Read Jinghpaw Hanson Version Bible LUKA 9 Bible Online

LUKA 9 - Jinghpaw Hanson Version Bible bible

LUKA 9

¹Dai hpang, shi gaw dai sape shi lahkawng hte hpe shaga la nhtawm, nat nlang hpe dang lu na mung, machyi makaw shamai ya na mung, shanhte hpe atsam hte ahkang jaw nna,

²Karai Kasang a mungdan lam hkaw tsun na hte, shamai shatsai ya na matu shangun dat mu ai.

³Shi shanhte hpe, “Hkrun lam na matu dawhkrawng, htingpa, muk, gumhpraw re ai hpa mung hkum gun hkum lang myit; palawng lahkawng mung hkum gun myit.

⁴Gara nta hta mung nanhte shang myit yang, dai kaw nga nga nna, dai kaw nna bai pru wa mu.

⁵Nanhte hpe n hkap la ai ni hpe gaw, shanhte a mare na pru wa yang, shanhte a man e sakse tai na matu, nanhte a lagaw hta kap ai nhpu hpe ahpu sharun kau da mu,” ngu nna tsun dat mu ai.

⁶Shing rai shanhte pru sa wa nna, kahtawng shagu hkan e dai kabu gara shiga hkaw dan let, shara magup hkan e shamai shatsai ya hkawm ma ai.

⁷Shing rai byin ai lam yawng hpe Herod munggyi na la nna, myit ung ang nga ai: kaning rai nme law, nkau mi gaw, Yawhan si ai kaw na bai hkrung rawt wa sai;

⁸nkau mi gaw, Elia paw pru ra ai; bai kaga ni mung, Shawng na myihtoi langai ngai bai rawt sai, nga nna tsun shajang ma ai.

⁹Herod mahtang gaw, Yawhan hpe ngai baw htau kau se ai; rai timung, ndai hte wa ngai na ai gaw, kadai wa rai ta?” nga nna, Yesu hpe mu yu na tam nga ai.

¹⁰Shaloi kasa ni bai wa ma yang, shanhte galaw ai amu a lam shi hpe hkai dan ma ai. Shi chyawm gaw shanhte hpe woi la nna, Betsaida ngu ai mare de lagyim sa mat wa ai.

¹¹Shawa masha ni mung dai hkan chye jang, shi hpang de hkan sa ma ai rai nna, shanhte hpe hkaw dan nna, machyi mai mayu ai ni hpe shamai ya mu ai.

¹²Ya jan du wa magang nga ai: dai rai nna sape shi lahkawng gaw sit sa nhtawm, “Dai shawa masha ni hpe grup yin hkan na kahtawng ni hte htinghkrai hkan e wa yup nna lusha tam sha mu ga, shabawn dat u: anhte gaw ya nam e she rai nga ga ai,” ngu nna shi hpe tsun mu ai.

¹³Shi gaw, Nanhte nan shanhte hpe sha na jaw mu, ngu nna, shanhte hpe tsun mu ai. Shanhte gaw, Ndai masha nlang sha na lusha anhte n sa mari yang gaw, anhte kaw muk manga hte nga lahkawng hta kaga hpa mung n nga ai, ngu mu ai: kaning rai nme law, lasha hkrai hkying manga daram rai nga ai.

¹⁴Shaloi shi gaw, Ndai ni hpe hpung mi hta manga shi shi daram di nna, hpawng dung nga shangun mu, ngu nna shi a sape ni hpe tsun mu ai.

¹⁵Shanhte mung shing di nna, nlang hte hpe dung nga shangun mu ai.

¹⁶Shaloi shi gaw dai muk manga hte nga lahkawng hpe la nna, lamu de mada yu let dai hpe shaman nhtawm, ahkyep alep di nna, shawa masha ni hpe hkan tawn jaw na matu shi a sape ni hpe jaw da wu ai.

¹⁷Shaloi dai ni sha nna nlang hkru kat masai: shanhte a angaw angam adaw ahkyep hkan hta lahkawn la yang, mung shi lahkawng hpring dem naw rai nga ai.

¹⁸Lang mi na shi hkrai akyu hpyi nga a yang, sape ni mung shi hte rau nga ma ai: shaloi shi shanhte hpe, “Shawa masha ni ngai hpe kadai re ai nga nga ma ta?” ngu nna san yu ma ai.

¹⁹Shanhte gaw, Baptisma Sara Yawhan, nkau mi gaw, Elia, nkau mi gaw, shawng na myihtoi langai ngai bai hkrung rawt ai, rai nga ai, nga shajang ma ai,” ngu nna htan mu ai.

²⁰Bai, Shi gaw, nanhte mahtang ngai hpe kadai wa re ai nga myit ta? ngu nna shanhte hpe tsun mu ai. Shaloi Petru gaw, Karai Kasang a Hkristu wa nang rai nga ndai, ngu nna htan wu ai.

²¹Dai lam kadai hpe mung n shana mu ga, shi shanhte hpe tsun ginhtim da mu ai.

²²kaning rai nme law, “Dai Masha Kasha gaw nni nkri law law wa hkrum nna, agyi salang ni, hkinjawng agyi ni, laika ka ai sara ni e nyet kau ai hkrum na hte sat kau ai hkrum nhtawm, masum ya nhtoi hta sharawt la ai hkrum na rai nga ai,” nga ai.

²³Bai nlang hte hpe shi tsun mu ai gaw, “Nye a hpang hkan sa mayu ai wa kadai mung, tinang hkum hpe ndang kau nna, shani shagu tinang wudang hpai let, ngai kaw hkan nang ru ga.

²⁴Tinang a asak hkye la mayu ai wa kadai mung asak sum na ra ai; nye a jaw e tinang a asak sum ai wa chyawm gaw, asak hkye la lu na wu ai.

²⁵Masha gaw, ndai mungkan ting hpe madu lu da nna, tinang dai hten byak sum mat yang gaw, shi a matu hpa akyu nga lu ta?

²⁶kaning rai nme law, ngai hte ndai nye a ga hpe kaya ai wa kadai hpe mung, dai Masha Kasha gaw tinang a hpung shingkang hte mung, Kawa a hpung shingkang hte mung, chyoi pra ai lamu kasa ni a hpung shingkang hte mung du sa yang, dai wa hpe kaya kau na ru ai.

²⁷Nanhte hpe ngai gaja wa teng teng tsun made ga, Nang e tsap nga ai ni hta na nkau mi, Karai Kasang a mungdan garai n mu mu gaw, si ai n hkrum na ma ai,” ngu mu ai.

²⁸Dai ga tsun ai hpang matsat ya dang rai jang, shi gaw, Petru, Yawhan, Yaku hte hpe woi nna, akyu hpyi na nga, dai bum de lung wa ai.

²⁹Akyu hpyi nga yang shi a myi man gaw ahpraw asam lai nna, shi a hpun palawng mung hpraw tu ai hte kabrim kabram rai wa lu ai.

³⁰Shaloi, yu mu, Mawshe yan Elia ngu ai masha lahkawng, hpung shingkang hte dan pru nna,

³¹Yerusalem mare e shatup na ra ai kawt pru wa na lam, shi hte ga tsun nga ma ai.

³²Petru hte shi hte rau nga ai yan gaw yup shamwi nga ma ai: rai timung, dum hprang mat ma jang, shi a hpung shingkang hte shi hte rau tsap nga ai yan hpe shanhte mu ma ai.

³³Dai yan gaw shi kaw na wa magang ma yang, Petru gaw, Madu e, ndai yang e nga na anhte a matu mai nga ai; nang e sum masum, na a matu langai mi, Mawshe a matu langai mi, Elia a matu langai mi anhte gap ga, nga nna hpa tsun ai matu mung n chye ai, Yesu hpe tsun wu ai.

³⁴Shing nga nga yang, sumwi du nna shanhte hpe ka-up wa nga ai: dai sumwi kata de lawm shang wa ma yang shanhte gaw hkrit nga ma ai.

³⁵Dai sumwi hta nna mung nsen ngoi pru wa ai gaw, Ndai wa gaw, ngai Sha, ngai lata la ai wa rai nga ai: shi a ga madat mara mu, nga ai.

³⁶Dai nsen ngoi pru ai shaloi Yesu shi hkrai nga ai hpe, shanhte mu ma ai: sape ni mung atsin sha nga nna, shanhte mu ai lam ni hpe, dai nhtoi hte hta kadai e mung n tsun dan ma ai.

³⁷Hpang shani shanhte gaw dai bum de na yu wa ma yang, shawa hpawng kaba shi hpe sa bawp la ma ai.

³⁸Shaloi, yu mu, dai shawa hpawng hta nang ai marai langai mi jahtau nna, “Sara e, ngai sha hpe yu ya na, ngai nang hpe hpyi nngai; shi gaw ngai sha shingtai sha rai li ai:

³⁹yu u, shi hta nat shung nna, shi akajawng sha shabam wa ai hte, hkumbawp pru hkra shi hpe bu kashan shangun nna, machyi la hkra shatsang ngut jang she nachying yak la ai hte shi kaw na pru mat wa wa re ai.

⁴⁰Dai nat shaden kau ya mi, ngu nna na a sape ni hpe ngai hpyi nme timung, shanhte n di lu ma ai,” ngu wu ai.

⁴¹Dai rai nna Yesu gaw, “Makam masham n rawng ai hte nhtan shai ai amyu e, ngai nanhte hte rau gaten du hkra nga nna, sharang ya lu na rai nga a ta? na nsha hpe nang de woi sa rit,” ngu nna htan wu ai.

⁴²Dai ma sa wa nga yang pyi, nat gaw shi hpe kadawng tawn nna htan kashan shangun nga ai: Yesu chyawm gaw dai n seng ai nat hpe daru kau nna, dai ma hpe shamai ya nhtawm kawa e ap ya wu ai.

⁴³Nga manga hte mung Karai Kasang a daru magam nsam majaw mau mahka nga ma ai. Shing rai shi galaw ai amu mahkra a majaw, nlang hte gaw mau nga ma yang, shi gaw,

⁴⁴“Dai Masha Kasha gaw masha ni a lata de ap kau ai hkrum na ra ai, ga ndai hpe nanhte a na hta madat gun da mu,” ngu nna sape ni hpe tsun mu ai.

⁴⁵Shanhte gaw dai ga hpe n chye na ma ai; n chye na mu ga mung, dai hpe shanhte a matu makoi magap da wu ai: de a ga lachyum mung, shanhte n wam san ma ai.

⁴⁶Dai shaloi, shanhte hta kadai mahtang grau kaba nga ga ai kun? nga nna shada da tsun hkat pru ma ai.

⁴⁷Yesu chyawm gaw shanhte a kraw lawang na myit mang ai hpe chye ya wu ai majaw, ma langai mi hpe shaga la nna, shi a makau e shatsap da nhtawm,

⁴⁸“Ndai ma hpe nye a amying majaw, hkap la ai wa kadai mung, ngai hpe hkap la ai rai nga ai; ngai hpe hkap la ai wa mung, ngai hpe shangun dat ai wa hpe hkap la ai rai nga ai: dai rai nna, nanhte mahkra hta grau kaji ai wa gaw kaba grau ai wa rai nga ai.

⁴⁹Shaloi Yawhan htan nna, Madu e, na amying hte nat shaden kau ai marai langai mi hpe anhte mu hkrup ga ai; anhte kaw n hkan nang ai majaw, anhte shi hpe hkum kau gaw ai,” ngu wu ai.

⁵⁰Yesu gaw, “Hkum hkum myit; nanhte a gumlau maga n nga ai wa gaw, nanhte hpang maga nga ai wa rai nga ai,” ngu nna shi hpe tsun wu ai.

⁵¹Ya shi hpe shalun la na nhtoi du wa magang yang, Yerusalem mare de sa na shi myit dingren di da wu ai rai nna, shi a shawng de kasa shangun dat wu ai.

⁵²Dai ni gaw pru sa wa nna, shi a matu lajang da magang na, Samari masha ni a kahtawng langai mi de shang ma ai.

⁵³Shi a myi man Yerusalem mare de yawng na sam sam ai majaw, dai ni gaw shi hpe n hkap la ma ai.

⁵⁴Sape Yaku yan Yawhan gaw dai mu jang, Madu e, shanhte hpe jahkru kau na, an gaw lamu de na wan shaga na, nang hkraw nga n ni? ngu mu ai.

⁵⁵Shi chyawm gaw kayin nna, shan hpe daru kau mu ai.

⁵⁶Dai rai nna shanhte kahtawng kaga de sa mat wa ma ai.

⁵⁷Shanhte lam e sa wa nga ma yang, masha langai mi gaw, “Nang sa ai shara shagu de, ngai nang kaw hkan sa na nngai,” ngu wu ai.

⁵⁸Yesu gaw, “Chyahkyawn ni nhkun lu ma ai, ntsa malen pyen ai u ni mung, u yup lu ma ai; dai Masha Kasha chyawm gaw baw tawn na shara pyi n lu nga ai,” ngu nna shi hpe tsun wu ai.

⁵⁹Bai kaga wa hpe, “Ngai kaw hkan rit,” ngu wu ai. Dai wa gaw, “Nye wa hpe wa makoi na ahkang naw jaw e,” ngu wu ai.

⁶⁰Yesu gaw, “Masha chyasi ni gaw tinang a chyasi ni hpe makoi mu ga: nang gaw Karai Kasang a mungdan lam sa hkaw dan su,” ngu nna shi hpe tsun wu ai.

⁶¹Bai masha kaga langai wa mung, “Madu e, ngai nang kaw hkan nang na nngai; rai timung, nye nta na ni hpe wa shakram na ahkang naw jaw e,” ngu wu ai.

⁶²Yesu gaw, “Na htai jum nna hpang de kayin yu ai wa kadai mung, Karai Kasang a mungdan hte n ging n dan nga ai,” ngu nna shi hpe tsun wu ai.