Read Jinghpaw Hanson Version Bible LUKA 19 Bible Online

LUKA 19 - Jinghpaw Hanson Version Bible bible

LUKA 19

¹Shaloi Yesu gaw, Yerihko mare de shang nna ga sa wa nga ai.

²Ya Zake mying ai kang hta agyi langai mi nga ai; dai wa gaw sut su ai wa rai nga ai;

³Yesu gaw kadai wa re ai, shi mu mayu nna tam wu timung, masha wunawng chyat nga ai hte, shi gaw hkum nem ai masha rai nga ai majaw, n mu lu wu ai.

⁴Dai rai nna shi hpe mu lu hkra, shi shawng de gat sa nhtawm, Yesu lai sa wa na ra ai lam makau na lakum hpun hta lung dung nga ai.

⁵Dai de du yang Yesu gaw dap mada yu nna, “Zake e, alawan yu wa rit; dai ni ngai na a nta e rai na nngai,” ngu nna shi hpe tsun wu ai.

⁶Shaloi shi alawan yu wa nna, kabu gara ai hte Yesu hpe hkap hkalum la wu ai.

⁷Nga manga ni gaw dai mu jang, shi gaw yubak kap ai wa langai mi kaw shang manam sai, nga nna aput angun nga ma ai.

⁸Zake chyawm gaw rawt tsap nna, “Madu e, nye a sutrai ka-ang hkup ngai matsan mayan ni hpe karan jaw we ai: langai ngai hpe mawp sha kau ai rai yang gaw, htam mali ngai bai wa na we ai,” ngu nna Madu hpe tsun wu ai.

⁹Shaloi Yesu gaw, “Dai ni ndai nta hta hkye hkrang la ai lam pru sai: kaning rai nme law, shi mung Abraham a kasha rai nga ai.

¹⁰Masha Kasha gaw mat mat ai ni hpe, hkan tam nna hkye hkrang la na du sa ai rai nga ai,” ngu nna Zake hpe tsun wu ai.

¹¹Dai lam ni hpe shanhte madat nga ma yang, Yesu gaw Yerusalem mare de du na ni sai majaw mung, Karai Kasang a mungdan gaw alawan dan pru magang ra ai, nga nna myit shajang nga ma ai majaw mung, shi ga shadawn hte bai tsun bungjat wu ai gaw,

¹²“Arawng lu ai masha langai mi gaw, mungdan lu la nna dai hpang bai wa na nga, tsan ai mung de sa na maw nga ai.

¹³Shaloi shi gaw shi a mayam marai shi shaga la nhtawm, gumhpraw joi shi hpra shanhte hpe ap ya da nna, ngai bai wa ai du hkra ndai hte hpaga ga mu, ngu nna shanhte hpe hkang da mu ai.

¹⁴Shi a mung masha ni chyawm gaw, shi hpe n dawng da mu ai rai nna, ‘Ndai wa anhte a ntsa e up nga na, anhte n ra ga ai,’ ngu nna shi a hpang e kasa hkan shangun dat mu ai.

¹⁵Dai wa gaw mungdan lu la nna bai du wa yang, gumhpraw ap ya da sai mayam ni, hpaga ga nna amyat gade kap masai chye lu hkra, shanhte hpe shaga na, tsun dat wu ai.

¹⁶Dai rai nna shawng na wa gaw sa du jang, “Madu e, na a gumhpraw joi mi hta, joi shi kap sai,” ngu nna tsun wu ai.

¹⁷Shaloi Madu gaw, “Ara, kaja ai mayam e, nang gaw amu kaji hta kangka rai nit dai majaw, mare shi a ntsa e up hkang nu,” ngu nna shi hpe tsun wu ai.

¹⁸Hpang na wa mung sa nna, “Madu e, na a gumhpraw joi mi hpe, joi manga shapraw se ai,” ngu wu ai.

¹⁹Madu gaw dai wa hpe mung, “Nang mare manga a ntsa e up hkang nu,” ngu wu ai.

²⁰Bai langai wa mi gaw sa nna, “Madu e, yu u, na a gumhpraw ndai rai nga ai, hpajet hte ngai makai da nngai:

²¹kahti kari re ai wa nang rai nga ndai majaw, ngai nang hpe hkrit nngai: n tawn n da ai arai nang magawn la nna, n gat n hkai ai kaw na, nang dan la ga ndai,” ngu wu ai.

²²Shaloi madu gaw, N hkaw n shawp ai mayam e, na a n-gup na ga hku hkan nna ngai nang hpe jeyang na de ai: ngai gaw kahti kari re ai wa rai nga nngai hte, n tawn n da ai arai ngai magawn la nna, n gat n hkai ai kaw na dan la ga nngai, nang chye ndai rai yang gaw,

²³nye a gumhpraw hpe ngai bai wa yang arang hte atu lu la hkra, gumhpraw boi ai shara e hpa rai n bang da n ta?” ngu nna shi hpe tsun wu ai.

²⁴Makau e tsap nga ai ni hpe mung, “Dai gumhpraw joi mi shi kaw na dawm la nna, joi shi lu ai wa hpe jaw jat mu,” ngu wu ai.

²⁵Dai ni gaw, “Madu e, shi gaw joi shi lu sai,” ngu mu ai.

²⁶“Ngai nanhte hpe tsun made ga. Lu ai wa kadai hpe mung, naw jat jaw na rai nga ai; n lu n lawm ai wa kaw na chyawm gaw, shi lu ai made hpe pyi naw la kau ya na rai nga ai.

²⁷Dai hta kaga, shanhte a ntsa e ngai hpe up shangun na n ra ai, nye a gumlau ni hpe, nang de dun wa nna, nye a man e sat kau maru, ngu nna hkang dat mu ai,” ngu wu ai.

²⁸Dai lam ni hpe tsun ngut jang, shi gaw shawng de sa wa let, Yerusalem mare de lung wa ai.

²⁹Ya, Tsanlun ngu ai bum na Bethpage kahtawng hte Behtani kahtawng de du magang jang, shi sape lahkawng shangun dat nna,

³⁰“Nan a shawng na kahtawng de sa ma su; dai de shang jang, gade e lang mi muk garai n jawn yu ai lawze kasha dun nga ai hpe, nan mu na mu ai: dai hpe raw nhtawm dun wa marit:

³¹masha langai ngai, ‘Dai hpa di raw myit ta?’ nga nna nan hpe san dam yang, ‘Madu ndai hpe ra ai da,’ ngu nna htan mu,” ngu matsun dat mu ai.

³²Shangun dat ai yan gaw sa du nna, shi tsun dat ai hte maren sa mu ma ai.

³³Dai lawze kasha hpe raw nga yang, madu ni gaw, “Dai lawze kasha hpe hpa di raw mu ta?” ngu nna shan hpe san mu ai.

³⁴Shan gaw, “Madu ndai hpe ra ai da,” ngu mu ai.

³⁵Shaloi shan gaw dai lawze kasha hpe Yesu hpang de dun wa nna, shanhte a hpun nba mara nhtawm, Yesu hpe shajawn mu ai.

³⁶Shing rai shi jawn sa wa nga yang, shanhte gaw tinang ni a hpun nba ni hpe lam e hkan nep ya ma ai.

³⁷Ya mare du wa magang yang na Tsanlun bum kadawng yu ai kaw du yang, sape hpung masha nlang hte gaw, shanhte mu yu sai magam atsam amu yawng a majaw, kabu gara let nsen kaba hte Karai Kasang hpe shakawn kungdawn tsun ma ai gaw,

³⁸“Madu a amying ningsang hte Du sa ai Hkawhkam wa gaw, a nga ai law; Sumsing lamu e ngwipyaw ai hte, Tsaw htum ai shara e hpung shingkang rawng u ga law,” nga ma ai.

³⁹Dai rai nna, dai hpung kata na Hparishe ni nkau mi gaw, “Sara e, na a sape ni hpe daru kau u,” ngu nna shi hpe tsun ma ai.

⁴⁰Shaloi Yesu gaw, Nanhte hpe ngai tsun made ga, “Ndai ni atsin sha nga ma yang gaw, nlung ni jahtau na rai nga ai,” ngu nna htan wu ai.

⁴¹Ya dai de ni wa nna mare hpe mu wu yang, de a matu shi hkrap nna,

⁴²“Mare nang e, ngwipyaw ai lam hpe dai ni na nhtoi e nang chye lu wu taw gaw law! ya chyawm gaw dai lam ni hpe na a man e makoi da nga ai.

⁴³Kaning rai nme law, nang hpang de kawan katsan yu sa ai aten ahkying hpe nang n dum n chye ndai majaw, nang hpe hpyen ai ni gaw na a grup yin e gaduk dap jung nna wang da let, nang hpe maga shagu pat shadang nhtawm,

⁴⁴nang hpe mung, na a kashu kasha ni hpe mung, ga hte azat kayau kau ai nhtoi gaw, nang kaw pru na ra ai rai nna, nang hta nlung langai mi a ntsa e nlung langai mi pyi n ngam mara lu ai rai na ra ai,” ngu wu ai.

⁴⁵Ya shi gaw nawku Htingnu de shang nna, rai dut ai ni hpe, “Nye a nta akyu hpyi ai nta rai na ra ai, nga nna ka da nga timung,

⁴⁶nanhte gaw ndai hpe damya lungpu shatai myit dai, ngu nna shanhte hpe shaden kau mu ai.

⁴⁷Shi gaw shani shanang nawku Htingnu e sharin shaga let nga nga ai. Hkinjawng kaba ni, laika ka ai sara ni hte, mung a agyi salang ni mahtang gaw, shi hpe sat kau lu na lam tam ma ai:

⁴⁸rai timung, shawa masha ni nlang hte gaw, shi a sharin shaga ai ga hta madat noi nga nga ma ai majaw, kaning di na lam mung, n mu mu ai.