Read Jinghpaw Hanson Version Bible LUKA 7 Bible Online

LUKA 7 - Jinghpaw Hanson Version Bible bible

LUKA 7

¹Shi gaw shawa masha ni hpe shi a ga mahkra tsun htum jang, Kaperna-um mare de shang wa ai.

²Dai shaloi hpyen du langai mi a tsawra ai shangun ma gaw machyi nna, si wa magang nga lu ai.

³Yesu a lam na jang, shi Yuda agyi salang ni hpe shangun dat nna, shi a shangun ma hpe sa shamai ya na, Yesu hpe hpyi dat wu ai.

⁴Dai ni gaw Yesu kaw du ma yang, Nang shi hpe ndai lam galaw ya na, ging dan ai wa shi rai nga ai;

⁵anhte a amyu hpe shi tsawra ai hte, anhte a matu tara jawng mung shi hkum nan gap ya ma ni ai, nga nna akroi anoi shi hpe hpyi ma ai.

⁶Dai rai nna Yesu gaw shanhte hte rau sa wa ai. Shi dai nta hte gade n tsan kaw du jang, hpyen du wa gaw shi a jinghku ni hpe shangun dat nna, Madu e, na hkum hpe hkum shatsang et; nye nta a magaw npu e nang sa shang na gaw, ngai n ging n dan nngai:

⁷dai majaw ngai mung nang kaw sa na ging dan nngai, ngu nna n myit nngai: rai timung, na ga hkaw mi tsun dat rit, shaloi nye ma mai na ra ai.

⁸Kaning rai nme law, ngai mung du a lawu e dang da ai masha rai nngai: nye a lawu de mung hpyen masha nga ma ai rai nna, langai wa hpe, Sa u, ngu yang, shi sa wa ai; kaga wa hpe, Wa rit, ngu yang, shi wa ai: nye mayam wa hpe mung, Ndai galaw u, ngu yang, shi galaw nga ai, ngu nna tsun shangun dat wu ai.

⁹Yesu gaw dai ga na jang, dai wa a lam hpe mau nna, shi kaw hkan nang ai shawa masha ni hpe kayin yu let, Nanhte hpe ngai tsun made ga, Israela amyu hta pyi, ndai hte wa kamsham ai gaw ngai n mu hkrup nngai, ngu mu ai.

¹⁰Shangun dat ai ni nta de bai du wa ma yang, dai machyi ai shangun ma gaw a kaja sha rai nga la ai hpe, wa mu ma ai.

¹¹Dai hpang gade n na yang, Na-in ngu ai mare de shi sa wa ai rai nna, shi a sape ni hte shawa hpung kaba mung, shi hte rau hkan sa ma ai.

¹²Dai mare chyinghka de du magang yang, yu mu, si mat sai masha langai mi a moi mang hpe hpai kau sa wa nga ma ai; si ai wa gaw kanu a kasha shingtai rai nga ai; kanu mung gaida rai nga ai; mare masha law law mung dai num hte rau hkan sa nang ma ai.

¹³Madu gaw dai numsha hpe mu jang, shi hpe matsan yu dum nna, Hkum hkrap et, shi hpe ngu wu ai.

¹⁴Ani sha shi sit sa nna dai da-u hpe ahtawk wu ai; hpai ai ni mung tsap ya nga ma ai: shaloi shi gaw, Shabrang e, ngai nang hpe tsun de ai, rawt u, ngu wu ai.

¹⁵Si ai wa mung rawt dung nna ga tsun nga ai. dai Madu gaw shi hpe kanu e ap ya wu ai.

¹⁶Masha nlang hte mung hkrit mau mat shajang ma ai rai nna, Karai Kasang hpe shagrau sha-a let, Myihtoi kaba anhte kaw paw pru ra ai, nga nna mung, Karai Kasang gaw shi a amyu hpe kawan katsan yu nga ai, nga nna mung, tsun gara wa ma ai.

¹⁷Dai rai nna shi lam a shiga gaw, Yuda mung ting hte grup yin shara shagu hkan e kajai gumhkawng mat wa ai.

¹⁸Shaloi Yawhan a sape ni gaw dai lam yawng mayawng Yawhan hpe wa tsun dan mu ai.

¹⁹Dai rai nna Yawhan gaw shi a sape lahkawng shaga la nhtawm, dai Madu hpang de shangun dat nna, Nang gaw dai du sa na ra ai wa rai nga n ni? shing n rai, kaga hpe anhte naw myit mada lu na rai nga a ni? ngu nna san dat wu ai.

²⁰Dai yan gaw Yesu kaw du jang, Nang gaw dai du sa na wa rai nga n ni? shing n rai, kaga hpe anhte naw myit mada lu na rai nga a ni? nga nna Baptisma Sara Yawhan gaw, nang hpang de an hpe san shangun dat mi ai, ngu mu ai.

²¹Dai ahkying e nan shi gaw masha law law hpe machyi makaw, ana ahkya hte n hkru ai nat hta na shamai kau ya mu ai: myi kyaw ai masha law law hpe mung, myi bai mu ai chyeju jaw mu ai.

²²Shaloi htan let shi shan hpe, Na mana mu mamu hte maren Yawhan hpe wa tsun dan mu: myi kyaw ai ni myi mu lu ma ai, lagaw hten ai ni hkawm sa lu ma ai, manggang kap ai ni san pra wa lu ma ai, na lahpang ai ni na lu ma ai, si mat ai ni sharawt la ai hkrum ma ai, matsan mayan ni a matu kabu gara shiga hkaw dan nga ai:

²³ngai hta myit kataw ai lam n mu ai wa kadai mung a lu nga ai, ngu nna tsun mu ai.

²⁴Yawhan a kasa yan wa mat ai hpang, shi Yawhan a lam hpe lakap nna shawa masha ni hpe tsun hpang mu ai gaw, Dai nam de hpa hpe hpu yu na nanhte sa myit ta? nbung e kanga ai mai-aw hpe rai ni?

²⁵Shing n rai, hpa yu na sa myit ta? mani ai hpun palawng bu hpun ai wa hpe rai ni? yu mu, tsawm htap ai hpun palawng bu hpun nna nhpaw n-ya rai nga lu ai ni gaw, hkawhkam a htingnu ni hta nga ma ai.

²⁶Dai hpe n rai taw, hpa yu na sa myit ta? myihtoi hpe rai ni? Rai nga ai; ngai nanhte hpe tsun made ai gaw, myihtoi hta grau kaba ai wa shi rai nga ai.

²⁷Yu u, na a man e na a lam lajang magang na, Nye a kasa hpe na a shawng de ngai shangun dat we ai, nga nna ka da ai ga gaw shi a lam rai nga lu ai.

²⁸Nanhte hpe ngai tsun made ga, Numsha kaw na shangai ai ni hta, Yawhan hta grau kaba ai langai mi muk n nga ai: rai timung Karai Kasang a mungdan hta kaji ai wa gaw shi hta grau kaba nga ai.

²⁹Mung masha ni nlang hte hte kang hta ai ni gaw, Yawhan a ga na la jang, shi jaw ai baptisma sa hkam la ma ai hta, Karai Kasang a dingman ai lam shagrau ma ai.

³⁰Hparishe ni hte tara sara ni chyawm gaw, Shi jaw ai baptisma n hkam la ma ai hta, Karai Kasang a maw mawn ai hku hpe, tinang a matu ran kau ma ai.

³¹Dai re ai majaw, ndai amyu masha ni hpe ngai hpa hte shadawn na mawe ta? shanhte hpa hte bung ma ta?

³²Shanhte gaw, Nanhte a matu anhte sumpyi dum ga timung, nanhte n ka myit dai, Anhte sharung shayawt timung, nanhte n hkrap myit dai, nga nna gat hkan e dung let, shada da gintan hkat ai ma ni hte bung ma ai.

³³Kaning rai nme law, Baptisma Sara Yawhan sa du nna, muk n sha tsabyi n lu ai nga yang mung, Shi nat kap ai wa rai nga ai, nanhte nga myit dai.

³⁴Dai Masha Kasha sa du nna, lu nga sha nga rai nga yang mung, Ndai sha marim ai wa hte tsabyi lu shalai ai wa, kang hta ai ni hte yubak kap ai ni a jinghku wa hpe, yu mu, bai nga myit dai.

³⁵Hpaji byeng-ya chyawm gaw, shi a kasha nlang hte hta awlaw ai lu la nu ai.

³⁶Hparishe langai mi gaw, shi kaw shat sha na Yesu hpe shaga wu ai. Dai rai nna, dai Hparishe a nta de shi shang nhtawm, sha na dung nga ai.

³⁷Shaloi, yu mu, dai mare na yubak kap ai numsha langai mi nga ai rai nna, Yesu gaw dai Hparishe a nta e dung nga ai hpe shi chye wu yang mura lunghpraw gawm la sa nhtawm,

³⁸shingdu maga Yesu a lagaw nhpang e hkrap tsap nga let shi a lagaw hpe myi prwi hte madit ya wu ai rai nna, shi a kara hte katsut kau ya wu ai: shi a lagaw hpe mung shi pup nna, mura hte chya ya wu ai.

³⁹Yesu hpe shaga ai Hparishe wa dai mu jang, Ndai wa dai myihtoi rai yang gaw, shi hpe hkra ai numsha gaw, kadai hte kaning re ai numsha re ai mung, yubak kap ai jan rai nga ai mung, shi chye na wu ai, nga nna shi a kraw e myit nga ai.

⁴⁰Yesu gaw htan let, Simun e, ngai nang hpe tsun shara lama mi nga ai, ngu wu ai. Simun gaw, Sara e, tsun e, ngu wu ai.

⁴¹Shaloi Yesu gaw, Gumhpraw hkoi ya ai wa langai mi kaw, hka kap ai masha lahkawng nga ai: langai wa mi hta lap manga tsa, langai wa mi hta manga shi kap ai.

⁴²Dai yan gaw hka wa na n lu ma ai majaw, hka madu gaw shan lahkawng hpe shalawt dat mu ai. Shing re ai majaw, dai yan hta kadai wa mahtang shi hpe grau tsaw na ma ta? ngu wu ai.

⁴³Simun gaw, Grau law shalawt kau ya ai wa rai na re ai, ngai nawn nngai, ngu nna htan wu ai. Yesu gaw, Nang hparan ai hku rai nga ai, ngu wu ai.

⁴⁴Shaloi dai numsha hpang de shi kayin nna, Simun hpe, Ndai numsha hpe nang mu da wu ni? Ngai na a nta de shang tim’ lagaw shin na ntsin nang n jaw ndai: shi chyawm gaw myi prwi hte nye a lagaw madit ya nna, shi a kara hte katsut kau ya ni ai.

⁴⁵Nang ngai hpe n pup ndai: shi chyawm gaw, ngai nhku de shang kaw nna, nye a lagaw hpe pup n sim nga ai.

⁴⁶Nye baw hpe namman n chya ya ndai: shi chyawm gaw nye a lagaw hpe, mura chya ya ni ai.

⁴⁷Dai lam a majaw ngai nang hpe tsun de ga, Dai numsha gaw law wa tsawra ai majaw, shi a law la ai yubak raw dat kau ya ai lu la nu ai: loi mi sha raw dat hkrum ai wa chyawm gaw loi mi sha tsawra nga ai, ngu nna tsun wu ai.

⁴⁸Dai numsha hpe mung, Na a yubak raw dat kau ya sade ai, ngu nna tsun wu ai.

⁴⁹Rau dung nga ai ni gaw, Yubak nan raw dat kau ya lu ai, ndai wa gaw, kadai wa rai ta? nga nna myit shajang ma ai.

⁵⁰Shi gaw, Na a kamsham ai gaw nang hpe hkye la nit dai; a pyaw sha wa nu, ngu nna dai numsha hpe tsun dat wu ai.