Read Jinghpaw Hanson Version Bible LUKA 18 Bible Online

LUKA 18 - Jinghpaw Hanson Version Bible bible

LUKA 18

¹Tutnawng e akyu a hpyi nga mu ga hte myit n hten malu ga, shi shanhte hpe ga shadawn tsun mu ai gaw,

²“Mare langai mi hta, Karai Kasang hpe mung n hkrit masha hpe mung n agam ai tara agyi langai mi nga ai.

³Dai mare hta gaida jan langai mi mung nga ai; shi gaw dai tara agyi wa kaw sa nna, ‘Ngai hte amu rawng ai wa hpe mara hte maren tai ya e,’ nga nna a tsun nga ai.

⁴Rai timung, tawng marang wa mi na hkra, shi n jeyang ya hkraw ai: dai hpang shi gaw, ‘Ngai Karai Kasang hpe n hkrit, masha hpe mung ngai n agam nngai, rai timung,

⁵gaida jan ndai ngai hpe a shatsang nga ai majaw, shi hpang maga ngai tara dara ya na nngai; dai n rai yang shi ya sa sa rai nna, ngai hpe myit jahtum na ra ai, nga nna shi a kraw hta myit la wu ai,’ ngu mu ai.

⁶Dai rai nna dai Madu gaw, “N ding n man ai tara agyi wa tsun ai ga hpe myit la mu:

⁷Karai Kasang gaw matsan dum lama nga ai rai nna, shi hpe shani shana hpyi jahtau nga ai, shi a lata la ai ni a hpang maga de, tara n dara ya ai, nga na wu ni?

⁸Nanhte hpe ngai tsun made ga, Shanhte hpang maga alawan tara dara ya na wu ai. Rai timung, Masha Kasha du sa ai nhtoi hta, ndai mungkan ga ntsa e makam masham nga nga ai gaw, mu lu na a kun?” ngu mu ai.

⁹Tinang hkum hpe dingman dum nna, masha kaga hpe hpa n nawn ai ni nkau mi hpe, ndai ga shadawn mung shi tsun mu ai gaw,

¹⁰“Masha lahkawng akyu hpyi na nga, Nawku Htingnu de lung wa ma ai; langai mi gaw Hparishe, langai mi gaw kang hta ai wa, rai ma ai.

¹¹Hparishe wa gaw tsap nna, ‘Karai Kasang e, ngai gaw hpya lu hpya sha ai, n ding n man ai, num shut num shaw re ai masha gale ni hte n bung nngai hta n-ga, ndai kang hta ai wa zawn pyi n rai nngai majaw, ngai nang hpe shakawn nngai:

¹²bat mi na nhtoi hta lahkawng lang ngai lusha gam nga nngai; ngai lu la mala hta na htamshi hta htammi alu jaw nngai,’ nga nna shi hkrai kaga rai hpyi wu ai.

¹³Kang hta ai wa chyawm gaw, tsawmra naw tsan kaw tsap nna, lamu de pyi n wam mada ai; shi a sinda adup let, ‘Karai Kasang e, ndai yubak kap ai wa ngai hpe matsan dum la e law,’ ngu nna hpyi wu ai.

¹⁴Nanhte hpe ngai tsun made ga, kang hta ai wa gaw Hparishe wa hta dinghpring ai grau lu la nna, nta de bai yu wa nu ai: kaning rai nme law, tinang hkum shagrau ai wa kadai mung grit mat ai hkrum na ra ai; tinang hkum shagrit ai wa chyawm gaw, shagrau ai hkrum na ra ai,” ngu mu ai.

¹⁵Ma kaji ni hpe mung ahtawk ya mi ga, nga nna shi hpang de woi sa ma ai: sape ni gaw dai mu jang hkap daru kau mu ai.

¹⁶Rai timung Yesu gaw ma kaji ni hpe shaga let, “Ma ni hpe ngai hpang de sa shangun maru; shanhte hpe hkum gang shadang myit: kaning rai nme law, Karai Kasang a mungdan gaw, dai zawn re ai ni a mungdan rai nga ai.

¹⁷Nanhte hpe ngai teng teng tsun made ga, Kadai rai timung, Karai Kasang a mungdan hpe, ma kaji zawn n hkap la ai wa gaw, dai hta e gaja wa n shang lu na ra ai,” ngu mu ai.

¹⁸Aya lu ai masha langai mi mung shi hpe, “Mai kaja ai sara e, n htum n wai asak a sali wunli lu la hkra ngai hpa mi galaw na rai ta?” ngu nna shi hpe san wu ai.

¹⁹Yesu gaw, “Ngai hpe, mai kaja ai, hpa rai nga n ta? Karai Kasang hta kaga, mai kaja ai gaw kadai mung n nga ai.

²⁰Jep ai tara hta, Masha num hkum shaw, masha hkum sat, hkum lagu, n teng n man ai sakse hkum hkam, nnu yan nwa hpe hkungga lara di u, nga ai ga hpe nang chye nga ndai,” ngu nna shi hpe htan wu ai.

²¹Dai wa gaw, “Dai yawng mayawng hpe brang ram kaw nna ngai hkan se ai, ngu wu ai.

²²Yesu gaw dai ga na jang, Lam langai mi nang naw ra nga ndai: nang lu malu dut kau nna matsan mayan ni hpe karan jaw u; shing rai jang she, sumsing lamu ntsa e nang sutgan lu na rin dai: ngai kaw mung sa hkan nang rit,” ngu nna shi hpe tsun wu ai.

²³Dai wa gaw dai ga na jang, nachying myit yawn mat ai: kaning rai nme law, shi gaw grai lu su ai wa rai nga ai.

²⁴Yesu gaw dai wa shing re ai mu jang, “Sut su ai ni gaw Karai Kasang a mungdan hta nachying shang yak la ahka gaw!

²⁵Lu su ai wa Karai Kasang a mungdan de shang loi ai hta, gawla-uk gaw samyit na hku gale na grau loi nga ai,” ngu wu ai.

²⁶Ga na ai ni gaw, “Dai rai yang gaw, kadai wa mi hkye hkrang la ai kaw du lu na a ta?” nga ma ai.

²⁷Shaloi shi gaw, “Masha n dang di lu ai lam ni hpe, Karai Kasang gaw dang di lu nga ai,” ngu nna tsun dan mu ai.

²⁸Shaloi Petru gaw, “Yu u, anhte gaw lu malu kau da nna, nang kaw hkan nang nga ga ai,” ngu wu ai.

²⁹Dai rai nna Yesu gaw, “Nanhte hpe ngai teng teng tsun made ga, Karai Kasang a mungdan majaw, tinang nta, madu jan, kahpu kanau, kanu kawa, kashu kasha, kau da ai wa kadai mung,

³⁰ndai prat hta htam law law wa n lu la ai, n nga na hta kaga, htawm hpang prat e mung, n htum n wai asak n lu la ai gaw, n nga na re ai,” ngu nna shanhte hpe tsun mu ai.

³¹Shaloi shi gaw sape shi lahkawng hte hpe shaga la nna, “Yu mu, Anhte Yerusalem mare de lung wa nga ga ai; myihtoi ni a lata hte ka da mada gaw, Masha Kasha hta dik wa na ra ai.

³²Kaning rai nme law, maigan amyu ni a lata de ap kau na, asawng asang di ai, aroi arip re ai, mayen mahtaw bun ai, shi hkrum na ra ai:

³³shi hpe anu kayat nhtawm, sat kau na maru ai: masum ya nhtoi hta e shi bai hkrung rawt na ra ai,” ngu nna shanhte hpe tsun mu ai.

³⁴Dai lam langai mi hpe mung shanhte n chye na ma ai: dai ga gaw shanhte a man e makoi magap nga ai rai nna, tsun dan ai lam ni hpe n dum n hten mu ai.

³⁵Ya shi gaw Yerihko mare de du magang yang, myi kyaw ai masha langai mi gaw lam makau e hpyi sha let dung nga ai rai nna,

³⁶masha wunawng wuwa lai sa wa ai hpe na jang, dai kaning re ai rai nga ai hpe, san yu wu ai.

³⁷Shaloi hkan nang ai ni gaw, “Nazaret mare na Yesu lai sa wa nga ai,” ngu nna shi hpe tsun dan mu ai.

³⁸Dai na jang shi gaw, “Dawi a kasha Yesu e, ngai hpe matsan dum la e law,” ngu nna hpyi jahtau wu ai.

³⁹Shawng e sa wa nga ai ni gaw, atsin sha nga na dai wa hpe jet kau mu ai. Shi mahtang, “Dawi a kasha e, ngai hpe matsan dum la e law,” nga nna grau jahtau shaja wu ai.

⁴⁰Dai rai nna Yesu gaw tsap da nna, dai wa hpe shi hpang de woi sa na, tsun wu ai. Myi kyaw ai wa shi makau du jang, Yesu gaw,

⁴¹Ngai nang e hpa di ya na, nang ra n ta? ngu nna shi hpe san wu yang, dai wa gaw, “Madu e, nye myi mu li ga law,” ngu wu ai.

⁴²Shaloi Yesu gaw, “Na myi mu lit ga; na a kamsham ai gaw nang hpe shamai ya nit dai,” ngu nna shi hpe tsun wu ai.

⁴³Dai wa gaw shaloi jang myi mu lu nna, Karai Kasang hpe shagrau sha-a let shi kaw hkan nang wu ai: hkan nang ai ni nlang hte gaw dai lam hpe mu jang, Karai Kasang hpe shakawn kungdawn nga ma ai.