Read Jinghpaw Hanson Version Bible LUKA 20 Bible Online

LUKA 20 - Jinghpaw Hanson Version Bible bible

LUKA 20

¹Dai nawku Htingnu hta, mung masha ni hpe sharin shaga nga ai hte kabu gara shiga hkaw tsun nga ai nhtoi langai mi hta, hkinjawng agyi ni, laika ka ai sara ni hte agyi salang ni gaw, shi kaw sit sa nna,

²“Nang gaw hpa ahkang hte ndai amu ni hpe galaw nga n ta? ndai ahkang nang hpe kadai wa jaw a ta? anhte hpe tsun dan mi,” nga nna shi hpe tsun ma ai.

³Shaloi shi gaw, “Ngai mung nanhte hpe lama mi san made ga, nanhte htan ya ma la:

⁴Yawhan a baptisma lam gaw, lamu de na rai ni? shing n rai, masha hta na rai ni?” ngu nna shanhte hpe san mu ai.

⁵Shanhte gaw myit yu nna, “Lamu de na re ai, anhte ngu yang mung, Dai rai yang gaw, hpa rai shi hpe n kam myit ta? nga nna shi tsun na ra ai:

⁶Masha hta na re ai, ngu yang mung, Yawhan gaw myihtoi re ai, nga nna mung masha ni nlang myit kam nga ma ai majaw, anhte hpe nlung hte kabai sat na ma ai,” nga nna jawm myit la nhtawm,

⁷“Kanang na re ai gaw anhte n chye ga ai,” ngu nna htan mu ai.

⁸Shaloi Yesu gaw, “Ndai amu ni hpa ahkang hte ngai galaw nngai gaw, ngai mung nanhte hpe n tsun dan na nngai,” ngu nna shanhte hpe tsun mu ai.

⁹Dai shaloi e mung masha ni hpe ndai ga shadawn hte shi tsun wu ai gaw, “Masha langai mi tsabyi sun hkai sharam da nna, sun galaw ai masha hpe boi ya da nhtawm, kaga mung de na na wa sa nga mat ai.

¹⁰Aten du jang, sun na asi hta na shi hpe jaw maru ga, nga nna sun galaw ai ni hpang de mayam langai mi shangun dat wu ai: sun galaw ai ni gaw dai wa hpe anu kayat nna, kaman dat dat mu ai.

¹¹Bai, mayam kaga hpe shi shanhte hpang de shangun dat wu ai: dai wa hpe mung shanhte anu kayat nna kaya kahpa di zingri nhtawm, kaman dat dat mu ai.

¹²Bai masum lang ngu na hta, mayam langai mi bai shangun dat wu ai: dai wa hpe mung aje ahpye di nhtawm, shapraw kau mu ai.

¹³Shaloi tsabyi sun madu wa gaw, Ngai kaning di na i? ‘tsawra ai, ngai sha hpe, ngai shangun dat yu na we ai: shi e gaw shanhte hkrit hkungga na ma ai nhten,’ nga nna tsun ai.

¹⁴Sun galaw ai ni gaw dai kasha wa hpe mu jang, ‘Ndai wa gaw sali wunli dagraw na wa rai nga ai; dai sali wunli anhte lu la ya hkra, shi hpe sat kau gaw,’ nga nna shada da bawng la nhtawm, sun shinggan de shi hpe shapraw nna, sat kau mu ai.

¹⁵Dai majaw tsabyi sun madu gaw shanhte hpe kaning di na wu ta?

¹⁶Shi sa du nna, dai sun galaw ai ni hpe sat kau nhtawm, dai sun masha kaga hpe htawt shap ya na ru ai,” ngu mu ai. Dai ga na ai ni gaw, “Shing n rai u ga,” nga ma ai.

¹⁷Shaloi shi gaw shanhte hpe mada yu let, “Dai rai yang gaw, ‘Wahpang gaw ai ni lata kau ai nlung gaw, Ningjut jahtum na nlung tai wa sai,' nga nna ka da ai ga gaw, hpa nga ai rai ta?

¹⁸Dai nlung hta hkrat ai wa kadai mung, daw hten na ra ai; gade a ntsa e rai timung, dai nlung hkrat bun yang gaw, dai wa gaw ayun ayaw mani mat na ra ai,” ngu nna tsun wu ai.

¹⁹Dai ga shadawn hpe laika ka ai sara ni hte hkinjawng agyi ni hpe sha-ang nna tsun ai gaw shanhte chye ma ai majaw, dai ahkying hta pyi shi hpe rim la na maw ma ai, rai timung, mung masha ni hpe hkrit nna nga mat ma ai.

²⁰Dai rai nna shanhte gaw shi hpe gyam yu ai hte, mung up du hte ahkang aya lu ai munggyi wa kaw, shi hpe ap kau lu na matu, shi a ga hta mara shagun na lam mu hkra, dingman hpyi hpun ai kin-yu masha shangun dat ma ai.

²¹Dai ni gaw, “Sara e, nang gaw ding ding man man tsun sharin ndai hte, masha a myi man hpe n tau yu ai sha, Karai Kasang a lam hpe tengman ai hku sharin shaga ndai gaw, anhte chye ga ai:

²²anhte gaw Kehta hkawhkam hpe hkansi mai bang ga ni? n mai bang a ni?” ngu nna shi hpe san yu mu ai.

²³Rai timung, shi gaw dai ni a myit magaw ai hpe chye ya wu ai rai nna, shanhte hpe,

²⁴“Gumhpraw lap mi ngai hpe madun yu mi; gade a sumla hte masat laika kap nga a ta?” ngu nna htan mu yang, shanhte gaw, “Kehta a sumla hte masat rai nga ai,” ngu mu ai.

²⁵Shaloi shi gaw, “Dai rai yang gaw, Kehta hte seng ai hpe gaw, Kehta hpe ya mu: Karai Kasang hte seng ai hpe mung, Karai Kasang hpe ya mu,” ngu nna shanhte hpe tsun mu ai.

²⁶Shanhte gaw, mung masha ni a man e shi a ga hta mara n mu ma ai hte, shi htan ai ga a majaw mau nna, atsin sha nga ma ai.

²⁷Dai shaloi, ‘Bai hkrung rawt wa na lam n nga ai,’ nga nna ndang ga ai Saduke ni nkau mi gaw shi kaw sa du nna,

²⁸“Sara e, num lu ai kahpu wa, kashu kasha n kap ai si mat yang gaw, kahpu a gaida hpe kanau wa hta nna, kahpu a matu mara shachyaw u ga, nga nna Mawshe gaw anhte hpe ka da ya ma ni ai.

²⁹Ning re ai yan nau ni marai sanit rai nga ma ai: shawng na wa gaw num la nna, matu mara n kap ai, si mat wa ai;

³⁰hpang na wa mung, masum ngu na wa mung, dai kahpu a gaida hpe hta ma ai:

³¹dai zawn marai sanit du hkra matu mara n kap ai hkrai, si mat wa ma ai:

³²hpang jahtum e num dai mung si mat wa ai.

³³Dai rai nna, dai bai hkrung rawt ai hta, dai numsha gaw dai ni hta na, gade a madu jan mahtang tai na ra ta? kaning rai nme law, marai sanit a madu jan shi tai yu sai,” ngu nna shi hpe san yu mu ai.

³⁴Shaloi, Yesu gaw, Ndai dinghta masha ni gaw, “htinggaw rawn ai hte, num la num ya rai ma ai:

³⁵wora katsan prat hte si ai kaw na bai hkrung rawt wa ai de du ging ai ni chyawm gaw, htinggaw rawn ai hte num la num ya ngu ai n nga ma ai:

³⁶dai ni gaw si hkrung si htan ngu ai htawm hpang e n hkrum lu masai rai nna, lamu kasa ni zawn rai wa ai hte, bai hkrung rawt ai a kashu kasha ni rai ma ai majaw, Karai Kasang a kasha ni rai nga ma ai.

³⁷Mawshe pyi dai Madu hpe, Abraham a Karai Kasang, Isak a Karai Kasang, Yaku a Karai Kasang nga nna tsun ai ga hte, si ai ni bai hkrung rawt ai lam dai singwum hte seng nna ka da ai hta, madun da nga ai.

³⁸Karai Kasang chyawm gaw si nga ai ni a Karai Kasang n rai, hkrung nga ai ni a Karai Kasang she rai nga ai: yawng mayawng hte gaw, shi a man e hkrung nga ma ai,” ngu nna shanhte hpe htan mu ai.

³⁹Shaloi laika ka ai sara ni nkau mi gaw, “Sara e, nang gaw rai la ai hku tsun nit dai,” nga nna htan ma ai.

⁴⁰Kaning rai nme law, dai ni gaw shi hpe hpa lam mung bai n san wam manu ai.

⁴¹Shaloi shi gaw shanhte hpe, “Hkristu gaw Dawi a kasha re ai, nga nna shanhte kaning rai tsun lu nga ma ta?

⁴²Kaning rai nme law, Dawi shi nan, ‘Dai Madu nye a madu hpe tsun wu ai gaw,

⁴³Na a gumlau ni hpe, na a lagaw nhpang e, lagaw kabye lahkum ngai shatai kau ai du hkra, Nye a hkra maga de naw dung nga u,’ nga ai, nga nna Shakawn Kungdawn Laika hta tsun nga ai,

⁴⁴Dai rai nna Dawi gaw, Hkristu hpe, Madu ngu wu ai rai yang gaw, shi a kasha kaning rai nme rai na rai nga a ta? ngu nna tsun mu ai.”

⁴⁵Masha nlang hte na hkra sape ni hpe shi tsun mu ai gaw,

⁴⁶“Laika ka ai sara ni hpe sadi nga mu: shanhte palawng galu bu hpun let hkawm sa mayu nna, gat hkan shachyen ai hte, tara jawng hkan na reng grau ai tingnyang ni, poi hkan na reng grau ai dung shara ni hta dung na sharawng ai hta n-ga,

⁴⁷gaida gaina ni a nta ni hpe hpya lu hpya sha nna, hpyi hpun ai hte galu galang akyu hpyi ma ai: dai ni gaw dawdan kau ai grau nna hkrum na mara ai,” ngu wu ai.