Read Jinghpaw Hanson Version Bible LUKA 24 Bible Online

LUKA 24 - Jinghpaw Hanson Version Bible bible

LUKA 24

¹Rai timung, hpang na nhtoi bat shawng shani na nhtoi mahka de, shanhte gaw lajang da ai manam pyaw ai baw la gun nna, lup de sa wa ma ai.

²Sa du ma yang, lup mahka na nlung galau mat nga ai hpe, shanhte mu ma ai rai nna,

³shang yu yang, dai Madu Yesu a moi mang hpe n mu mu ai.

⁴Shing re ai majaw shanhte mau ung ang nga ma yang, yu mu, tu kabrim ai hpun palawng bu hpun ai masha lahkawng shanhte a makau e tsap nga ma ai.

⁵Dai numsha ni hkrit kajawng nna ga de myi man dagup nga ma yang, dai yan gaw, “Hkrung ai wa hpe si ai ni kaw, hpa rai tam myit ta?

⁶Shi nang e n nga ai, hkrung rawt wa sai: Galile mung e naw nga yang,

⁷Masha Kasha gaw yubak kap ai ni a lata de ap kau ai hkrum nna, wudang hta jen da ai hkam ngut jang, masum ya nhtoi hta hkrung rawt wa na ra ai lam, nanhte e tsun da ai ga hpe myit dum mu,” ngu nna shanhte hpe tsun mu ai.

⁸Shaloi shanhte gaw Yesu a ga hpe dum nna,

⁹lup de na bai wa nhtawm, sape shi langai hte hte kaga ni nlang hte hpe, dai lam yawng mayawng wa tsun dan mu ai.

¹⁰Dai lam wa tsun dan ai ni gaw, Magdala Mari, Yoana, Yaku a kanu Mari hte rai ma ai; shanhte hte rau nga ai numsha kaga ni mung, kasa ni hpe dai lam tsun dan mu ai.

¹¹Kasa ni chyawm gaw shanhte a ga hpe kaman ga zawn nawn nna n kam ya ma ai.

¹²(Rai timung, Petru gaw rawt nna, lup de gat sa wa nhtawm, gum yu wu yang sumpan taw nga ai sha mu wu ai rai nna, shing rai byin ai lam hpe mau let, shi a nta de bai wa ai.)

¹³Dai hta kaga, yu mu, dai shani e nan shanhte hta na marai lahkawng, Yerusalem mare nna, mai sanit daram tsan ai Ema-u kahtawng de sa wa ma ai rai nna,

¹⁴dai byin mabyin ni a lam shada tsun chyai nga ma ai.

¹⁵Shing rai tsun chyai nna shada san hkat let sa wa nga ma yang, Yesu gaw shi hkum dai sit sa nna, shan hte rau sa wa ai.

¹⁶Rai timung, shi hpe n chye mu ga, shan a myi hpe myi le le ya mu ai.

¹⁷Shaloi shi gaw, “Nan hkawm sa wa let, shada da tsun chyai ai lam gaw, hpa lam rai ta?” ngu nna san mu yang, shan gaw myi man sum let, hkring tsap nga ma ai.

¹⁸Shaloi dai yan hta na Hkleopa ngu ai wa gaw, “Nang gaw Yerusalem mare e sa manam nga da nhtawm, ya hte dai mare e byin ai lam ni hpe, nang hkrai sha n chye n ni?” ngu nna htan wu ai.

¹⁹Dai rai nna shi gaw, “Hpa lam rai ta?” ngu nna bai san wu yang, shan gaw, “Nazaret mare na Yesu a lam rai nga ai: dai wa gaw Karai Kasang a man e mung, masha nlang hte a man e mung, lata atsam hte n-gup hpaji a nsam rawng ai myihtoi wa rai nga ai:

²⁰rai timung hkinjawng agyi ni hte anhte a du salang ni gaw, dai wa hpe sat kau na lam dawdan na ap kau nhtawm, wudang hta jen da kau manu ai.

²¹Anhte chyawm gaw, dai wa gaw Israela amyu hpe hkrang shaw la na wa re ai, ngu nna myit mada ga ai: rai timung, shing rai nna dai lam ni byin ai pyi gaw, dai ni masum ya du sai.

²²Dai hta kaga, lup de jau jau e sa yu ai, anhte hpung hta na numsha nkau mi mung, anhte hpe wa shamau mi ai:

²³shi a moi mang hpe n mu jang, shanhte bai wa nna, dai Madu hkrung nga ai, nga nna tsun dan ai lamu kasa dan pru ai shingran mu ai lam, wa tsun shana mi ai.

²⁴Anhte hte rau nga ai ni nkau mi mung, lup de sa yu nna, numsha ni tsun ai hte maren mu mu ai: dai wa hpe chyawm gaw shanhte n mu ma ai da,” ngu nna shi hpe tsun dan mu ai.

²⁵Shaloi shi gaw, “Myihtoi ni htawn tsun ai ga mahkra hpe kamsham lu na, hpaji n rawng ai hte myit ja ai ni e!

²⁶Hkristu gaw shing re ai nni nkri hkam nna, shi a hpung shingkang hta shang ningngai na re ai, n rai ni?” ngu nna shan hpe tsun mu ai.

²⁷Shing nga tsun sharawt nhtawm, Mawshe ka da ai kaw nna, myihtoi ni yawng ka da ai Chyum laika ni hta na, shi hta ang ai ga yawng a ga lachyum, shan hpe tsun hpaw dan mu ai.

²⁸Ya, dai yan sa wa ai kahtawng de du magang yang, shi gaw lai nna sa wa na zawn rai nga ai.

²⁹Dai rai nna shan gaw, “Anhte rau shang nga ga: jan du sai, nsin mung sin wa ra ai,” ngu nna shi hpe akroi anoi saw mu ai: dai majaw shan hte rau nga na shi shang wa ai.

³⁰Dai shaloi shan hte rau shat sha na dung nga yang, shi muk la nna shaman nhtawm, ahkyep alep ngut jang shan hpe jaw mu ai.

³¹Shaloi shan a myi hpaw nna Yesu re ai chye ma ai: shi chyawm gaw shan kaw na mat mat wa ai.

³²Dai rai nna shan gaw, Lam e anhte ga tsun nna, Chyum laika ni a ga lachyum tsun hpaw dan mi ai shaloi, an a myit masin gadau gadap nga mali ai, n rai ni?” nga nna shada da tsun ma ai.

³³Shan gaw dai ahkying hta nan rawt nna, Yerusalem mare de bai wa nhtawm, zuphpawng nga ma ai sape shi langai hte hte, shanhte hte rau nga ai ni gaw,

³⁴‘Dai Madu teng teng hkrung rawt wa sai; Simun hpe mung shi hkum shadan dan nu ai,’ nga nna tsun nga ma la ai hpe, wa mu mu ai.

³⁵Shaloi shan gaw, lam e rai nga yang byin ai lam ni mung, muk ahkyep jaw ai hta shi re ai chye lu ai mung, tsun dan mu ai.

³⁶Shanhte dai lam jawm tsun nga ma yang, shi hkum nan shanhte a ka-ang e tsap nga nna, “Nanhte ngwipyaw nga myit ga,” ngu nna shanhte hpe tsun mu ai.

³⁷Shanhte chyawm gaw kajawng ai hte hkrit gari mat ma ai rai nna, minla mu ga ai, nga nna myit nga ma ai.

³⁸Dai rai nna shi gaw, “Nanhte hpa rai myit ung ang nga myit ta? hpa majaw nanhte kraw hta le le waw waw myit nga myit ta?

³⁹Ngai nan rai nga nngai, nye lata hte lagaw hpe yu yu mu: ngai hpe masawp yu mi; minla ngu ai gaw, ngai hpe nanhte mu ai zawn, ashan hte nrut nra rawng ai n rai,”

⁴⁰nga nna shanhte hpe tsun nhtawm, shi a lagaw lata ni shanhte hpe madun dan mu ai.

⁴¹Shanhte gaw kabu ai hte garai n kam lu ai, naw mau nga ma yang, shi gaw, “Nanhte nang e shahpa lama ma lu da mu ni?” ngu nna shanhte hpe san mu ai.

⁴²Shaloi nga kakang daw mi shanhte shi hpe jaw mu ai.

⁴³Shi gaw dai la nna, shanhte a man e sha dan nga ai.

⁴⁴Shaloi shi gaw, “Mawshe a tara hta mung, myihtoi ni a laika hta mung, Shakawn Kungdawn laika ni hta mung, ngai hpe sha-ang nna ka da mada yawng gaw dik lu na ra ai, ngu nna nanhte hte rau naw nga yang, ngai nanhte hpe tsun ni ai, nye a ga gaw, ndai rai nga ai,” ngu nna shanhte hpe tsun mu ai.

⁴⁵Shaloi Chyum laika ga ni hpe chye na lu na matu, shi shanhte a myit hpaw ya nna,

⁴⁶“Hkristu gaw nni nkri hkam nna, masum ya du ai nhtoi e si ai ni kaw na hkrung rawt wa na ra ai lam mung,

⁴⁷Yerusalem mare kaw nna, masha amyu baw shagu hpe yubak raw dat kau ya lu ai myit malai lu na lam hpe, shi a amying nsang hte hkaw tsun lu na mung, ning nga nna ka da nga ai.

⁴⁸Nanhte gaw ndai lam ni a sakse ni rai nga myit dai.

⁴⁹Yu mu, nye Wa a ga ndat nanhte a ntsa e ngai shangun dat na ring ngai: nanhte chyawm gaw, matsaw ningtsang de na n-gun atsam dagraw la lu ai nhtoi du hkra, ndai mare e naw la nga ma la,” ngu nna shanhte hpe tsun dat mu ai.

⁵⁰Dai hpang shi gaw shanhte hpe Behtani kahtawng hte tawtap du hkra woi sa wa nhtawm, shi a lata sharawt nna, shanhte hpe shaman ya mu ai.

⁵¹Shing rai shanhte hpe shaman ya nga yang, shi shanhte kaw na hka mat wa nna sumsing lamu de woi shalun la ai hkrum wu ai.

⁵²Shanhte chyawm gaw shi hpe nawku nna, nachying kabu gara let Yerusalem mare de bai wa nhtawm,

⁵³Karai Kasang hpe shakawn kungdawn let, nawku Htingnu e tutnawng e anga nga ma ai.