Read Jinghpaw Hanson Version Bible LUKA 3 Bible Online

LUKA 3 - Jinghpaw Hanson Version Bible bible

LUKA 3

¹Kehta hkawhkam Tiberu gaw hkaw dung ai shi manga ning hta, Yuda mung e Puntu Pilat gaw munggyi aya hta, Galile mung e Herod gaw du aya hta, Ituri hte Trakuni ginwang hta e shi a kanau Hpilip gaw du aya hta, Abili mung e Lusanu gaw du aya hta,

²Anna yan Kayahpa gaw hkinjawng agyi aya hta rai shajang ma ai shaloi, Karai Kasang a mungga gaw Zakari a kasha Yawhan kaw, nam mali e rai nga yang du nna,

³shi gaw Yawdan hka ginwang shara magup hkan e du hkawm let, yubak raw dat kau na matu myit malai baptisma lam hkaw tsun nga ai:

⁴dai gaw, “Nam mali kata e jahtau ai nsen gaw: Dai Madu a lam lajang da mu, Shi a lam masun ni hpe shading mu:

⁵Hkaraw hkamwam shagu kaput lu na rai nga ai, Bum hte kawng shagu hpe daw kau lu na rai nga ai; Magaw ai lam ni hpe shading lu na rai nga ai, Machyawk marawk re ai lam ni hpe shara lu na rai nga ai:

⁶Shaloi ahkrang ashan yawng gaw, Karai Kasang a hkye hkrang la ai lam mu lu na mara ai, nga nna myihtoi Esaia laika hta ka da ai ga hte maren rai wa sai.

⁷Dai majaw, Yawhan a lata hte baptisma hkam la na, pru sa ai shawa masha ni hpe shi tsun mu ai gaw: “Pu htum amyu ni e, du magang ra ai yubak ari hta na hprawng wa lu myit ga, nanhte hpe kadai shadum da myit ta?

⁸Dai majaw myit malai hte ging dan ai asi si mu! Abraham gaw anhte a wa rai nga mali ai, nga nna tinang kraw e hkum tsun myit; kaning rai nme law, nanhte hpe ngai tsun made ga, Karai Kasang gaw ndai nlung ni hta na Abraham a matu kasha hpan shapraw dat lu ai.

⁹Ya e pyi dai nwa gaw hpun pawt nhpang hkan e tawn da nga ai; dai rai nna asi kaja n si ai hpun nga manga hpe kran daw kau nna wan hta kabai bang kau nga ai,” ngu mu ai.

¹⁰Shaloi shawa masha ni, “Dai rai taw gaw, anhte kaning rai na rai ta?” nga nna shi hpe san ma ai.

¹¹Shi shanhte hpe htan mu ai gaw, “Palawng lahkawng lu ai wa gaw n lu ai wa hpe karan u ga, shat lusha lu ai wa mung dai hte maren jaw u ga,” ngu mu ai.

¹²Kang hta ai ni mung baptisma hkam la na sa nna, “Sara e, anhte kaning rai na rai ta?” nga nna shi hpe san ma ai.

¹³Shi gaw, “Nanhte hta la na shadang tawn ai made hta grau nna hkum adip la myit,” ngu nna shanhte hpe tsun mu ai.

¹⁴Hpyen masha ni mung, “Anhte wa gaw kaning rai na rai ta?” nga nna shi hpe san ma ai. Shi gaw, “Kadai hpe mung adip arip hkum rai myit: jahkrit shama sha ai mung hkum rai myit; nanhte a shabrai hte ram dum nga mu,” ngu nna shanhte hpe tsun mu ai.

¹⁵Masha ni chyawm gaw myit mada nga ma ai rai nna, Yawhan gaw Hkristu wa mi hkoi rai nga ai kun? nga nna yawng mayawng gaw tinang a kraw kata e shi a lam myit sumru shajang nga ma yang;

¹⁶Yawhan gaw, “Ngai gaw nanhte hpe hka hte baptisma jaw made ai; rai timung, ngai hta atsam grau rawng ai wa gaw sa wa ra ai; shi a kyepdin sumri raw na pyi ngai n ging nngai: shi gaw Chyoi pra ai Wenyi hta mung, wan hta mung, nanhte hpe baptisma jaw na ra ai:

¹⁷shi a lata hta shi hkuwawn lang nna, shi a mam chyarang hpe yit jasan kau nhtawm, mam gu hpe shi dum hta shinggyin bang da nna, nsan hpe gaw n sat lu ai wan hte nat kau na ra ai,” ngu nna mahkra hpe htan mu ai.

¹⁸Shing rai shi gaw shadum jahprang ai ga kaga law law hte mung, dai masha ni hpe kabu gara shiga hkaw tsun wu ai:

¹⁹rai timung Herod du gaw, shi kanau a madu jan Herodia lam hte, shi nan galaw ai n shawp ai amu kaga mahkra a gawp e daru sharin hkrum wu ai majaw,

²⁰dai mara yawng a ntsa e bai kahtap nna, Yawhan hpe htawng hta sharen da wu ai.

²¹Masha nlang baptisma hkam la ma ai shaloi, Yesu mung baptisma hkam nhtawm, akyu hpyi nga yang, lamu hpaw wa nna,

²²dai Chyoi pra ai Wenyi gaw hkrang dan dan shi a ntsa e hkrudu zawn yu hkrat wa nna, “Nang gaw nye tsawra ai Kasha rai nga ndai; nang hta ngai sharawng awng nngai law,” nga nna lamu de na nsen du pru wa ai.

²³Yesu gaw amu galaw hpang ai shaloi sumshi ning daram rai wa sai; shi gaw masha myit yu ai hte maren, Yawsep a kasha rai nga ai: Yawsep gaw Heli a kasha; Heli gaw Mahtat a kasha;

²⁴Mahtat gaw Lewi a kasha; Lewi gaw Melhki a kasha; Melhki gaw Yanna a kasha; Yanna gaw Yawsep a kasha;

²⁵Yawsep gaw Matahtia a kasha; Matahtia gaw Amu a kasha: Amu gaw Na-um a kasha; Na-um gaw Esali a kasha; Esali gaw Nagai a kasha

²⁶Nagai gaw Ma-at a kasha; Ma-at gaw Matahtia a kasha: Matahtia gaw Semai a kasha; Semai gaw Yosek a kasha; Yosek gaw Yoda a kasha;

²⁷Yoda gaw Yawhan a kasha; Yawhan gaw Resa a kasha; Resa gaw Zerubabela a kasha; Zerubabela gaw Salahtila a kasha; Salahtila gaw Neri a kasha;

²⁸Neri gaw Melhki a kasha; Melhki gaw Adi a kasha; Adi gaw Kusam a kasha; Kusam gaw Elamadam a kasha; Elamadam gaw Era a kasha;

²⁹Era gaw Yesu a kasha; Yesu gaw Elieza a kasha; Elieza gaw Yawrim a kasha; Yawrim gaw Mahtat a kasha; Mahtat gaw Lewi a kasha;

³⁰Lewi gaw Simun a kasha; Simun gaw Yuda a kasha; Yuda gaw Yawsep a kasha; Yawsep gaw, Yawnam a kasha; Yawnam gaw Eliakim a kasha;

³¹Eliakim gaw Melia a kasha; Melia gaw Mena a kasha; Mena gaw Matahta a kasha; Matahta gaw Nahtam a kasha; Nahtam gaw Dawi a kasha;

³²Dawi gaw Yese a kasha; Yese gaw Obed a kasha; Obed gaw Bua a kasha; Bua gaw Sala a kasha; Sala gaw Nasun a kasha;

³³Nasun gaw Admin a kasha; Admin gaw Arni a kasha; Arni gaw Hesrun a kasha; Hesrun gaw Hparet a kasha; Hparet gaw Yuda a kasha;

³⁴Yuda gaw Yaku a kasha; Yaku gaw Isak a kasha; Isak gaw Abraham a kasha; Abraham gaw Htera a kasha; Htera gaw Nahura a kasha;

³⁵Nahura gaw Seruk a kasha; Seruk gaw Ragu a kasha; Ragu gaw Hpelek a kasha; Hpelek gaw Ebera a kasha; Ebera gaw Sala a kasha;

³⁶Sala gaw Kainam a kasha; Kainam gaw Arhpaza a kasha; Arhpaza gaw Shem a kasha; Shem gaw Noa a kasha; Noa gaw Lamek a kasha;

³⁷Lamek gaw Mehtusala a kasha; Mehtusala gaw Enuk a kasha; Enuk gaw Yaret a kasha; Yaret gaw Mahelela a kasha; Mahelela gaw Kainan a kasha;

³⁸Kainan gaw Enu a kasha; Enu gaw Shet a kasha; Shet gaw Adam a kasha; Adam gaw Karai Kasang a kasha rai nga ai.