Read Jinghpaw Hanson Version Bible LUKA 5 Bible Online

LUKA 5 - Jinghpaw Hanson Version Bible bible

LUKA 5

¹Kalang mi na, shawa masha ni gaw Karai Kasang a mungga madat na nga, shi kaw katut bang wa ma yang, Genesaret nawng makau e shi tsap nga ai rai nna,

²nawng hkin-gau e li lahkawng sek nga ai hpe mu wu ai: nga hkan ai ni chyawm gaw li hta na pru nna, sumgawn kashin nga ma ai.

³Simun a li hta shang nhtawm, hkin-gau hte loi mi jahka na shi hpe hpyi wu ai rai nna, dai li hta dung let, dai kaw nna shawa masha ni hpe sharin shaga mu ai.

⁴Ga tsun htum jang, “Hka sung ai shara de naw sit nna, nga ja na matu nanhte a sumgawn ni hpe jahkrat mu,” ngu nna Simun hpe tsun wu ai.

⁵Simun gaw, “Madu e, mana tup anhte shakut ga timung, hpa mung n lu gaw ai, rai timung na a ga majaw, ngai sumgawn jahkrat na we ai,” ngu nna htan wu ai.

⁶Shing rai jahkrat jang, shanhte gaw nga wunawng kaba magawn hkrup lu ma ai; shanhte a sumgawn ni mung je wa malu ai rai nna,

⁷li kaga hta nga ai manang ni hpe sa karum la na, dingsi shaga mu ai. Shanhte mung sa ma ai rai nna, dai li lahkawng yan lupwa magang hkra, bang jahpring mu ai.

⁸Simun Petru gaw dai mu jang, Yesu a lahput nhpang e dingnyawm nna, “Madu e, ngai kaw na wa mat u; ngai gaw yubak kap ai masha rai nga nngai,” ngu wu ai.

⁹Kaning rai nme law, shing rai nga magawn la lu ai majaw, shi mung, shi kaw hkan nang ai ni nlang hte mung, mau mahka mat ma ai;

¹⁰Simun a manang Zebedi a kasha Yaku yan Yawhan mung dai zawn mau mat ma ai. Shaloi Yesu gaw, Simun hpe, “Hkum hkrit et; ya kaw nna nang masha hpe hkan hkwi na rin dai,” ngu wu ai.

¹¹Li yan hpe danam e sek tawn da nhtawm, shanhte gaw arai mahkra kau da nna, shi kaw hkan nang ma ai.

¹²Lang mi na mare langai mi hta shi nga nga yang, yu mu, hkum ting manggang kap ai masha langai mi nga ai: dai wa gaw Yesu hpe mu jang, dingnyawm dagup nna, “Madu e, nang hkraw n-yang gaw, ngai hpe shapra ya lu na rai nga ndai,” ngu nna hpyi nem wu ai.

¹³Yesu gaw lata ladawn nna shi hpe ahtawk let, “Ngai hkraw nga nngai, san pra wa nu,” ngu wu ai. Shaloi jang dai manggang shi kaw na pru mat wa ai.

¹⁴“Dai lam kadai hpe mung n tsun dan ai sha, Nang pru wa nna hkinjawng wa hpe na hkum madun dan nhtawm, shanhte a matu sakse tai u ga, nang san pra ai a matu Mawshe tawn da ai hte maren, hkungga wa nawng ya u,” ngu nna shi hpe ginhtim dat wu ai.

¹⁵Rai timung, shi a shiga gaw grau nna kajai gumhkawng pri rai wa ai hte, shawa masha wunawng wuwa gaw, ga madat na matu mung, Shanhte a machyi makaw mai na matu mung, sa hpawng ma ai.

¹⁶shi chyawm gaw nam mali de lagyim sa mat nna akyu hpyi nga ai.

¹⁷Lani mi hta shi sharin shaga nga yang, Galile mung, Yuda mung, kahtawng shagu hkan na hte, Yerusalem mare de na Hparishe hte tara sara ni sa du dung nga ma ai: machyi shamai na matu mung dai Madu a atsam gaw shi a ntsa e nga nga ai.

¹⁸Shaloi, yu mu, masha ni gaw hkum katsing si ai wa langai mi hpe panep hta hpai sa nna, dai wa hpe shi a man e shawn tawn lu hkra jashawn lu na lam tam ma ai.

¹⁹Masha wunawng chyat nga ai majaw, dai wa hpe gara hku n jashawn lu mu jang, dai nta ntsa de shanhte lung nna, galup ai wut waw kau nhtawm, dai wa hpe panep hte nawng, shawa hpawng ka-ang Yesu a man e, yawn jahkrat dat mu ai.

²⁰Shanhte a kamsham ai myit mu jang, shi gaw, “Masha wa e, na a yubak dat kau ya sade ai,” ngu wu ai.

²¹Shaloi laika ka ai sara ni hte Hparishe ni gaw, “Ning nga shatan nhkan tsun ai wa gaw, kadai wa rai ta? Karai Kasang sha n rai yang yubak dat kau ya lu ai gaw kadai wa rai nga a ta?” nga nna myit aru yu nga ma ai.

²²Shanhte a myit aru yu ai hpe Yesu chye wu ai majaw, “Nanhte hpa rai kraw kata e myit aru yu nga myit ta?

²³Na yubak dat kau ya sade ai, ngu ai hte, Rawt hkawm wa u, ngu ai ga yan hta, gara mahtang grau tsun loi a ta?

²⁴Rai timung, Masha Kasha gaw ga ntsa e yubak dat kau ya ai ahkang aya lu ai gaw nanhte chye nga myit ga, dai hkum katsing si ai wa hpe, Nang hpe ngai tsun de ga, ‘Rawt u, na a yup ra la nna, nta de wa nu,” ngu nna shanhte hpe htan wu ai.

²⁵Shaloi jang shanhte a man e shi rawt nna, shi a yup ra hpai la nhtawm, Karai Kasang hpe shakawn kungdawn let, shi a nta de wa mat ai.

²⁶Nlang hte gaw grai wa mau mahka nga ma ai rai nna, Karai Kasang hpe shakawn kungdawn nga ma ai; nachying hkrit la ai hte mung, “Dai ni anhte mauhpa amu mu saga ai,” nga nna tsun ma ai.

²⁷Dai hpang shi pru sa wa nna, Lewi ngu ai kang hta ai wa langai mi, kang sum hta dung nga ai hpe mu wu ai rai nna, dai wa hpe, “Ngai kaw hkan rit,” ngu wu ai.

²⁸Shi gaw arai yawng mayawng kau da nhtawm, rawt nna shi kaw hkan nang nga ai.

²⁹Shaloi Lewi gaw shi a nta e Yesu a matu poi kaba galaw nna, kang hta ai ni hte masha kaga law law wa, shanhte hte rau sha dung nga ma ai.

³⁰Dai rai nna Hparishe ni hte shanhte a laika ka ai sara ni gaw, shi a sape ni a lam wu wu di di nga nna, “Nanhte hpa rai kang hta ai ni hte yubak kap ai ni rau lu sha nga myit ta?” nga nna tsun ma ai.

³¹Yesu gaw, “Hkam kaja ai ni tsi sara n ra ma ai, machyi ai ni sha ra ma ai:

³²dinghpring ai ni hpe myit malai lu hkra shaga na, ngai sa du ai n rai, yubak kap ai ni hpe shaga na she, sa du nngai,” ngu nna shanhte hpe htan mu ai.

³³Bai shanhte gaw, Yawhan a sape ni lusha gam gam rai ma ai hte akyu hpyi let nga ma ai: Hparishe ni a sape ni mung shing rai nga ma ai: na a sape ni mahtang gaw alu asha nga ma ai, ngu nna shi hpe tsun mu ai.

³⁴Yesu gaw, “La nnan wa gaw hkungran ai gawk hte seng ai ma ni hte rau naw nga yang, nanhte shanhte hpe lusha gam shangun lu myit ni?

³⁵Rai timung, la nnan wa hpe shanhte kaw na jahka la ya ai nhtoi du na ra ai rai nna, dai nhtoi hte hta shanhte lusha gam na mara ai,” ngu nna shanhte hpe tsun mu ai.

³⁶Ga shadawn hte mung shi shanhte hpe tsun mu ai gaw, “Palawng nnan hta na achyen gang je la nna, palawng dingsa hta kadai n kapa ga ai; shing di yang, palawng nnan hpe gang je kau nna palawng dingsa mung nnan hta na achyen hte n pre na ra ai.

³⁷Tsabyi nnan hpe mung shanhpyi ndum dingsa hta kadai n bang ga ma ai; shing di yang, tsabyi nnan gaw ndum ni hpe kapaw je kau nna, tsabyi mung yun mat ai hte ndum ni mung hten mat wa ai.

³⁸Tsabyi nnan hpe shanhpyi ndum nnan hta bang na rai nga ai.

³⁹[Tsabyi ningsa lu sai wa gaw nnan n ra nu ai; ningsa she kaja nga ai, nga nna tsun ai]” ngu mu ai.