bible

LUKA 15

¹Ya, kang hta ai ni hte yubak kap ai ni nlang hte gaw, shi a ga madat na nga, shi hpang de sa ma ai.

²Dai rai nna Hparishe ni mung, laika ka ai sara ni mung, “Ndai wa gaw yubak kap ai ni hpe hkap la nna, shanhte hte rau lu sha nga ai,” nga nna aput angun nga ma ai.

³Shaloi dai ni hpe ndai ga shadawn shi tsun mu ai gaw,

⁴“Nanhte hta, sagu latsa lu nna langai mi mat yang, dai jahku shi jahku hte hpe nam e naw tawn da nhtawm, mat ai sagu hpe mu la hkra n hkan tam ai, kadai wa nga na rai ta?

⁵Dai hpe mu la jang mung, kabu gara ai myit hte lahpa hta mara hpai nna,

⁶shi a nta de du wa jang, jinghku jing-yu ni hte htingbu htingbyen ni hpe shaga nna, ‘Ngai hte rau kabu gara nga ga: nye a mat ai sagu hpe ngai bai mu la se ai,’ nga na ra ai.

⁷Nanhte hpe ngai tsun made ga, ‘Dai hte maren, myit malai lu shara n nga dum ai, dinghpring ai masha jahku shi jahku a majaw kabu gara ai hta, myit malai lu dum ai yubak kap ai masha langai mi a majaw, sumsing lamu kata e grau nna kabu gara shara rai na ra ai.

⁸“Bai lam mi gaw, numsha langai ngai gumhpraw lap shi lu ai hta na, lap mi mat yang, pyengdin shatu nhtawm, nta ye seng nna mu la hkra achyoi sha n tam yu ai, nga na a ni?

⁹Dai hpe mu la jang mung, jinghku jing-yu ni hte htingbu htingbyen ni hpe shi shaga nna, Ngai hte rau kabu gara nga ga; mat ai gumhpraw ngai bai mu la se ai,” nga na ra ai.

¹⁰Nanhte hpe ngai tsun made ga, “Dai hte maren, yubak kap ai masha langai mi, myit malai lu ai majaw, Karai Kasang a lamu kasa ni a man e, kabu gara shara rai nga ai,” ngu mu ai.

¹¹“Bai shi gaw, Masha langai mi shadang sha lahkawng lu ai.

¹²Dai yan hta kasha kaji mahtang gaw, kawa hpe, ‘Wa e, ngai la ang ai sali kumhtaw gaw, ngai hpe karan ya e,’ ngu nna hpyi wu yang, kawa mung shan hpe sali wunli karan ya wu ai.

¹³Dai hpang nhtoi gade ya n na yang, kasha kaji gaw arai mahkra shinggyin la nhtawm, tsan ai mung de sa wa nna, dai shara e pyaw daw kadaw hkawm nga ai hte, shi a sutrai ginlut shamat kau wu ai.

¹⁴Shing rai lu malu shamat kau ma jang, dai mung e hku wa kaba hku wa ai rai nna, shi matsan chyaren hkrum magang nga ai.

¹⁵Shaloi dai mung na masha langai mi kaw shi sa shingbyi nga ai: dai wa mung shi a prang ga de, shi hpe wa rem shangun dat wu ai.

¹⁶Shaloi shi gaw, wa ni sha ai shapre kawp hte pyi, shi a kan jahkru mayu timung, gade e mung n jaw sha mu ai.

¹⁷Shing rai shi myit dum yang, ‘Nye wa a shabrai sha ai ni gade wa n taw n tsang muk sha lu nga ma hka! ngai wa gaw ndai yang e kawsi kyet ai hte hten bya magang wa nga nngai:

¹⁸ngai rawt nna nye wa kaw wa nhtawm, Wa e, sumsing lamu a man e mung, na a man e mung, ngai shut ni ai:

¹⁹ya kaw nna na nsha ngu na, ngai n ging n dan nngai: na shabrai sha ai masha langai mi zawn ngai hpe tawn da e law, ngu na we ai,’ nga ai.

²⁰Shing rai shi rawt wa nna, kawa kaw du wa ai. Shi tsan tsan naw rai nga yang, kawa gaw shi hpe hkap mu ai hte matsan yu dum nna, gat sa nhtawm, kasha a du hta noi ginshum let, shi hpe a pup wu ai.

²¹Shaloi kasha gaw, ‘Wa e, sumsing lamu a man e mung, na a man e mung, ngai shut ni ai: ya kaw nna na nsha ngu na ngai n ging n dan nngai: (na a shabrai sha ai masha langai mi zawn, ngai hpe tawn da e law)’ ngu nna kawa hpe tsun nem wu ai.

²²Kawa chyawm gaw shi a mayam ni hpe, “Reng htum ai hpun palawng alawan la sa nna, shi hpe jahpun ya maru; shi a lata hta lachyawp chyawp ya maru; lagaw hta kyepdin din ya maru;

²³kawn tawn ai dumsu kasha mung la sat mu: shing rai anhte kabu gara ai hte lu sha nga ga:

²⁴hpa majaw nga yang, ndai ngai sha gaw si mat sai, ya bai hkrung sali ai; mat mat sai mung, ya bai mu la se ai,” ngu mu ai.

²⁵Shing rai shanhte pyaw pyaw rai nga ma ai. Kasha kaba wa chyawm gaw yi e nga nga ai; dai de na wa nna nta du magang yang, chying bau dum ai hte ka manau ai nsen na wu ai;

²⁶dai rai nna, ma langai mi hpe shaga la nhtawm, dai kaning re ai rai nga ai, san yu wu yang,

²⁷dai ma gaw, “Na nnau bai wa ra ai rai nna, nwa mung shi hpe a hkam a kaja sha hkap la lu wu ai majaw, kawn tawn ai dumsu kasha sat nu ai,” ngu nna shi hpe tsun dan wu ai.

²⁸Dai na jang shi masin pawt nna, nhku de n shang wa hkraw ai. Shaloi shi a kawa pru sa nna, shi hpe sa nem wu ai.

²⁹Dai kasha chyawm gaw, “Yu u, nde nlaw ning tup na a nchyang amu ngai galaw nna, nang tawn da ai hku ngai galoi mung n lai nngai: rai timung, nye jinghku ni hte pyaw pyaw rai nga na, nang lang mi muk bainam kasha langai mi pyi, ngai hpe n jaw yu ndai:

³⁰shawa num ni hte kanawn nna, na a sutrai ginlut shamat kau ai ndai na nsha wa bai wa jang chyawm gaw, kawn tawn ai dumsu kasha, shi a matu nang sat nit hka,” ngu nna shi a kawa hpe htan wu ai.

³¹Kawa gaw, “Ngai sha e, nang gaw ngai hte rau tut tut anga nga ndai; nye a sutrai nga manga gaw, na a hkrai rai nga ai.

³²Rai timung, pyaw pyaw rai kabu gara mai nga ai; hpa majaw nga yang, ndai na nnau gaw si mat sai, ya bai hkrung ra ai: mat mat sai mung, ya bai mu la saga ai, ngu nna shi hpe nem wu ai,” ngu mu ai.