Read Jinghpaw Hanson Version Bible LUKA 8 Bible Online

LUKA 8 - Jinghpaw Hanson Version Bible bible

LUKA 8

¹Dai hpang gade n na yang, shi gaw Karai Kasang a mungdan lam hkaw dan ai hte, kabu gara shiga tsun shana ya let, mare mi kaw nna mare mi, kahtawng mi kaw nna kahtawng mi de, du hkawm sa wa ai: sape shi lahkawng hte mung shi hte rau rai nga ma ai;

²n hkru ai nat hte machyi makaw hta na shamai la ai numsha nkau mi mung, nat sanit pru mat ai Magdala ngu ai Mari,

³Herod a kunhting wa Kuhta a madu jan Yawhana, Susanna hte kaga law law wa, tinang a lu su ai hte shanhte hpe galaw daw let, hkan nang ma ai.

⁴Shawa hpawng kaba zuphpawng wa nna, mare shagu na ni shi kaw sa du ma yang, ga shadawn hte shi tsun wu ai gaw,

⁵Nli gat ai wa gaw shi a nli gat na pru sa wa ai; gat dat wu yang, nkau mi gaw lam makau e hkrat nna, masha e kabye kau ai hte, ntsa malen na u ni hta sha kau ma ai.

⁶Nkau mi gaw nlung ntsa e hkrat nna, tu pru wa yang, ga n madi nga ai majaw, nyip si mat ma ai.

⁷Nkau mi gaw ju hpun ka-ang e hkrat nna, ju hpun ni dai hte rau tu kaba wa ai hte, dai hpe lim kau mu ai.

⁸Nkau mi gaw ga kaja hta hkrat ai rai nna, tu kaba wa jang, htam latsa si mayat wa ai, ngu wu ai: shi shing nga tsun ai ninglen, Na la na, na tu ai wa gaw, na la u ga, nga nna jahtau wu ai.

⁹Shaloi shi a sape ni, ga shadawn ndai gaw hpa nga ai re ai kun? nga nna shi hpe san mu ai.

¹⁰Shi gaw, Karai Kasang a mungdan a sung htum ai lam ni hpe chye na na ahkang nanhte a matu hku nga malit dai: masha gale ni chyawm gaw, yu layu e n mu mu ga, na lana n chye na mu ga, ga shadawn hku hte tsun nme ai.

¹¹Ya na ga shadawn gaw ndai hku rai nga ai: Nli gaw Karai Kasang a mungga rai nga ai.

¹²Lam makau e nga ai ni gaw, dai mungga na la ai hpang, kamsham ai hte hkye la ai kaw n du lu mu ga, dai mungga hpe shanhte a kraw lawang na Nat e sa shaw la kau ya hkrum ai ni rai ma ai.

¹³Nlung hta nga ai ni gaw, dai mungga hpe na jang, kabu gara ai myit hte hta la ai rai timung, ru n jung ma ai majaw, tawng marang mi sha kamsham nhtawm, gunglau hkrum ai nhtoi hta e bai htak mat wa ai ni rai ma ai.

¹⁴Ju hpun hta hkrat ai nli gaw, mungga na la nna, tinang lam hkan nga yang, ndai prat a myit ru myit tsang ai, sut lu sut su ai, pyaw daw tam ai lam ni hta lim mat nna, ja kat ai asi n si ai ni rai ma ai.

¹⁵Ga kaja hta hkrat ai nli chyawm gaw, dai mungga hpe kangka rai nna kaja ai myit hte madat la ngut jang, lashum lanoi rai nna hkam sharang ai myit hte asi si ai ni rai ma ai.

¹⁶Pyengdin shatu nhtawm, di hte ka-up da ai mung, yup ku npu e tawn da ai mung, kadai n rai ga ai: shang sa ai ni de a htoi san ai mu lu hkra, pyengdin shadun hta shadun da ga ma ai:

¹⁷kaning rai nme law, n dan n pru lu na makoi da ai arai hpa mung n nga ai; makoi magap da ai arai hpa mung, n chye lu na hte n dan n leng wa lu na, n nga ai.

¹⁸Dai re ai majaw, nanhte kaning rai na la myit dai hpe sadi nga mu: kaning rai nme law, lu ai wa kadai hpe mung, naw jat jaw na ra ai; n lu ai wa kaw na chyawm gaw, shi lu dum ai hpe pyi, naw shaw la ya na ra ai, ngu wu ai.

¹⁹Dai shaloi shi a kanu hte kanau ni shi kaw du sa ma ai rai nna, shawa hpawng chyat nga ai majaw, shi hpang de n sit shang lu ma ai.

²⁰Shaloi shi hpe, Na nnu hte nnau ni nang hpe hkrum mayu nna, shinggan e tsap nga ma ai, ngu nna tsun ya mu ai.

²¹Shi gaw shanhte hpe, Karai Kasang a mungga madat la nna hkan galaw ai ni gaw, ngai nu, ngai nau ni rai nga ma ai, ngu nna htan mu ai.

²²Dai tawng na lani mi hta, shi gaw shi a sape ni hte rau li de shang nna, Anhte nawng wora hkran de rap sa wa saga, ngu nna shanhte hpe tsun mu ai: shaloi shanhte rap sa wa ma ai.

²³Shing rai rap sa wa nga yang, shi gaw yup mu nga ai. Shaloi dai nawng hta nbung laru ru hkrat wa nna, li hta hka hpring wa ai majaw, shanhte lup si magang wa nga ma ai.

²⁴Dai rai nna shanhte sit sa nna, Madu e, madu e, anhte mat mat wa nga ga ai, ngu nna shi hpe jasu mu ai. Shaloi shi rawt nna, nbung hte hka leng ni hpe daru kau wu ai: dai ni mung sim mat wa nna, atsin sim rai nga ai.

²⁵Dai rai nna shi gaw, Nanhte a kamsham ai gaw kanang rai malit ta? ngu nna shanhte hpe tsun mu ai. Shanhte chyawm gaw hkrit gari ai hte mau mahka mat nna, Ndai wa gaw kadai wa re ai i? nbung hte hka hpe pyi, shi mungga dat nna, dai ni madat nga ma hka? nga nna shada da tsun shajang ma ai.

²⁶Shaloi shanhte gaw Galile mung hte tawtap re ai, Gerase mung de sa du ma ai.

²⁷Shi hkarang de pru lung wa yang, dai mare na nat kap ai wa langai mi shi hpe sa tau wu ai: dai wa gaw aten na na wa hpun palawng n bu hpun ai hte, nta e mung n nga ai sha, lupwa hkan e nga nga ai.

²⁸Dai wa gaw Yesu hpe mu jang, jahtau nna shi a man e dingnyawm dagup let, Tsaw htum ai Karai Kasang a Kasha Yesu e, ngai nang hte hpa daw nga ga ta? nang ngai hpe n zingri n ga, ngai nang hpe hpyi nga nngai, ngu nna nsen kaba hte tsun wu ai.

²⁹Kaning rai nme law, dai wa kaw na pru wa na, dai n seng ai nat hpe shi daru da nu ai. Dai nat gaw dai wa hta law law lang shung ai majaw, shi hpe sharen da ai hte, hpri sumri hte hkang hkyihkyang e gyit hkang shadang rai timung, dai sumri ni hpe gang dut kau nhtawm, nat gaw dai wa hpe nam mali de shapoi la la a rai nga ai.

³⁰Shaloi Yesu gaw, Na amying hpa rai lit ta? ngu nna shi hpe san wu ai. Shi gaw Legio rai li ai, ngu wu ai: kaning rai nme law, nat law law wa shi hta shang nga masai.

³¹Nat ni mung, shanhte hpe sung htum ai shara de n gawt kau na, shi hpe hpyi nem ma ai.

³²Ya dai yang e wa nawng kaba mi bum ntsa e kanaw sha let nga nga ma ai: dai wa ni hta shang lu na ahkang, shanhte hpyi nem ma ai: shaloi shi shanhte hpe ahkang jaw dat mu ai.

³³Dai rai nna nat ni gaw dai masha kaw na pru nna, wa ni hta shang ma ai: shaloi dai wa nawng gaw dai n-gam mahka kaw na nawng de rut gat bang wa nna, marit si mat ma ai.

³⁴Wa rem ai ni gaw shing rai byin ai mu jang, hprawng gat wa nna, mare hte nta htinghkrai hkan e dai lam tsun dan ma ai.

³⁵Shanhte mung dai byin ai lam yu yu na pru sa wa ma ai: shanhte Yesu kaw du ma yang, nat ni pru mat wa ai wa gaw hpun palawng bu hpun nna, shawoi na myit hte Yesu a lagaw nhpang e dung nga ai hpe, mu ma ai rai nna hkrit kahpra mat ma ai.

³⁶Dai lam mu chye ai ni mung, nat kap ai wa hpe kaning di shamai ai gaw, dai ni hpe hkap tsun dan mu ai.

³⁷Shaloi Gerase mung a ginwang hkan na masha nlang hte gaw, hkrit kaba hte hkrit mat ma ai majaw, shi shanhte kaw na pru mat wa na, shi hpe jawm hpyi ma ai: shi chyawm gaw li de shang nna bai wa mat ai.

³⁸Nat pru mat ai wa gaw, shi hte rau nga nga na, shi hpe hpyi nem wu ai: rai timung, shi gaw,

³⁹Na nta de she wa nna, “Karai Kasang nang hpe gade wa karum nit dai gaw, wa tsun dan su,” ngu nna shi hpe shabawn dat wu ai: shaloi shi pru wa nna, Yesu shi hpe gade wa karum sai gaw, dai mare ting hkan e hkaw tsun dan nga ai.

⁴⁰Yesu bai wa yang, nlang hte gaw shi hpe a la nga ma ai majaw, shi hpe ja mara hkap la ma ai.

⁴¹Shaloi, yu mu, Ya-iru mying ai tara jawng agyi wa langai mi sa du ai: dai wa gaw Yesu a lagaw nhpang e hput di nna, shi a nta de sa na, shi hpe hpyi shaja nga ai:

⁴²kaning rai nme law, shi lahkawng ning du sai shi a shayi sha shingtai gaw si wa magang nga lu ai: Yesu hkan sa wa nga yang, shawa masha ni gaw shi hpe ahtu hkra shajang ma ai.

⁴³Dai shaloi, shi lahkawng ning tup sai htaw machyi nna, gade e muk n shamai ya lu ai numsha langai mi gaw,

⁴⁴shi hpang de sit sa nna, shi a palawng banbyau ahtawk wu ai: shaloi jang shi a sai htaw ai ana gaw sim mat lu ai.

⁴⁵Shaloi Yesu gaw, “Ngai hpe ahtawk ai kadai rai ta?” ngu wu ai. Nlang hte gaw ndang nga ma yang Petru gaw, “Madu e, shawa masha ni nang hpe ahtu hkra ai hte, kanawng matep hkra rai nga ma ai,” ngu wu ai.

⁴⁶Yesu gaw, “Marai langai ngai, ngai hpe ahtawk sai: ngai hta na atsam pru wa sai hpe ngai hkan chye dat nngai,” nga ai.

⁴⁷Dai numsha gaw makoi magap n rai lu ai chye wu jang, gari kawa rai sa nna, shi a man e dingnyawm dagup let, hpa rai shi hpe ahtawk ai mung, dai shaloi jang shi mai mat ai mung, masha mahkra a man e tsun dan wu ai.

⁴⁸Shi mahtang, “Shayi sha e, na a kamsham ai gaw nang hpe shamai ya nit dai; ngwipyaw ai hte wa u,” ngu nna shi hpe tsun dat wu ai.

⁴⁹Shi naw tsun nga yang, Tara jawng agyi a nta de na marai langai mi sa nna, “Na a shayi sha si mat salit dai; dai sara hpe hkum shatsang nu,” nga nna sa tsun ai.

⁵⁰Yesu dai ga na jang, “Hkum hkrit et; kamsham ai myit sha rawng u, shaloi shi mai na ra ai,” ngu nna shi hpe htan wu ai.

⁵¹Nta de du ma yang, Petru, Yawhan, Yaku hte, dai numsha ma a kanu yan kawa hta kaga, shi hte rau nhku de kadai hpe mung n shang shangun wu ai.

⁵²Nlang hte gaw dai ma a majaw hkrap ngu hkrap ngoi nga nna sharung shayawt nga ma ai. Shi chyawm gaw, “Hkum hkrap myit, shi si ai n rai, yup pyaw nga ai,” ngu mu ai.

⁵³Ma gaw si mat sai shanhte chye ma ai majaw, shi hpe asawng asang ngu kau mu ai.

⁵⁴Shi chyawm gaw dai ma a lata jum da nna, “Ma e, rawt u,” ngu nna shaga wu ai.

⁵⁵Dai rai nna, shi a wenyi bai wa nna, shaloi jang shi rawt wa ai; shi hpe lusha jaw na shi tsun da wu ai.

⁵⁶Dai ma a kanu yan kawa chyawm gaw mau mahka mat ma ai: rai timung, dai byin ai lam kadai hpe mung n tsun dan u ga, shi shan hpe ginhtim da mu ai.