Read Jinghpaw Hanson Version Bible LUKA 17 Bible Online

LUKA 17 - Jinghpaw Hanson Version Bible bible

LUKA 17

¹Dai hta kaga shi gaw shi a sape ni hpe, Myit kataw shara n pru hkra gaw n nga lu ai: rai timung, myit kataw shara shapraw dat ai wa gaw, dingnye lu ai.

²Dai wa gaw, ndai ma kaji langai mi hpe myit kataw shangun ai hte, shi a du hta htumrin lung noi nna, nammukdara hta jahkrat kau ai hkrum yang gaw, shi a matu grau mai nga ai.

³Nanhte gaw tinang hkum dai sadi mu: na nhpu nnau wa shut hpyit yang, shi hpe daru sharin u: myit malai bai lu yang gaw, shi a mara dat ya u:

⁴lani jan sha nang hpe sanit lang shut nhtawm, “Ngai myit malai lu ni ai, nga nna sanit lang nang hpe bai kayin nem yang gaw, shi a mara dat kau ya u,” ngu nna tsun mu ai.

⁵Shaloi kasa ni gaw, “Anhte a kamsham ai myit shalaw ya mi,” ngu nna Madu hpe hpyi mu ai.

⁶Shing nga jang Madu gaw, “nanhte hta kamsham ai myit chyinghkrang tum daram rawng myit yang gaw, ndai labri hpun hpe, ‘Hpun e, aru hte nawng baw nna nammukdara e sa tu nga u law,’ ngu yang, nanhte a ga madat na ra ai.

⁷“Hkauna galau ai, shing n rai sagu bainam rem ai mayam nga ai rai nna, dai mayam gaw hkauna pa de na du wa yang, dai wa hpe, ‘Alawan wa dung nna shat sha ru,’ nga nna tsun na, nanhte hta kadai rai ta?

⁸Dai mayam hpe mahtang, ‘Ngai sha na shana shat hpajang u; ngai lu sha ngut hkra nshang shingkyit kyit nna, ngai hpe galaw jaw e; dai ngut jang she nang lu sha lu na ndai,’ ngu na wu ai, n rai ni?

⁹Tsun matsun galaw ai a majaw, dai mayam hpe chyeju htang ai ga tsun ga myit ni?

¹⁰Dai hte maren nanhte mung tsun matsun yawng hpe hkan shatup ngut jang she, ‘Anhte gaw akyu n rawng ai mayam ni rai nga ga ai; galaw ra ai hpunda hte sha anhte shatup saga ai,’ ngu mu,” ngu wu ai.

¹¹Ya Yerusalem mare de sa wa nga yang, shi gaw Samari mung hte Galile mung lapran hku ga sa wa ai.

¹²Kahtawng langai mi de shang yang, manggang kap ai masha marai shi Yesu hpe hkap tau nna,

¹³tsan tsan e tsap nga let, “Madu, Yesu e, anhte hpe matsan dum la mi law,” nga nna jahtau ma ai.

¹⁴Yesu shanhte hpe mu jang, “Nanhte a hkum hkinjawng ni kaw wa madun dan mu,” ngu dat mu ai rai nna, shanhte wa nga yang pyi, san pra mat ma ai.

¹⁵Shanhte hta na marai langai mi gaw, tinang hkum san pra mat sai mu chye jang, bai nhtang sa nna nsen kaba hte Karai Kasang hpe shagrau sha-a ai hte,

¹⁶Yesu a lagaw nhpang e dingnyawm dagup nna, shi a chyeju hpe shakawn ya wu ai: dai wa gaw Samari masha rai nga ai.

¹⁷Dai rai nna Yesu gaw, “Marai shi san pra mat masai, n rai ni? marai jahku gaw kanang rai wa ma sata?

¹⁸Ndai tsasam masha hta kaga, Karai Kasang hpe shagrau sha-a na, bai nhtang sa ai langai mi muk n nga a ni?” nga nna san nhtawm,

¹⁹dai wa hpe, “Rawt wa nu; na a kamsham ai gaw nang hpe hkye la nit dai,” ngu nna shi hpe tsun dat wu ai.

²⁰Karai Kasang a mungdan galoi du na lam, Hparishe ni san ma yang, shi gaw, “Karai Kasang a mungdan du ai gaw myi hte yu nga nna, mu na n rai;

²¹dai hte maren, ‘Yu mu, nang e nga nga ai, wonang nga nga ai, nga nna mung tsun lu na ma ai, n rai:’ kaning rai nme law, Karai Kasang a mungdan gaw, nanhte a kata e rai nga ai,” ngu nna shanhte hpe htan mu ai.

²²Sape ni hpe mung shi tsun mu ai gaw, “Masha Kasha a nhtoi lani mi hpe nanhte hkrum kadup mayu na shani pru na ra ai, rai timung hkrum kadup lu na myit dai n rai:

²³dai nhtoi e masha ni gaw, ‘Yu mu, wonang nga nga ai,’ ‘Yu mu, nang e nga nga ai,’ nga nna nanhte hpe tsun ma timung, hkum pru, hkum hkan myit:

²⁴kaning rai nme law, lamu maga mi de na kalam ai myihprap gaw, lamu maga mi de du hkra htoi ala wa ai zawn, Masha Kasha gaw shi a nhtoi hta rai na ra ai.

²⁵Rai timung, dai garai n byin yang, shi gaw nni nkri law law hte, ndai aprat na ni a ndang kau ai, naw hkrum na rai nga ai.

²⁶Noa a ban e byin ai zawn, Masha Kasha a nhtoi hta mung byin na ra ai.

²⁷Noa gaw dai sanghpaw li kata de shang nna, sha-u ing wa let nlang hte hpe yeng seng kau ai nhtoi du hkra, masha ni gaw lu let sha let num la num ya rai let, nga nga ma ai.

²⁸Lawt a ban hta e mung dai hte maren rai nga ai: masha ni gaw lu let sha let, mari let dut let, gat hkai let, dum nta gap let nga nga ma ai:

²⁹rai timung, Lawt gaw Sodom mare na pru wa ai nhtoi hta, lamu na wan hte kan marang htu nna, nlang hte hpe yeng seng kau mu ai:

³⁰dai Masha Kasha a dan pru ai nhtoi hta mung, dai hte maren rai na ra ai.

³¹Dai nhtoi hta e, nta magaw e nga ai wa gaw, tinang a arai nta nhku e nga ai rai yang gaw, dai rai la na hkum yu wa nu ga: hkauna pa e nga ai wa mung, dai hte maren nta de hkum nhtang wa nu ga.

³²Lawt a madu jan hpe dum nga mu.

³³Tinang a asak jahkrung da na tam ai wa kadai mung, asak sum na ra ai; asak sum ai wa chyawm gaw, asak jahkrung la na wu ai.

³⁴Nanhte hpe ngai tsun made ga, “Dai shana hta e yup ra langai mi hta, lasha lahkawng rau nga na ma ai; langai mi gaw woi la ai hkrum nna, langai mi gaw hti nga mat na ra ai.

³⁵Numsha lahkawng htumrin hta rau rin nga na ma ai; langai mi gaw woi la ai hkrum nna, langai mi gaw hti nga mat na ra ai,” ngu mu ai.

³⁷Shaloi sape ni gaw, “Madu e, kanang e byin na ra ta?” ngu nna shi hpe htan mu yang, shi gaw, “Mang taw ai kaw, lang da ni mung hpawng nga na mara ai,” ngu nna shanhte hpe tsun mu ai.