Read Jinghpaw Hanson Version Bible LUKA 2 Bible Online

LUKA 2 - Jinghpaw Hanson Version Bible bible

LUKA 2

¹Dai nhtoi hte hta e, mungkan ting hpe jahpan la na, Kehta hkawhkam Agustu kaw nna mungga pru ai.

²Dai jahpan la ai gaw, Suri mung hta Kureni munggyi tai nga yang, shawng la ai jahpan rai nga ai.

³Shaloi masha mahkra gaw amying shalawm na matu, langai hte langai tinang mare de wa ma ai.

⁴Yawsep mung, Dawi a kashu kasha hte aru arat rai nga ai majaw, Galile mung na Nazaret mare kaw nna, Yuda mung na Betlehem ngu ai Dawi a mare de,

⁵shi mahtan da ai num Mari hte rau amying shalawm na matu lung wa ai: Mari chyawm gaw na-um nasin hkum rai nga ai.

⁶Dai yang e naw nga yang, shangai nhtoi gu nna,

⁷shi gaw shadang sha alat shangai wa sai: nbat hte kayawp nhtawm, ushat wakang hta kaleng tawn da wu ai; kaning rai nme law, manam jarawp hta shanhte a matu nga shara n nga malu ai.

⁸Ya dai ginwang e sagu rem ai masha, urawng udat hkan e nga ma ai rai nna, shanhte a sagu hpung hpe shana na ahkying ladaw ni hta sin nga ma ai.

⁹Shaloi dai Madu a lamu kasa gaw shanhte a makau e sa tsap nga nna, dai Madu a hpung shingkang gaw shanhte a grup yin e htoi kabrim wa ai: dai rai nna shanhte gaw hkrit kaba hte hkrit mat ma ai.

¹⁰Dai majaw lamu kasa gaw, “Hkum hkrit myit; yu mu, masha nlang a matu nachying kabu gara mai ai shiga, ngai nanhte kaw gun sa ring ngai;

¹¹dai ni na nhtoi hta Hkye hkrang la ai wa Hkristu ngu ai Madu gaw, Dawi a mare e nanhte a matu shangai wa sai:

¹²nanhte a matu kumla ndai rai na ra ai: ma chyangai langai mi nbat hte kayawp nna ushat wakang hta kaleng taw nga ai gaw, nanhte mu na marin dai,” ngu nna shanhte hpe tsun mu ai

¹³Ya, dai lamu kasa hte rau, lamu na wunawng wuwa ga daga, akajawng sha dan pru nna, Karai Kasang hpe shakawn kungdawn let,

¹⁴“Matsaw lahta tang e Karai Kasang gaw hpung shingkang rawng nga u ga; Ga ntsa e mung, shi sharawng awng ai masha ni hta, ngwipyaw ai gaw anga nga nu ga law,” nga ma ai.

¹⁵Lamu kasa ni sagu rem ai ni kaw nna lamu de wa mat jang, shanhte gaw, “Betlehem mare du hkra nan anhte sa nna, byin wa sai hte, dai Madu anhte hpe shadan dan ai lam hpu yu saga,” nga nna shada da tsun ma ai.

¹⁶Shing rai shanhte lau lau sa nna, Mari yan Yawsep hpe mung, ushat wakang hta kaleng taw nga ai ma chyangai hpe mung, mu ma ai.

¹⁷Dai mu ma ai shaloi, dai ma a lam shanhte e tsun dan ai ga hpe, shanhte tsun kajai dat ma ai.

¹⁸Na mana ni mung, sagu rem ai ni shanhte hpe tsun dan ai ga majaw mau ma ai.

¹⁹Mari chyawm gaw dai ga yawng mayawng hpe matsing gun la nna, shi kraw kata e a ru yu nga ai.

²⁰Sagu rem ai ni mung, shanhte hpe tsun dan manu ai hte maren, na la, mu la ai lam mahkra a majaw, Karai Kasang hpe shagrau sha-a nna, shakawn kungdawn let bai wa ma ai.

²¹Dai ma hpe matu gadoi lam jaw na, matsat ya nhtoi du jang, hkritung hkriwang e shi garai n rawng yang, lamu kasa shamying da ai amying hte maren, shi hpe Yesu ngu nna shamying mu ai.

²²Mawshe a tara hte maren shanhte a jasan jaseng ai nhtoi gu jang, “Shadang sha alat shagu dai Madu a matu chyoi pra ai ngu lu na,” nga nna,

²³dai Madu a tara hta ka da nga ai hte maren, dai ma hpe Madu kaw sa ap ya na matu mung, dai Madu a tara hta tsun da ai hte maren,

²⁴Hkrudu lahkawng, shing n rai, u ra kasha lahkawng, hkungga nawng ya na matu mung, shan gaw dai ma hpe Yerusalem mare de woi sa mu ai.

²⁵Ya, yu mu, Simun mying ai masha langai mi Yerusalem mare e nga ai: dai wa gaw dinghpring ai hte tara hkungga nna, Israela hpe shalan shabran na lam myit mada nga ai wa rai nga ai; dai Chyoi pra ai Wenyi mung shi a ntsa e nga nga ai.

²⁶Shi gaw, dai Madu a Hkristu hpe garai n mu yang, si na n rai, nga nna Chyoi pra ai Wenyi hte madun dan ai lu la wu ai.

²⁷Dai wa gaw nawku Htingnu kata de Wenyi hte du sa ai; kanu yan kawa gaw ma Yesu hpe tara htung hte maren di ya na woi sa mu ai shaloi,

²⁸Simun gaw shi a lata hte dai ma hpe pawn la nna Karai Kasang hpe shakawn sha-a let,

²⁹“N-gawn Madu e, na ga hte maren, na a mayam wa hpe ngwipyaw ai hte ya wa shangun dat nit ga law:

³⁰Masha amyu myu ni a man e lajang da nna,

³¹Maigan amyu ni hpe jahtoi dan na nhtoi hte,

³²Na amyu Israela a hpung shingkang matu rai nga ai, Na a hkye hkrang la ai lam hpe, nye a myi hte chyaw ngai mu lu se ai,” nga nna tsun ai.

³³Kanu yan kawa gaw shi a lam tsun ai ga majaw, mau nga ma ai.

³⁴Simun gaw shanhte hpe shaman ya nna, kanu Mari hpe, “Yu u, ndai ma gaw, Israela masha ni hta, law law a matu kataw shara hte, law law a matu rawt wa na lam mung, ndang kalang rai hkat na kumla matu mung, san da ai wa rai nga ai:

³⁵dai hta n ga, masha law law ni a kraw lawang na myit mamyit ni dan pra wa na matu, na a myit masin hta nan nhtu htinggrang na ra ai,” ngu nna tsun wu ai.

³⁶Dai hta kaga, Ashe amyu re ai Hpanuela shayi sha, Anna ngu ai num myihtoi langai mi nga ai; shi gaw asak grai kaba la sai; mahkawn prat kaw nna sanit ning du hkra madu wa hte nga nhtawm, matsat shi mali ning tup gaida nga ai:

³⁷dai num gaw nawku Htingnu kaw na n pru ai sha, lusha gam nna akyu hpyi ai hte shani shana daw jau let anga nga ai.

³⁸Shi mung dai ahkying e nan sit sa nna, Karai Kasang hpe shakawn kungdawn let, Yerusalem hpe hkye hkrang la na lam myit mada ai ni nlang hte hpe, dai ma a lam tsun dan mu ai.

³⁹Shan gaw dai Madu a tara hte maren, lam magup shatup da ngut jang, Galile mung na, tinang nga ai Nazaret mare de bai wa ma ai.

⁴⁰Dai ma gaw kaba wa ai hte n-gun lapyin ja wa nna, hpaji byeng-ya hte hpring nga ai; Karai Kasang a chyeju mung, shi a ntsa e anga nga ai.

⁴¹Shi a kanu yan kawa gaw, Shalai wa ai poi ten du jang, shaning shagu Yerusalem mare de sa ma ai.

⁴²Dai ma gaw shi lahkawng ning du jang, dai poi a htung hte maren shanhte lung wa ma ai;

⁴³dai nhtoi hte shalai ngut nna bai wa ma yang, dai ma Yesu gaw Yerusalem e hti nga mat ai; kanu yan kawa chyawm gaw dai n chye ma ai.

⁴⁴Rau wa manang hpung hta lawm nga a dawng, nga nna myit kau ma ai majaw, shan gaw lani sat wa nna, mayu dama ni hte chye chyap ai ni kaw shi hpe hkan tam ma ai;

⁴⁵dai ma hpe n mu jang, shan gaw shi hpe hkan tam let, Yerusalem mare de nhtang sa wa ma ai.

⁴⁶Ya masum ya na wa sayang she, dai nawku Htingnu kata, sara ni a ka-ang e, shanhte a ga madat la nna, shanhte hpe jasan let dung nga ai hpe, shan sa mu mu ai.

⁴⁷Shi a ga na mana ni gaw, shi a myit kung ai hpe mung, shi htan ai ga a majaw mung, mau nga ma ai.

⁴⁸Shi hpe mu jang shan mau mat ma ai rai nna, shi a kanu gaw, “Sha e, hpa rai an e ning di mi ta? yu u, nwa hte an myit ru myit tsang ai hte nang hpe hkan tam nga ga ai,” ngu nna shi hpe tsun wu ai.

⁴⁹Shi gaw, “Hpa rai ngai hpe tam myit ta? Nye Wa hte seng ai lam hta ngai nga lu mai ai, nan n chye myit ni?” ngu nna shan hpe htan wu ai.

⁵⁰Rai timung, shi shan hpe tsun ai ga gaw, shan n chye na ma ai.

⁵¹Shi chyawm gaw shan hte rau yu wa nna, Nazaret mare de du wa ai: shan a npu e mung shi taw nga ai: shi a kanu gaw dai ga mahkra hpe shi kraw hta matsing da wu ai.

⁵²Yesu gaw hpaji byeng-ya kunghpan wa ai hte, gawng shing-yan kaba wa nna, Karai Kasang a man e mung, masha a man e mung, myi man pa wa nga ai.