Read Jinghpaw Hanson Version Bible LUKA 6 Bible Online

LUKA 6 - Jinghpaw Hanson Version Bible bible

LUKA 6

¹Laban nhtoi langai mi hta hkaibang yi hku ga hkawm wa yang, shi a sape ni gaw mam nsi di la nna, lata hte manai kayup baw sha ma ai.

²Dai rai nna, Hparishe nkau mi gaw, “Laban nhtoi e n mai di ai lam, hpa rai nanhte galaw myit ta?” nga ma ai.

³Yesu shanhte hpe, “Dawi gaw, shi kaw hkan nang ai ni hte rau, kawsi hkrum ma yang,

⁴Karai Kasang a nta de shang nna, hkinjawng ni hta kaga, kadai n mai sha ai madun da ai muk ni hpe la sha nna, shi kaw hkan nang ai ni hpe mung jaw sha wu ai lam hpe pyi, nanhte n hti yu myit ni?” ngu nna htan mu ai.

⁵Bai shi gaw, “Masha Kasha gaw laban nhtoi a Madu rai nga ai,” ngu nna shanhte hpe tsun mu ai.

⁶Laban nhtoi kaga hta mung tara jawng hta shi shang nna sharin shaga nga ai: dai yang e hkra lata katsing si ai masha langai mi nga ai.

⁷Dai rai nna, laika ka ai sara ni hte Hparishe ni gaw, shi hta mara shagun lu hkra, “Laban nhtoi hta shamai ya na ra ai kun?” nga nna shi hpe gyam yu ma ai:

⁸Shi chyawm gaw shanhte a myit hpe chye ya wu ai rai nna, lata katsing si ai wa hpe, “Rawt nna ka-ang e tsap u,” ngu wu ai: dai wa mung rawt nna tsap nga ai.

⁹Shaloi Yesu gaw, “Ngai nanhte hpe san yu made ga, Laban nhtoi hta e kaja ai amu galaw na, n kaja ai amu galaw na; masha asak hkye la na, shing n rai jahten na, gara mahtang mai galaw na a kun?” ngu nna shanhte hpe tsun mu ai.

¹⁰Shanhte mahkra hpe grup yin yu nna, dai wa hpe, “Na a lata ladawn u,” ngu wu ai; shi mung ladawn nna shi a lata gaw mai mat lu ai.

¹¹Shanhte chyawm gaw myi di lahpang pawt bu nna, “Yesu hpe kaning di na rai nga a ta?” nga nna shada da tsun ginrawn ma ai.

¹²Dai nhtoi hte hta mung shi gaw akyu hpyi na nga, dai bum de pru sa wa nna, shana tup Karai Kasang hpe akyu hpyi let nga nga ai.

¹³Nhtoi htoi jang shi a sape ni hpe shi shaga la nna, shanhte hta na marai shi lahkawng hpe lata la nhtawm, shanhte hpe kasa ni ngu nna shamying da mu ai:

¹⁴dai ni gaw, Petru ngu nna shi e shamying ai Simun hte shi a kanau Andre; Yaku yan Yawhan; Hpilip yan Barhtolume;

¹⁵Mahte yan Htawma; Alhpe a kasha Yaku yan Zelutu ngu ai Simun;

¹⁶Yaku a kasha Yuda hte, ap kau na wa tai ai Yuda Iskarut hte rai ma ai.

¹⁷Shanhte hte rau yu wa nna layang e tsap nga yang, shi a sape hpung kaba mung, Yuda mung ting hte Yerusalem mare na mung, nammukdara makau na Turu hte Sidun kaw na mung, masha wunawng wuwa kaba gaw shi a ga madat la na hte tinang a machyi makaw shamai la na matu, rau hpawng nga ma ai:

¹⁸n seng ai nat ni a sharu shatsang hkrum ai ni mung mai mat ma ai.

¹⁹Shawa masha ni nlang shi hpe ahtawk na tam ma ai: kaning rai nme law, shi hkum na atsam pru nna mahkra hpe shamai nga ai.

²⁰Shaloi shi a sape ni hpe shi mada yu nna tsun mu ai gaw: “Nanhte matsan mayan ni a lu myit dai: kaning rai nme law, Karai Kasang a mungdan gaw, nanhte a mungdan rai nga malit dai.

²¹Ya kawsi nga ai ni, nanhte a lu myit dai: kaning rai nme law, nanhte hkru kat lu na marin dai. Ya hkrap nga ai ni, nanhte a lu myit dai: kaning rai nme law, nanhte mani na marin dai.

²²Masha ni gaw nanhte hpe n dawng n yawt ai hte, dai Masha Kasha a majaw shadaw jahka di kau nna, asawng asang di ai hte nanhte a mying hpe n hpru n mai ai arai hpe zawn shaden kau ai hkrum myit yang, nanhte a lu myit dai.

²³Dai nhtoi hta e kabu gumlawt nga mu; kaning rai nme law, yu mu, nanhte a shabrai gaw sumsing lamu hta e kaba nga malit dai: shanhte a kaji kawa ni mung dai zawn myihtoi ni hpe di yu manu ai.

²⁴“Rai timung, sut su ai ni nanhte dingnye lu myit dai: kaning rai nme law, nanhte gaw tinang a shalan shabran ai lu la manit dai.

²⁵Ya hkru kat nga ai ni nanhte dingnye lu myit dai: kaning rai nme law, nanhte gaw kawsi ai hkrum na marin dai. Ya mani nga ai ni nanhte dingnye lu myit dai: kaning rai nme law, nanhte gaw sharung shayawt ai hte hkrap ngu hkrap ngoi ai hkrum na marin dai.

²⁶Masha yawng mayawng nanhte hpe kaja ai ngu myit yang, nanhte dingnye lu myit dai: kaning rai nme law, shanhte a kaji kawa ni mung dai zawn myihtoi masu ni hpe ngu yu manu ai.

²⁷Dai hta kaga, madat la ai ni nanhte hpe ngai tsun made ga, Nanhte a hpyen ni hpe tsawra mu; nanhte hpe n dawng n yawt ai ni e kaja ai hku galaw mu;

²⁸nanhte e dagam ai ni hpe shaman ya mu; nanhte hpe aroi arip di ai ni a matu akyu hpyi mu.

²⁹Na a shabyi maga mi bye ai wa hpe, maga mi naw ja ya u; na a palawng galu la kau ya ai wa hpe, na a lawnghkoi mung hkum ndang u.

³⁰Nang kaw hpyi ai wa kadai hpe mung jaw u; na a arung arai la kau ya ai wa kaw bai hkum hpyi nit.

³¹Masha ni nanhte hpe hkan galaw na, nanhte tsaw myit dai hte maren, nanhte mung dai zawn shanhte hpe hkan galaw mu.

³²Nanhte e tsawra ai ni hpe sha tsawra myit yang gaw, nanhte a matu hpa akyu nga a ta? yubak kap ai ni mung tinang e tsawra ai ni hpe gaw tsawra ma ai.

³³Nanhte e kaja ai hku galaw ai ni hpe sha, kaja ai hku galaw htang myit yang gaw, nanhte a matu hpa akyu nga a ta? yubak kap ai ni mung dai zawn galaw ma ai.

³⁴Bai htang lu na zawn nawn ai ni hpe sha hkoi shap ya myit yang gaw, nanhte a matu hpa akyu nga a ta? Yubak kap ai ni pyi, hkoi ya ai made bai lu la hkra yubak kap ai ni hpe hkoi shap ya ma ai.

³⁵Dai rai nna nanhte gaw, nanhte a hpyen ni hpe tsawra mu; shanhte hpe kaja ai hku galaw mu; myit hpa mung n ru ai sha hkoi shap ya mu; shing rai jang, nanhte a shabrai kaba wa na hte, Tsaw htum ai wa a kasha ni mung nanhte tai na marin dai: kaning rai nme law, shi gaw chyeju malap kau ai ni hte, n hkru n hkra re ai ni hpe malawm magawm di mu ai.

³⁶Nanhte a Kawa matsan dum chye ai hte maren, nanhte mung matsan chye dum mu.

³⁷N jeyang ai nga mu; shing rai jang, nanhte jeyang ai n hkrum na myit dai: n dawdan ai nga mu; shing rai jang, nanhte dawdan ai n hkrum na myit dai: mara dat kau mu; shing rai jang, nanhte dat kau ai hkrum na myit dai.

³⁸Jaw mu, shing rai jang, nanhte hpe jaw na marin dai: hpring kabrat hkra anin garin, man ai dang hte nanhte a lahpyen e shanhte jaw na mara ai: kaning rai nme law, nanhte hteng ya ai dang hte, nanhte hpe bai hteng ya na marin dai.

³⁹Dai hta kaga, ga shadawn mung shi shanhte hpe tsun mu ai gaw, Myi kyaw ai wa gaw myi kyaw ai wa hpe lam woi madun lu a ni? shan lahkawng nhkun hta hkrat na ma ai, n rai ni?

⁴⁰Sape gaw sara hta grau ai n rai: hkum hkra sharin la sai wa kadai mung, tinang a sara zawn rai na ra ai.

⁴¹Tinang myi hta rawng ai hpuntawng hpe n myit yu ai mi, na a nhpu nnau a myi hta rawng ai nbun hpe, hpa rai yu nga n ta?

⁴²Tinang myi hta rawng ai hpuntawng hpe pyi, n mu ai wa mi, ‘Hpunau wa e, na myi hta rawng ai nbun hpe ngai naw lai kau ya de ga,’ nga nna nhpu nnau wa hpe kaning rai tsun lu n ta? Sawt ai wa e, na a myi hta na hpuntawng hpe shawng lai kau u; dai hpang, na nhpu nnau wa a myi hta rawng ai nbun hpe lai kau ya na, nang asan sha mu na rin dai.

⁴³Kaning rai nme law, n kaja ai asi si ai hpun kaja gaw, kanang mung n nga ai; kaja ai asi si ai hpundaw mung, kanang n nga ai; dai rai nna hpun shagu hpe tinang a asi hta chye ginhka lu nga ai.

⁴⁴Kaning rai nme law, ju hpun hta na maihpang si kadai n di la yu ai; ju singwum hta na mung tsabyi si kadai n di la yu ai.

⁴⁵Kaja ai wa gaw, tinang kraw lawang a kaja ai sutdek hta na, kaja ai rai shapraw dan ai; n kaja ai wa mung n kaja ai sutdek hta na, n kaja ai rai shapraw dan ai: kaning rai nme law, kraw hta hpring chyat nga ai kaw na, shi a n-gup de tsun pru nga ai.

⁴⁶Ngai tsun ai hte maren n hkan galaw myit dai mi, hpa rai nanhte ngai hpe, ‘Madu e, Madu e,’ nga myit ta?

⁴⁷Ngai hpang de sa nhtawm, nye ga madat la nna hkan galaw ai wa kadai mung, kaning re ai wa hte bung ai gaw ngai nanhte hpe madun made ga:

⁴⁸dai wa gaw, wahpang gaw yang, sung sung htu nna lunghkrung ntsa e npawt gaw ai wa hte bung nga ai: hka rawt hka tung wa yang, hka hpungla ni dai nta hpe ahtu adawt rai timung, ngang ngang kang kang gaw da sai majaw, dai hpe n shamawt lu ai.

⁴⁹Ga na la nna n hkan galaw ai wa chyawm gaw, npawt n gaw ai sha, gaman hta wahpang gaw ai wa hte bung nga ai: hka hpungla ni dai nta hpe ahtu adawt nna, shaloi jang kadawng daw mat ai; dai nta a hten run ai gaw kaba la nga ai.