Read Jinghpaw Hanson Version Bible LUKA 22 Bible Online

LUKA 22 - Jinghpaw Hanson Version Bible bible

LUKA 22

¹Ya Shalai wa ai poi ngu ai, Azuma poi du na ni wa sai.

²Shaloi hkinjawng agyi ni hte laika ka ai sara ni gaw, shi hpe kaning di sat kau lu na lam, tam nga ma ai: kaning rai nme law, shanhte mung masha ni hpe hkrit da mu ai.

³Dai shaloi e, sape shi lahkawng hta lawm ai, Iskarut ngu ai Yuda hta, Satan shang wu ai rai nna,

⁴dai wa gaw pru wa nhtawm, hkinjawng kaba ni hte hpyen du ni kaw, shi hpe kaning di ap kau ya na lam, shanhte hte sa bawng wu ai.

⁵Dai majaw shanhte kabu nna, Yuda hpe gumhpraw jaw na, nga nna myit hkrum ma ai.

⁶Shi mung hkam la nna, masha hpawng e n rai jang, Yesu hpe ap kau lu na mai ang ai ginwan tam nga ai.

⁷Ya dai Shalai wa ai hkungga sat lu ai Azuma nhtoi du ra ai.

⁸Shaloi shi gaw Petru yan Yawhan hpe, “Anhte sha na matu Shalai wa ai poi sa shachyip magang mu,” ngu nna shangun dat mu ai.

⁹Dai yan gaw, “Kanang e shachyip da shangun mayu n ta?” ngu nna shi hpe san mu ai.

¹⁰Shaloi shi gaw, “Yu mu, mare de shang sa wa myit yang, ntsin dibu hpai ai wa hte nan hkrum na marin dai: dai wa kaw hkan nang wa nna, shi shang ai nta hta hkan shang nhtawm,

¹¹nta madu hpe, ‘Ngai nye a sape ni hte Shalai wa ai poi sha lu na manam gawk kanang rai ta?’ nga nna Sara gaw nang kaw san shangun dat mi ai, ngu nna tsun mu.

¹²Shaloi jahting tawn ai ntsa gawk kaba nan hpe madun na ra ai: dai yang e shachyip da ma la,” ngu nna tsun dat mu ai.

¹³Dai sape yan pru sa wa nna, shi tsun dat ai hte maren mu ma ai rai nna, Shalai wa ai poi shachyip da ma ai.

¹⁴Ya aten du jang shi dung nna, kasa ni mung shi hte rau rai nga ma ai.

¹⁵Shaloi shi gaw, “Ngai nni nkri garai n hkrum yang, nanhte hte rau ndai Shalai wa ai poi sha na, ngai grai ra da we ai:

¹⁶kaning rai nme law, ngai nanhte hpe tsun made ga, Ndai poi a lam Karai Kasang a mungdan hta garai n dik dik gaw, ngai dai hpe n sha na ni ai,” ngu nna shanhte hpe tsun mu ai.

¹⁷Shaloi shi gaw gawm la nna, shakawn ngut jang, “Ndai la nna nanhte shada karan lu mu:

¹⁸ngai nanhte hpe tsun made ga, Karai Kasang a mungdan garai n du dingsa sa gaw, ya kaw nna tsabyi ru a asi hta na, ngai n lu na ni ai,” ngu mu ai.

¹⁹Shaloi shi muk la nna shakawn ngut jang, dai hpe ahkyep alep nhtawm, shanhte hpe jaw let, “Ndai gaw nanhte a matu ya kau ai, nye a hkum rai nga li ai: ngai hpe adum nga na matu, ndai galaw mu,” ngu mu ai.

²⁰Dai hte maren shana shat sha ngut jang, dai gawm hpe mung shi la nhtawm, “Ndai gawm gaw nanhte a matu ru kau ai, nye a asai hta gaw da ai, ga shaka ningnan rai nga ai.

²¹Rai timung, yu mu, ngai hpe sa ap kau na wa a lata gaw, ndai sha ku hta ngai hte rau rai nga ai:

²²Masha Kasha gaw, san da ai hte maren sa wa na gaw, rai nga ai: rai timung, shi hpe ap kau ai wa hta dingnye nga na ra ai,” ngu mu ai.

²³Shing nga jang sape ni gaw, shanhte hta na kadai wa ndai lam galaw na ra ai kun, nga nna shada da san hkat ma ai.

²⁴Dai hta kaga, shanhte hta na kadai wa mahtang grau kaba nga ai kun, nga nna shanhte shada da tsun shajang pru ma ai.

²⁵Dai rai nna Yesu gaw, “Maigan amyu hkawhkam ni gaw, maigan amyu ni a ntsa e up hkang lu ma ai rai nna, dai ni a ntsa e daru magam lu ai ni hpe, Chyeju madu ni, nga nna hkungga shaga ma ai.

²⁶Nanhte chyawm gaw shing rai na n rai: nanhte hta, grau kaba ai wa gaw, aprat kaji ai wa zawn rai u ga; up hkang ai wa mung, shangun ma zawn rai u ga.

²⁷Kaning rai nme law, kadai mahtang grau kaba a ta? sha dung nga ai wa kun? shing n rai, galaw jaw ai wa kun? sha dung nga ai wa, n rai ni? Rai timung ngai gaw, nanhte hta na galaw jaw ai wa zawn rai nga nngai.

²⁸Nanhte chyawm gaw, ngai gunglau hkrum shatsang ai hta, ngai hte rau nga nan nga ai ni, rai nga myit dai.

²⁹Dai re ai majaw, nye wa gaw ngai hpe mungdan ap ya ai zawn, ngai mung nanhte hpe mungdan ap ya nna,

³⁰nye a mungdan e, nye a sha ku hta, nanhte lu sha lu na marin dai: nanhte mung tingnyang hta dung nna, Israela amyu shi lahkawng hte hpe tara dara lu na marin dai.

³¹Simun, Simun e, yu u, hkaulan mam hpe hking ai zawn, nanhte hpe hking lu n ga nga, Satan gaw ahkang hpyi nga ai:

³²rai timung na a kamsham ai myit n hten lit ga, ngu nna na a matu ngai akyu hpyi da ni ai; nang bai kayin dum yang, na nhpu nnau ni hpe shangang shakang ya u,” ngu wu ai.

³³Shaloi Simun gaw, “Madu e, nang hte rau ngai gaw htawng de rai timung, si hkam ai de rai timung, hkan shang nang na myit tawng nga nngai,” ngu nna htan wu yang,

³⁴Yesu gaw, “Petru e, ngai nang hpe tsun de ga, Dai ni pyi, u garai n goi yang, nang ngai e n chye nngai, nga nna masum lang nyet kau na rin dai,” ngu wu ai.

³⁵Dai hta kaga shi shanhte hpe tsun mu ai gaw, “Gumhpraw jan, htingpa, kyepdin n gun n lang ai sha, ngai nanhte hpe shangun dat ai shaloi, nanhte hta lama ma ra malit ni?” ngu nna san mu yang, shanhte gaw, “Hpa mung n ra ga ai,” ngu mu ai.

³⁶Shaloi shi shanhte hpe, “Ya chyawm gaw gumhpraw jan lu ai wa gaw, la gun u ga; htingpa lu ai wa mung, la hpye u ga; nhtu n lu ai wa gaw, hpun palawng dut nna mari u ga:

³⁷kaning rai nme law, ngai nanhte hpe tsun made ga, ngai hte seng maseng gaw ngut mat na rai ra ai majaw, ‘Dai wa gaw tawt lai ai ni hta hti lawm mat nga ai,’ nga nna ka da ai ga gaw, ngai hta dik lu na rai nga ai,” ngu nna tsun mu ai.

³⁸Dai rai nna shanhte gaw, “Madu e, yu u, nang e nhtu lahkawng nga nga ai,” ngu nna tsun dan mu yang, shi gaw, “Dai hte ram sai,” ngu nna shanhte hpe tsun mu ai.

³⁹Ya shi gaw pru nna, shawoi sa ga ai hte maren Tsanlun bum de sa wa nga ai.

⁴⁰Dai shara de du jang, shi gaw, “Nanhte gunglau ai de n lawm mat myit ga, akyu hpyi nga mu,” nga nna shanhte hpe tsun da mu ai;

⁴¹sape ni nga ai kaw nna lungdin kabai hkap daram hka sa wa nhtawm, lahput hput di let,

⁴²“Wa e, nang ra n yang gaw, ndai gawm hpe ngai kaw na shalai kau ya e; rai timung ngai ra ai hku n rai, nang ra ai hku she rai u ga,” ngu nna hpyi wu ai.

⁴³(Dai shaloi lamu de na lamu kasa langai mi dan pru nna, shi hpe sa shalan ya wu ai.

⁴⁴Myit masin nachying nni nkri hkrum ai majaw, shi grau nna akyu hpyi shaja wu ai: shi a salat mung, sai tum sai pa zawn ga de hkrat lu ai.)

⁴⁵Shing rai akyu hpyi ai kaw na rawt nna, sape ni kaw wa yu yang, shanhte gaw myit yawn ai hte yup nga ma ai hpe, wa mu wu ai rai nna, “Hpa rai yup nga myit ta?

⁴⁶rawt mu, gunglau ai de n lawm myit ga akyu hpyi nga mu,” ngu nna shanhte hpe tsun mu ai.

⁴⁷Shing nga naw tsun nga yang, yu mu, masha wunawng hte sape shi lahkawng hta lawm ai Yuda gaw, dai ni a shawng e sa wa nna, Yesu hpe pup na sit wa ai.

⁴⁸Dai rai nna Yesu gaw, “Yuda e, nang gaw Masha Kasha hpe pup ai hte ap kau n ni?” ngu nna shi hpe tsun wu ai.

⁴⁹Shaloi shi hte rau nga ai ni gaw, byin wa na ra ai amu hpe tau chye mu yang, “Madu e, anhte nhtu hte kahtam na rai ni?” ngu nna,

⁵⁰shanhte hta na marai langai mi gaw, hkinjawng agyi a mayam hpe kahtam wu ai rai nna, dai wa a hkra maga ana di mat lu ai.

⁵¹Yesu chyawm gaw, “Shanhte ra ai mi rai mu ga,” nga nna htan tsun ngut jang, dai mayam a na hpe ahtawk nna shamai ya wu ai.

⁵²Bai Yesu gaw shi hpang de du sa ai hkinjawng agyi ni, nawku Htingnu sin ai hpyen du ni hte agyi salang ni hpe, “Nanhte gaw damya hpe rim la na zawn, nhtu dawhkrawng hte rai nna pru sa marin ni?

⁵³Nawku Htingnu e shani shagu nanhte hte rau nga nga yang, ngai hpe rim la na nanhte n htim yu manit dai; rai timung, ndai ahkying gaw nanhte a ahkying rai nga ai hte, nsin a ahkang hpung ja ai mung rai nga ai,” ngu mu ai.

⁵⁴Shaloi shanhte gaw shi hpe rim woi wa nhtawm, hkinjawng agyi a nta de woi bang mu ai: Petru mung tsan tsan kaw nna hkan nang nga ai.

⁵⁵Ya masha ni nta wang ka-ang e wan wut nna hpawng dung nga ma yang, Petru mung shanhte a ka-ang e dung lawm nga ai.

⁵⁶Shing rai wan a ahtoi hta dung nga ai hpe, nchyang numsha langai mi e mu wu yang, shi hpe azi yu nna, “Ndai wa mung shi hte rau rai nga ai,” ngu wu ai.

⁵⁷Shaloi Petru gaw, “Num nang e, dai wa hpe ngai n chye nngai,” ngu nna nyet kau wu ai.

⁵⁸Dai hpang loi hkring rai jang langai wa mi mung shi hpe mu nna, “Nang mung shanhte hta lawm nga ndai,” ngu wu yang, Petru gaw, “La nang e, ngai n rai nngai,” ngu wu ai.

⁵⁹Hkying mi daram bai na jang, langai wa mi mung, “Gaja wa teng teng, ndai wa mung shi hte rau nga nga ai; Galile masha mung shi rai nga ai,” nga nna atik anang tsun wu ai:

⁶⁰Petru gaw, “La nang e, nang tsun ai lam ngai n chye nngai,” ngu wu ai. Shing nga naw tsun nga yang, u goi shayan ra ai.

⁶¹Shaloi Madu gaw kayin nna, Petru hpe mada yu wu ai. Dai rai nna Petru gaw, “Dai ni pyi, u garai n goi yang, nang ngai hpe masum lang nyet kau na rin dai,” nga nna Madu shi hpe tsun ai ga dum dat wu ai:

⁶²shaloi shi gaw shinggan de pru nna ja ja hkrap nga ai.

⁶³Yesu hpe jum sin ai ni mung shi hpe asawng asang di nna, anu kayat mu ai:

⁶⁴shi a myi man magap kau ya nhtawm, “Myihtoi htoi yu u; nang hpe htwi ai gaw, kadai wa rai ta?” ngu nna san mu ai.

⁶⁵Shanhte lam kaga law law hte mung, shi hpe shatan nhkan nga let tsun ma ai.

⁶⁶Nhtoi htoi yang, mung masha ni a salang hpung rai nga ai, hkinjawng agyi ni hte laika ka ai sara ni, zuphpawng ma ai rai nna, dai ni a salang hpawng de shi hpe woi wa nhtawm,

⁶⁷“Nang Hkristu rai nga n yang gaw, anhte hpe tsun dan mi,” ngu mu ai. Yesu gaw, “Ngai tsun timung, nanhte kam na myit dai n rai:

⁶⁸ngai san timung, nanhte htan na myit dai n rai.

⁶⁹Rai timung Masha Kasha gaw, ya kaw nna Karai Kasang a hpung shingkang a hkra maga de dung nga lu na ra ai,” ngu nna shanhte hpe tsun mu ai.

⁷⁰Shaloi shanhte nlang, “Dai rai yang gaw, nang Karai Kasang a kasha rai nga n hka i?” ngu nna san mu ai; shi gaw, “Ngai re ai, nga nna nanhte nan tsun nga myit dai,” ngu nna shanhte hpe htan mu ai.

⁷¹Shaloi shanhte gaw, “Anhte hpa sakse mi naw ra nga ga ta? shi a n-gup na nan anhte dai na lu saga ai,” nga ma ai.