Read Jinghpaw Hanson Version Bible LUKA 23 Bible Online

LUKA 23 - Jinghpaw Hanson Version Bible bible

LUKA 23

¹Dai shaloi hpawng nga ai ni nlang hte gaw rawt nna, shi hpe Pilat hpang de woi bang nhtawm,

²“Ndai wa gaw anhte a amyu hpe lam woi shadam ai hte, Kehta hkawhkam hpang de hkansi bang na lam hkum da nna, shi hkum dai Hkristu ngu ai hkawhkam rai nga ai, nga nna tsun nga ai hpe, anhte mu ga ai,” ngu nna shi hpe mara jun mu ai.

³Shaloi Pilat gaw Yesu hpe, “Nang Yuda masha ni a hkawhkam rai nga n ni?” ngu nna san wu ai; shi gaw, “Nang tsun ai hte maren rai nga nngai,” ngu nna shi hpe htan wu ai.

⁴Pilat chyawm gaw, “Ndai wa hta hpa mara mung ngai n mu we ai,” ngu nna hkinjawng agyi ni hte shawa masha ni hpe tsun mu ai.

⁵Dai ni mahtang, “Ndai wa gaw Yuda mung ting hte, Galile mung kaw nna ya nang du hkra, sharin shaga nga ai hte, mung masha ni hpe woi kabrawng wu ai,” nga nna grau tsun anin shadut ma ai.

⁶Pilat gaw dai na jang, shi Galile masha re ai, n re ai, san la nhtawm,

⁷Herod up ai mung na masha re ai shi chye yu yang, Herod shi dai mung, Yerusalem mare e dai ten e nga nga ai rai nna, Yesu hpe shi hpang de sa bang shangun wu ai.

⁸Herod gaw Yesu hpe mu jang grai kabu nga ai: kaning rai nme law, shi a lam na yu nu ai rai nna, shi galaw dan ai lamik kumla langai ngai mu lu na, nga nna myit mada nga ai majaw, shi hpe mu mayu ai na la salu ai.

⁹Dai rai nna shi gaw Yesu hpe lam magup san yu wu ai, rai timung Yesu gaw, ga hkaw mi muk n htan ya wu ai.

¹⁰Hkinjawng agyi ni hte laika ka ai sara ni chyawm gaw rawt tsap nna, shi hpe mara grai grai jun da mu ai.

¹¹Herod mung shi a hpyen masha ni hte shi hpe aroi arip di nna, jahpoi asawng nhtawm, reng ai hpun palawng jahpun nna, Pilat hpang de bai nhtang sa shangun mu ai.

¹²Dai shani jang Herod yan Pilat gaw shada bai hkau ma ai: shawng de chyawm gaw shada myit kraw n ngawn hkat ma ai.

¹³Shaloi Pilat gaw hkinjawng agyi ni, du ni hte mung masha ni hpe shaga jahpawng nhtawm, “Mung masha ni hpe lam woi shadam ai wa re ai nga nna, ndai wa hpe nanhte ngai kaw sa bang manit dai:

¹⁴ya, yu mu, nanhte a man e ngai shi hpe san yu we yang, nanhte shagun ai mara lam hpa mung ndai wa hta ngai n mu we ai:

¹⁵dai hta n-ga Herod mung hpa mung n mu wu ai: shi gaw ndai wa hpe anhte hpang de bai sa dat shangun ra ai: dai rai nna, yu mu, ndai wa gaw hpa si ging ai amu mung n galaw wu ai;

¹⁶dai majaw ngai shi hpe anu sharim nna dat dat na we ai,” ngu nna shanhte hpe tsun mu ai.

¹⁷

¹⁸Shing nga jang shanhte nlang hte gaw, “Dai wa hpe la kau u, Baraba hpe chyawm gaw dat ya mi,” nga nna jawm jahtau ma ai:

¹⁹Baraba gaw, mare e gumlau ai hte masha sat ai amu a majaw htawng hkrat ai wa rai nga ai.

²⁰Pilat gaw Yesu hpe dat dat mayu wu ai rai nna, shanhte hpe bai shaga tsun mu ai:

²¹rai timung shanhte gaw, “Dai wa hpe wudang hta jen da u, jen da u,” nga nna jahtau nga ma ai.

²²Dai rai nna Pilat gaw masum lang ngu na hta, bai tsun wu ai gaw, “Ndai wa n hkru ai amu hpa galaw hkrup sata? shi hta si ging ai mara hpa mung ngai n mu we ai: dai majaw ngai shi hpe anu sharim nna dat dat na we ai,” ngu nna shanhte hpe tsun mu ai.

²³Shanhte mahtang nsen kaba hte jahtau nna, Yesu hpe wudang hta jen da lu na lam atik anang hpyi shaja ma ai: shing nga jahtau ai hte mung shanhte dang la ma ai.

²⁴Dai majaw Pilat gaw, shanhte hpyi ai hte maren rai u ga, nga nna dawdan ya mu ai.

²⁵Shing nga shi gaw shanhte hpyi ai hte maren, gumlau ai hte masha sat ai amu a majaw, htawng hkrat ai wa hpe dat ya nna, Yesu hpe gaw shanhte ra ai hku ap kau ya dat wu ai.

²⁶Yesu hpe shapraw sa wa nga ma yang, nam kahtawng de na wa ai Simun ngu ai Kureni mung masha langai mi hpe shanhte rim la nhtawm, wudang jahpai nna, Yesu a hpang e hkan sa shangun mu ai.

²⁷Masha wunawng wuwa kaba hte, shi a lam hkrap ngu hkrap ngoi, sharung shayawt nga ai numsha ni mung, shi a hpang e hkan nang ma ai.

²⁸Yesu gaw shanhte hpang de kayin nna, “Yerusalem shayi sha ni e, nye a majaw hkum hkrap myit: nanhte hkum dai hte, nanhte a nshu nsha ni a matu hkrap nga mu:

²⁹kaning rai nme law, Maudung num, na-um nasin n rai yu ai hkum hte, n chyu yu ai madoi chyu hpang gaw a nga ai, nga nna tsun na nhtoi gaw du wa ra ai.

³⁰Dai nhtoi e, bum ni hpe, Anhte a ntsa e daw kamyet mi, nga nna mung, kawng ni hpe, Anhte a ntsa e ka-up mi, nga nna mung, shanhte shaga shajang na mara ai:

³¹shanhte hpun katsing hta ning di ma yang gaw, hpun chyahkraw hta kaning wa di na mara ta?” ngu mu ai.

³²Dai shaloi damya lahkawng hpe mung, sat kau na nga, shi hte rau woi shapraw sa wa mu ai.

³³Ya Pungkum ngu ai shara de du jang, shanhte gaw shi hpe mung, damya yan hpe mung, shi a hkra maga de langai mi, pai maga de langai mi di nna, wudang hta jen da mu ai.

³⁴Shaloi Yesu gaw, “Wa e, shanhte a mara dat kau ya mu: shanhte galaw ai lam hpe shanhte n chye nga ma ai,” nga ai. Shanhte gaw shi a hpun palawng ni hpe mung, hpaida da nna karan la ma ai.

³⁵Mung masha ni gaw mada yu let tsap nga ma ai. Du aya lu ai ni mung shi hpe asawng asang nga nna, “Masha kaga hpe shi hkye la ga ai; ndai wa gaw Karai Kasang a Hkristu ngu ai, Karai Kasang lata la ai wa rai yang gaw, shi hkum dai shi hkye la u ga,” nga ma ai.

³⁶Hpyen masha ni mung sit sa nna, ntsin hkri ladawn jaw nhtawm,

³⁷“Nang Yuda ni a hkawhkam rai n yang gaw, na hkum dai nang hkye la u,” nga nna shi hpe roi ma ai.

³⁸Shi a ntsa e mung ‘Ndai wa gaw Yuda ni a hkawhkam rai nga ai,’ nga ai laika shakap da nga ai.

³⁹Wudang hta noi nga ai damya langai mi mung, “Nang gaw Hkristu n rai n ni? na hkum dai hte an hpe mung hkye la mi,” ngu nna shi hpe roi wu ai.

⁴⁰Langai wa mi chyawm gaw, “Nang mung dawdan ai ndai hte wa hkrum da ninglen, Karai Kasang hpe pyi n hkrit n ni?

⁴¹An gaw tinang a mara majaw hkrum ging ai hte maren dawdan ai hkrum ga ai: ndai wa chyawm gaw n sun n ang ai lam hpa mung galaw wu ai n rai,” nga nna dai wa hpe daru let htan wu ai.

⁴²Shing nga nhtawm, shi gaw, “Yesu e, nang na a mungdan hta du wa yang, ngai e dum rit law,” ngu nna hpyi wu ai.

⁴³Shaloi Yesu gaw, “Ngai nang hpe teng teng tsun de ga, Dai ni jang nang ngai hte rau Hparadisu e nga na rai nga ai,” ngu nna shi hpe htan wu ai.

⁴⁴Ya gaw ahkying kru daram rai nga ai rai nna, jan a ahtoi nip mat ai majaw, hkying jahku du hkra mung ting nsin chyip rai mat ai;

⁴⁵nawku Htingnu na nba grang mung, ka-ang brang rai ga mat ai.

⁴⁶Shaloi Yesu gaw, “Wa e, nye a Wenyi na a lata hta ngai ap ya de ai,” nga nna nsen kaba hte jahtau wu ai: shing nga tsun ngut jang, shi nsa hti mat ai.

⁴⁷Shing rai byin ai lam ni hpe hpyen latsa up ai bu wa mu wu yang, “Gaja wa teng teng ndai wa gaw dingman ai wa rai nga ai,” nga nna Karai Kasang hpe shagrau sha-a wu ai.

⁴⁸Dai lam yu na nga, sa hpawng ai masha nlang hte mung, shing rai byin ai lam ni hpe mu mu yang, sinda adup let bai wa ma ai.

⁴⁹Shi hpe chye machye ni hte, Galile mung nna shi kaw hkan nang ai num ni gaw, tsan tsan e tsap nna, dai lam ni hpe mada yu let, nga nga ma ai.

⁵⁰Shaloi, yu mu, Yuda mung hta Aramahti ngu ai mare na, Yawsep mying ai rung aya lu ai wa langai mi nga ai: dai wa gaw mai kaja ai hte dinghpring ai wa mung, Karai Kasang a mungdan hpe myit mada ai wa mung, rai nga nna,

⁵¹rung aya lu ai gale ni a bawng ai hku hte galaw ai lam hta myit n hkrum lawm ai, rai nga ai:

⁵²shi gaw Pilat kaw shang nna Yesu a hkum tsawp hpyi wu ai.

⁵³Dai hpe shayu nna, lachyit sumpan hte ahkyen kayawp nhtawm, kadai hpe mung garai n bang yu ai, nlung hta krawk da ai lup hta, bang tawn da wu ai.

⁵⁴Ya Shachyip da ai nhtoi rai nga ai rai nna, laban nhtoi du magang ra ai.

⁵⁵Galile mung nna shi hte rau pru sa ai numsha ni mung, hpang e hkan nang nna, dai lup hpe mung, shi a hkum tsawp hpe kaning di tawn da ai mung, mu da ma ai.

⁵⁶Shaloi shanhte wa nna, manam pyaw ai baw hte mura sau lajang da ma ai. Laban nhtoi e gaw, tara nga ai hte maren shanhte laban nga ma ai.